နောက်ဆုံးသတင်း/ဆောင်းပါးများ

ခမောင်းဆိပ်၊ သက်ကိုင်ညာရွာကို နယ်ခြားစောင့်ရဲများက ဧပြီလ (၂) ရက်နေ့မှစ၍ ၀န်းရံ ပိတ်ဆို့ထား

MYARF
RB News
6.4.2017

ခမောင်းဆိပ် ။ ။ ရခိုင်ပြည်နယ်၊ မောင်တောခရိုင်၊ ခမောင်းဆိပ်မြို့၊ သက်ကိုင်ညာရွာကို ဧပြီလ (၂) ရက်နေ့မှစ၍ နယ်ခြားစောင့်ရဲများက ၀န်းရံ ပိတ်ဆို့ထားကြောင်း သတင်းရရှိပါသည်။ 

ခမောင်းဆိပ်မြို့အပိုင် သက်ကိုင်ညာကျေးရွာအုပ်စု တစ်ခုလုံးကို နယ်ခြားစောင့်ရဲတပ်ဖွဲ့မှ တပ်ရင်းမှူး တစ်ဦးနှင့် ရဲတပ်သား (၅၀) ခန့်ပါဝင်သော အဖွဲ့တစ်ဖွဲ့က ဧပြီလ (၂) ရက်နေ့မှစ၍ ၀န်းရံပိတ်ဆို့ထားပြီး ရွာသူရွာသားများကို သွားလာခွင့် ပိတ်ပင်ထားကြောင်း ဒေသခံများက RB News သို့ပြောပါသည်။ 

အချို့တပ်ဖွဲ့ဝင်များသည် ရွာ၏ ဘေးပတ်လည်တွင် စောင့်လျက်ရှိပြီး၊ အချို့သည် ရွာတွင်းရှိ နေအိမ်များကို တစ်အိမ်တက်တစ်အိမ်ဆင်း ပိုက်စိတ်တိုက် ရှာဖွေလျက် ရှိသည်။ အိမ်ထောင်စုစာရင်းများကို ကိုင်တွယ်၍ မိသားစုဝင်များကို တစ်ဦးချင်း စစ်ဆေးလျက် ရှိကြောင်း သိရှိရသည်။ 

ဧပြီလ (၅) ရက်နေ့တွင် အဒူရှကူရ် (ဘ) ဦးအဒူလ်ဟာဘီ (အသက် ၂၃ နှစ်) ကို နေအိမ်မှ ဖမ်းဆီး၍ နယ်မြေ (၂) အောင်ဇူစခန်း (နယ်မြေရုံး) သို့ ခေါ်ဆောင်သွားပြီး တစ်ညလုံး ရိုက်နှက်နှိပ်စက်ခဲ့ရာ အသည်းအသန် ဖြစ်လာသောကြောင့် မနက်မိုးလင်းချိန်တွင် တမန်းသား ဆေးခန်းသို့ ပို့ဆောင်၍ ဆေးကုသပြီးမှ သတိပြန်လည် ရခဲ့ကြောင်း၊ နယ်ခြားစောင့်ရဲများက ရိုက်နှက်၍ သေသွားသည်ဟု ပြောဆို၍ မရအောင် ယနေ့ ဧပြီလ (၆) ရက်နေ့ ည ၆ နာရီအချိန်တွင် နေအိမ်သို့ ပြန်လွှတ်လိုက်ကြောင်း၊ နေအိမ်တွင် သေဆုံးသွားမည့် အခြေအနေ ဖြစ်နေသည်ဟု ဒေသခံများက ပြောပါသည်။ 

သက်ကိုင်ညာကျေးရွာကို ယနေ့ထိ ၀န်းရံ ပိတ်ဆို့ထားပြီး၊ ကျေးရွာတွင်းရှိ သြဇာရှိ မော်လ၀ီကြီးများ၊ ခေတ်ပညာတတ်များ (၃၀) ခန့်ကို ဖမ်းဆီးရန် အပူတပြင်း လိုက်လံရှာဖွေနေကြောင်း၊ တွေ့သူကိုဖမ်း၊ မိသူကို ဘ၀တုံးသွားအောင် ရိုက်နှက်လျက် ရှိသည်ကို မြင်တွေ့ရ၍ စိုးရိမ်မှုကြောင့် နေအိမ်များတွင် မအိပ်နိုင်ကြောင်း၊ တစ်ရွာလုံးကို ပိတ်ဆို့ထားသောကြောင့် အလုပ်အကိုင် မလုပ်နိုင်ဘဲ စားသောက်ရေး အခက်အခဲ ကြုံတွေ့လျက် ရှိနေကြောင်း၊ ကလေးသူငယ်များမှာ ကြောက်လန့်စိတ်လွန်ကဲပြီး စိတ်ကျရောဂါများ တိုးပွားနေသည်ဟု ဒေသခံများက ဆိုသည်။




Comment ရေးရန်

Rohingya Exodus