နယ်ခြားစောင့် ရဲတပ်ဖွဲ့က ရာအိမ်မှူး တစ်ဦးကို စစ်ဖိနပ်ဖြင့်ကန်
Rohingya Eye
RB News
2.7.2014
မောင်တော ။ ။ ရခိုင်ပြည်နယ်၊ မောင်တောမြို့နယ် တောင်ပိုင်းတွင် နယ်ခြားစောင့် ရဲတပ်ဖွဲ့က ကျေးရွာ ရာအိမ်မှူး တစ်ဦးကို စစ်ဖိနပ်ဖြင့် ကန်၍ လူမဆန်စွာ ရိုက်နှက် ခဲ့ကြောင်း သတင်း ရရှိပါသည်။
ဇူလိုင်လ (၁) ရက်နေ့တွင် မောင်တောမြို့နယ် တောင်ပိုင်း သံဒါကျေးရွာသို့ နယ်ခြားစောင့် ရဲတပ်ဖွဲ့ဝင်များ ၀င်ရောက်လာပြီး၊ လူဦးရေ စစ်ဆေးမှုပါ ပြုလုပ်ခဲ့သည်။ သို့သော်လည်း ဒေသခံ ရွာသား တစ်ဦးမှ ပါဝင် စစ်ဆေးခံခြင်း မရှိသဖြင့် နေ့လည် ၁၂ နာရီ ခန့်တွင် ရာအိမ်မှူး ဖြစ်သူ ဦးမော်ဆီအူဒင် (ဘ) ဦးအလီအုလ္လာ (အသက် ၅၀ နှစ်) ကို စစ်ဆေးခံရန် နယ်ခြားစောင့် ရဲတပ်ဖွဲ့ဝင် များက ပြောဆိုခဲ့သည်။
ရာအိမ်မှူး ဖြစ်သူ ဦးမော်ဆီအူဒင်က အစစ်ဆေး မခံချင်သဖြင့် ဇနီးသည် ဖြစ်သူ နေအိမ်တွင် မရှိကြောင်း ပြောဆို၍ ရှောင်ရန် ကြိုးစားခဲ့သည်။ သို့သော်လည်း နယ်ခြားစောင့် ရဲတပ်ဖွဲ့ဝင် များက ဇနီးသည် မရှိလည်း အစစ်ဆေး ခံနိုင်ကြောင်း ပြောဆိုပြီး အစစ်ဆေးခံခိုင်းရာ၊ ဦးမော်ဆီအူဒင်က လုံးဝ အစစ်ဆေး ခံချင်စိတ် မရှိသဖြင့် အိမ်ထောင်စု စာရင်း အိမ်တွင် မရှိကြောင်း ပြောဆို၍ ရှောင်ရန် ကြိုးစားသည့် အခါ နယ်ခြားစောင့် ရဲတပ်ဖွဲ့ဝင် များက စစ်ဖိနပ်ဖြင့် ကန်ကျောက်၍ လူမဆန်စွာ ရိုက်နှက်ခဲ့ကြောင်း ဒေသခံ တစ်ဦးက RB News သို့ပြောပါသည်။
ထိုသို့ လူမဆန်စွာ ရိုက်နှက်မှုကြောင့် ဦးမော်ဆီအူဒင် ဒဏ်ရာ အနည်းငယ် ရရှိခဲ့ကြောင်း သိရှိရပါသည်။
နယ်ခြားစောင့် ရဲတပ်ဖွဲ့ဝင် များက လူဦးရေ စာရင်း စစ်ဆေးနေသည်ဟု ပြောဆို၍ စစ်ဆေးလျက် ရှိသော်လည်း အမှန်တကယ် စာရင်းတွင် ခိုးဝင် ဘင်္ဂလီ စာရင်းများဟု ရေးသား၍ မှတ်တမ်းလျက် ရှိခြင်းကြောင့် ဒေသခံ ရိုဟင်ဂျာများက အစစ်ဆေးခံရန် ငြင်းဆိုနေခြင်း ဖြစ်သည်။ လူဦးရေ စာရင်းကို အမှန်တကယ် စစ်ဆေးလိုပါက အာဏာပိုင်များဖက်မှ ရိုးသားမှသာ ဒေသခံ ရိုဟင်ဂျာများ ပါဝင်မည်ဟု ဒေသခံများက ပြောပါသည်။
