ရခိုင်ပြည်နယ်မှာ နှစ်ဘက် ပြန်လည် သင့်မြတ်ရေး UNDP လုပ်ဆောင်မည်
RFA မြန်မာပိုင်း
10.7.2013
10.7.2013
ရခိုင် ပြည်နယ်မှာ ရခိုင် တိုင်းရင်း သားတွေနဲ့ မွတ်စလင် ရိုဟင်ဂျာတွေ အကြား နှစ်ဘက် ပြန်လည် သင့်မြတ်ရေးတွေ အတွက် ကုလသမဂ္ဂ လက်အောက်ခံ အဖွဲ့အစည်း တစ်ခု ဖြစ်တဲ့ UNDP က ဦးဆောင်ပြီး အကောင် အထည်ဖော် ဆောင်ရွက် သွားတော့ မယ်လို့ သိရပါတယ်။
ဒီကနေ့ စစ်တွေ မြို့မှာ ကျင်းပတဲ့ သတင်းစာ ရှင်းလင်း ပွဲမှာ ရန်ကုန် အခြေစိုက် ကုလ သမဂ္ဂ ဖွံ့ဖြိုးမှု အစီ အစဉ် UNDP ရဲ့ Programme Manager ဦးသင်းခိုင်က သတင်း ထောက်တွေကို အခုလို ပြောခဲ့တာပါ။
"ချစ်ကြည် ရင်းနှီးမှု လုပ်ငန်း တွေကို မောင်တော မြို့နယ်မှာ ကျေးရွာ အုပ်စု တစ်စု ရွာပေါင်း ၅ဝဝ ခန့် ပါဝင်တဲ့ အဖွဲ့နဲ့ ဇူလိုင်လ ကနေ စတင် တော့မှာ ဖြစ်ပါတယ်၊ ပြီးခဲ့တဲ့နှစ် ဇွန်လ မတိုင်မီက ဒီနှစ်ဘက်ရဲ့ ဆက်ဆံရေး အနေ အထား မျိုးရောက်အောင် ပြန်လုပ် ချင်တာ ကျနော် တို့ရဲ့ မျှော်မှန်း ချက်ပါ"
ဒါ့အပြင် ပထမ ဦးဆုံး အနေနဲ့ ပြန်လည် သင့်မြတ်ရေး လုပ်ငန်း စဉ်တွေကို ရခိုင် ပြည်နယ် မောင်တော ခရိုင် အပါ အဝင် အရှေ့ပိုင်း မြို့နယ် တွေက နေရာ ၃ ခုမှာ ပြုလုပ် သွားမှာ ဖြစ်ပြီး အဲဒီ မြို့နယ် တွေမှာ အောင်မြင် သွားခဲ့ရင် တခြား မြို့နယ် တွေမှာလည်း လူမှု အဖွဲ့ အစည်း တွေနဲ့ ပူးပေါင်းပြီး တိုးချဲ့ဆောင်ရွက် သွားမှာ ဖြစ်တယ်လို့ ဆိုပါတယ်။
လက်ရှိ အနေ အထား အရ တစ်ဘက်နဲ့ တစ်ဘက် ယုံကြည်မှု ကင်းမဲ့ နေသေးတဲ့ အတွက် ပထမ ဦးစွာ ယုံကြည်မှု အပိုင်းကို စတင် လုပ်ဆောင် သွားရမှာ ဖြစ်သလို နှစ်ဦး နှစ်ဘက် ချစ်ခင် ရင်းနှီး မှုတွေ ရရှိလာတဲ့ အနေ အထား အထိ အချိန် ယူကာ ဆောင်ရွက် သွားမှာ ဖြစ်တယ် လို့လည်း ဦးသင်းခိုင်က ပြောပါတယ်။
UNDP အနေနဲ့ မောင်တော မြို့နယ် အတွင်း ဖွံ့ဖြိုးရေး ဆိုင်ရာ ကိစ္စရပ် တွေအတွက် နှစ်ပေါင်း ၁ဝ ကျော်ကြာအောင် ဆောင်ရွက် ခဲ့ပေမဲ့ ပြီးခဲ့နှစ် ဇွန်လ ကဖြစ်ပွား ခဲ့တဲ့ ပဋိပက္ခ တွေကြောင့် မောင်တော မြို့နယ်က လုပ်ငန်း အောင်မြင် မှုတွေဟာ သုည အဆင့်ထိ ပြန်ရောက် ခဲ့ရပြီး အဲဒီ ဖွံ့ဖြိုးမှု ဆိုင်ရာ အစီအစဉ် တွေကိုလည်း ပြန်လည် လုပ်ဆောင် သွားဖို့ ရှိတယ်လို့ သိရ ပါတယ်။
