အိုဘားမား၏မိန့်ခွန်းကို ရိုဟင်ဂျာများ ၀မ်းမြောက်စွာကြိုဆို

အမေရိကန်ပြည်ထောင်စုအခြေစိုက် Free Rohingya Campaign မှ Mr.Yusuf Iqbal ကိုနိုဝင်ဘာလ ( ၂၁) ရက်နေ့တွင် ၀ါရှင်တန်မြို့အခြေစိုက် RFA မြန်မာပိုင်းအစီအစဉ်မှ အမေရိကန်သမ္မတဘားရက် အိုဘားမားရဲ့ခရီးစဉ်နဲ့ ပတ်သက်လို့ ဆက်သွယ်မေးမြန်းခဲ့သည်။

သမ္မတအိုဘားမားမှ အမေရိကန်၏ပေါ်လီစီကိုမြန်မာပြည်သူတွေအားလုံးသိနိုင်ရန်အတွက် မိန့်ခွန်းမှာထည့်သွင်းပြောကြား သွားသည့်အတွက်အထူးဝမ်းမြောက်ကြောင်း၊ မြန်မာပြည်သူများသည် နှစ်ပေါင်း ၅၀ ကျော်မှိုင်းတိုက်ခံခဲ့ရကြောင်း၊ ယခုအခါဒီမိုကရေစီလမ်းသို့လျှောက်လှမ်းနေသည့်အချိန်တွင် နှစ်ပေါင်းရာကျော်ဒီမိုကရေစီလမ်းစဉ်ကျင့်သုံးနေသည့် နိုင်ငံတကာဒီမိုကရေစီခေါင်းဆောင်ဟုခေါ်တွင်ရ သည့်အမေရိကန်နိုင်ငံမှ မြန်မာနိုင်ငံ၏ အုပ်ချုပ်ရေးလူတန်းစား၊ နိုင်ငံရေး အသိုင်းအ၀န်း၊ ရဟန်းသံဃာ တော်များ၊ ပြည်သူပြည်သားများကို စစ်မှန်သည့်ဒီမိုကရေစီဝါဒကိုသင်ကြားပေးသွားသည့်ဟု ထင်မြင်ကြောင်း၊ အရေးကြီးဆုံးအနေဖြင့် ရခိုင်ပြည်နယ်တွင်ဖြစ်ပွားနေသည့်အကြမ်းဖက်မှုများ ဆက်လက် ဖြစ်ပွားနေပြီး၊ အပြစ်မဲ့သောပြည်သူများထိခိုက်နစ်နာနေမည်ဆိုပါက စစ်မှန်သည့်ဒီမိုကရေစီကိုရနိုင်မည် မဟုတ်ကြောင်းနှင့် ရိုဟင်ဂျာများ၏လူ့အခွင့်အရေးအပြည့်အ၀ရှိရမည်ဖြစ်ကြောင်းတို့ကိုသမ္မတအိုဘားမား မှထည့်သွင်းပြောကြားခဲ့ကြောင်း Mr. Yusuf မှ အင်တာဗျူးတွင်ပြောကြားခဲ့သည်။

ရခိုင်ပြည်အရေးတွင်နှစ်ဖက်ဘာသာဝင်များတွင်အစွန်းရောက်များရှိနေသည့်ကိစ္စကိုမေးမြန်းရာတွင် - အစွန်းရောက်များမရှိလျှင်ယခုကဲ့သို့ပြဿနာဖြစ်ရန်မရှိကြောင်း၊ အစွန်းရောက်များသည်မိမိတို့၏ ဘာသာရေးလူမျိုးရေးများကိုဗန်းပြ၍ မိမိတို့၏ နိုင်ငံရေးခံယူချက်များကိုအသက်သွင်းနေခြင်းဖြစ်ကြောင်း၊ အစွန်းရောက်များ၏တိုက်တွန်းချက်များကြောင့်သာ ထောင်ချီသောလူအုပ်များသည်ရွာများသို့ သွားရောက်၍အကြမ်းဖက်နေခြင်းဖြစ်ကြောင်း၊ အစွန်းရောက်သည့်သူများကို ဘာသာမခွဲခြားဘဲ အစွန်းရောက်သူများအဖြစ်မိမိတို့ရှုံ့ချကြောင်း၊ အစွန်းရောက်သူများမရှိသင့်ကြောင်း၊ မွတ်စလင်ရိုဟင်ဂျာများသည် လူနည်းစုဖြစ်သည့်အကြမ်းဖက်နိုင်သည့်အခွင့်အရေးအလွန်နည်းပါးကြောင်း၊ ထို့ကြောင့် ယခုဖြစ်ပွားခဲ့သည့်အကြမ်းဖက်မှု၏ရလာဒ်တွင် ရိုဟင်ဂျာများဖက်ကသာများစွာခံရကြောင်း၊ ရိုဟင်ဂျာလူမျိုးများသည် စစ်တပ်၊ ရဲ၊ အုပ်ချုပ်ရေးပိုင်းတွင်ပါဝင်၍အမှုထမ်းနိုင်ခြင်းမရှိကြောင်း၊ အာဏာပိုင်အဖွဲ့အစည်းနှင့်လုံခြုံရေးတပ်ဖွဲ့ဝင်များ ပါဝင်သူများတွင်အစွန်းရောက်သူများက မိမိတို့၏လူမျိုး၊ ဘာသာဝင်များဖက်မှဝင်ရောက်ကူညီမှုရှိကြောင်း ဖြေကြားခဲ့သည်။

ရခိုင်ပြည်နယ်ငြိမ်းချမ်းရေးနှင့်ပတ်သက်၍ - မြန်မာပြည်သူပြည်သားများအနေဖြင့်စစ်မှန်သည့် ဒီမိုကရေစီ ကိုနားလည်ရန်လို ကြောင်း၊ လူတစ်ဦးချင်းလေးစားရန်လိုအပ်ကြောင်း၊ အမေရိကန်သမ္မတအိုဘားမားပြော ခဲ့သည့်အတိုင်းရိုဟင်ဂျာများသည် အများနှင့်တန်းတူလေးစားထိုက်သည့်လူတန်းစားဖြစ်သည်ကို အသိအမှတ်ပြုရန်လိုကြောင်း၊ ဥပဒေဘောင်အတွင်းနေထိုင်၍မင်းမဲ့စရိုက်များကိုမကျူးလွန်ပါက တိုးတက်သည့်နိုင်ငံအဖြစ်သို့ပူးပေါင်း၍ချီတက်နိုင်မည်ဖြစ်ကြောင်း Mr. Yusuf မှ RFA မြန်မာပိုင်းအစီအစဉ်သို့ပြောကြားခဲ့သည်။