အမေရိကန်အစိုးရနှင့် ရိုဟင်ဂျာ အရေးကိစ္စ ဆွေးနွေး

RB News
5.3.2014

ဝါရှင်တန် ။ ။ ရခိုင်ပြည်နယ်တွင် ရိုဟင်ဂျာ လူမျိုးများ အပေါ် လက်ရှိ အကြမ်းဖက် နေမှုများနှင့် ပတ်သက်၍ အမေရိကန် အစိုးရနှင့် ရိုဟင်ဂျာ အရေး၊ မြန်မာ မွတ်စလင် အရေး ဆောင်ရွက်သူများ တွေ့ဆုံ ဆွေးနွေးမှုများ ပြုလုပ်ခဲ့ကြောင်း သတင်းရရှိပါသည်။

ဖေဖော်ဝါရီလ ၂၆ ရက်နေ့မှ ၂၈ ရက်နေ့အတွင်း အမေရိကန် ကွန်ဂရက်၊ ဆီးနိတ်၊ နိုင်ငံခြားရေး ၀န်ကြီးဌာနနဲ့ ကုလသမဂ္ဂ အဖွဲ့များမှ တာဝန်ရှိ ပုဂ္ဂိုလ်များနှင့် တွေ့ဆုံ ဆွေးနွေးခဲ့သည်။



အဆိုပါ အဖွဲ့များနှင့် တွေ့ဆုံခဲ့သူ ဦးဌေးလွင်ဦးက “ကျွန်တော်တို့ ဆွေးနွေးမှုကို ၃ နေရာမှာ လုပ်တယ်။ ၂၇ ရက်နေ့က ကွန်ဂရက်မှာ၊ ပြီးတော့ ၂၈ ရက်နေ့က ဆီးနိတ်နဲ့ အစိုးရ အဖွဲ့ State Department မှာ ဆွေးနွေးခဲ့တယ်။ အထူးသဖြင့် လောလောဆယ် MSF အပါအ၀င် NGO တွေကို နယ်မြေတွင်းက ပထုတ်လိုက်ခြင်းက လူမျိုးစု နှစ်စုကြားမှာ လုပ်ချင်တိုင်း လုပ်လို့ မရအောင် တားဆီးပေးထားတဲ့ Buffer Zone ကိုဖျက်လိုက်ခြင်း ဖြစ်တယ်။ ဒီလို ဖျက်လိုက်ခြင်း အားဖြင့် ရိုဟင်ဂျာ တွေအပေါ် ဒုချီရားတန်းထက် အဆပေါင်းများစွာ ဆိုးဝါးတဲ့ သတ်ဖြတ်မှုကြီးကို ညတွင်းချင်းမှာ လုပ်ပစ်နိုင်တယ်။ အဲ့လို ဖြစ်လာခဲ့ရင် ကျွန်တော်တို့ ဘက်က ကယ်တင်ရာမှာ နောက်ကျ သွားနိုင်တယ်။ ဒါကြောင့် အရေးကိစ္စ တစ်ခုခု ဖြစ်လာရင် အချိန်မဆိုင်းဘဲ ဘယ်လို တားဆီး သင့်တယ်၊ ကာကွယ်သင့်တယ် ဆိုတာကို အဓိကထား ဆွေးနွေးခဲ့ပါတယ်” ဟု RB News သို့ပြောပါသည်။

ရိုဟင်ဂျာ အရေးနှင့် မြန်မာမွတ်စလင် အရေး ဆောင်ရွက်သူ များသည် ဖေဖော်ဝါရီလ ၂၆ ရက်နေ့ကလည်း ကုလသမဂ္ဂ ဆိုင်ရာ သံအမတ်ကြီး အချို့နှင့် တွေ့ဆုံ ဆွေးနွေး ခဲ့ပြီး၊ ဆွေးနွေးခဲ့ကြောင်း သိရှိရပါသည်။