ဓါးဖြင့်ခုတ်ခံရသူကို စုံ/ကော်က ဆေးရုံတင်ပေးပြီးနောက် ရဲများက ဖမ်းဆီးလိုက်
RB News
23.2.2014
မောင်တော ။ ။ ရခိုင်ပြည်နယ်၊ မောင်တောမြို့နယ်၊ ဒုချီရားတန်းရွာသို့ စုံစမ်း စစ်ဆေးရေး ကော်မရှင် ရောက်ရှိစဉ်က ဒေသခံ ရွာသား တစ်ဦးကို ဓါးဖြင့်ခုတ် ခံရသည့် ဒဏ်ရာများဖြင့် တွေ့ရှိ ခဲ့သဖြင့် မောင်တောမြို့ ပြည်သူ့ ဆေးရုံကြီးသို့ ဆေးကုသရန် ပို့ခဲ့သော်လည်း မောင်တောမြို့မှ ကော်မရှင် ထွက်ခွာပြီးနောက် ရဲများက ဖမ်းဆီးလိုက်ကြောင်း သတင်း ရရှိပါသည်။
ဖေဖော်ဝါရီလ ၁၇ ရက်နေ့က ဒုချီရားတန်း ကျေးရွာသို့ စုံစမ်းစစ်ဆေးရေး ကော်မရှင် ရောက်ရှိခဲ့စဉ်က သေနတ် ဒဏ်ရာ ရရှိထားသူတစ်ဦး၊ ဓါးဒဏ်ရာ ရရှိထားသူ တစ်ဦးတို့နှင့် တွေ့ဆုံခဲ့သည်။ ထို့နောက် ဓါးဒဏ်ရာ ရရှိထားသူ ဦးဇီယာဘူ (ဘ) ဦးမာမတ်အာမီးန် (အသက် ၃၀ နှစ်ဝန်းကျင်) ကို စုံစမ်းစစ်ဆေးရေး ကော်မရှင်က တာဝန်ယူ၍ မောင်တောမြို့ ပြည်သူ့ဆေးရုံတွင် ဆေးကုသရန် ပို့ပေးခဲ့သည်။
စုံစမ်းရေး စစ်ဆေးရေး ကော်မရှင်သည် မောင်တောမြို့မှ ဖေဖော်ဝါရီလ ၂၀ ရက်နေ့တွင် ထွက်ခွာခဲ့ပြီးနောက် နှစ်ရက်အကြာ ယမန်နေ့ (ဖေဖော်ဝါရီလ ၂၂ ရက်) က ရဲများက ဦးဇီယာဘူကို ဆေးရုံမှ ခေါ်၍ မိသားစုများ ရှိရာရွာသို့ ခေါ်ဆောင်သွားခဲ့သည်။ ထို့နောက် မိသားစုများနှင့် ဓါတ်ပုံရိုက်ယူပြီး၊ မိသားစု များကို ပြန်လည် မအပ်နှံဘဲ၊ ပြန်လည် ခေါ်ဆောင်သွားကြောင်း ဒေသခံ တစ်ဦးက RB News သို့ပြောပါသည်။ မိသားစုများနှင့် ဓါတ်ပုံရိုက်ယူခြင်းမှာ ကော်မရှင်မှ မေးမြန်းပါက မိသားစုများကို ပြန်လည်အပ်နှံခဲ့သည်ဟု လိမ်ညာရန် ဖြစ်သည်။
ဦးဇီယာဘူသည် စုံစမ်းစစ်ဆေးရေး ကော်မရှင်ကို ဒုချီရားတန်းရွာတွင် ဇန်န၀ါရီလ ၁၃ ရက်နေ့နှင့် ၁၄ ရက်နေ့များတွင် ဖြစ်ပျက်ခဲ့သည် များကို အမှန်အတိုင်း ဖွင့်ဟခဲ့သူ တစ်ဦးဖြစ်သည်။ ယခုအခါ ကော်မရှင် အဖွဲ့ ပြန်သွားပြီးနောက် ၎င်းကို ဖမ်းဆီးသွားခြင်း ဖြစ်ပြီး မည်သည့်နေရာကို ခေါ်ဆောင်သွားသည်ကို မသိရှိ ရသဖြင့် မိသားစုများက ၎င်းကို သတ်ဖြတ်ပစ်မည်ကို အထူးစိုးရိမ်လျက် ရှိကြသည်။
ဒေသခံများက စုံစမ်းစစ်ဆေးရေး ကော်မရှင်ကို ဆက်သွယ်၍ အကြောင်းကြားရန် ကြိုးစားသော်လည်း ကော်မရှင်မှ ၎င်းတို့ကို ဆက်သွယ်ရန် လိပ်စာ၊ ဖုန်းနံပါတ်များ မပေးခဲ့သဖြင့် အကြောင်းကြား၍ မရဖြစ်နေကြောင်း၊ စုံစမ်းစစ်ဆေးရေး ကော်မရှင်က စစ်ဆေး မေးမြန်းခဲ့သည့် သူများ၏ အသက်အန္တရာယ်ကို ကာကွယ်ပေးရန် အထူးလိုအပ်ကြောင်း၊ ယခုအခါ ကော်မရှင်နှင့် တွေ့ဆုံ၍ အမှန်အတိုင်း ထွက်ဆိုခဲ့သူများမှာ ၎င်းတို့၏ အသက်အန္တရာယ်ကို စိုးရိမ်လျက် ရှိကြောင်း RB News သို့ပြောပါသည်။
