နောက်ဆုံးသတင်း/ဆောင်းပါးများ

ဝက်ကျိန်း ကျေးရွာ အုပ်ချုပ်ရေးမှူးက နည်းမျိုးစုံဖြင့် ဒေသခံများထံမှ ငွေညှစ်




MYARF
RB News
10.7.2014

မောင်တော ။ ။ ရခိုင်ပြည်နယ်၊ မောင်တောမြို့နယ် မြောက်ပိုင်း ၀က်ကျိန်းကျေးရွာ အုပ်ချုပ်ရေးမှူး ဦးကံဖူးသည် ဒေသခံ ရိုဟင်ဂျာ များထံမှ နည်းမျိုးစုံဖြင့် ငွေညှစ်လျက် ရှိကြောင်း သတင်း ရရှိပါသည်။

မောင်တောမြို့နယ် မြောက်ပိုင်း ၀က်ကျိန်း ကျေးရွာ (၀က်ကောမ်) အုပ်ချုပ်ရေးမှူး ဖြစ်သူ မြိုလူမျိုး ဦးကံဖူးသည် ကျေးရွာ အတွင်းရှိ ဒေသခံ ရိုဟင်ဂျာများကို နည်းမျိုးစုံဖြင့် ညဉ်းပန်း နှိပ်စက်မှုများ ပြုလုပ်လျက် ရှိသည့် အပြင် အကြောင်း အမျိုးမျိုးဖြင့် ငွေညှစ်လျက် ရှိကြောင်း ဒေသခံများက RB News သို့ပြောပါသည်။

ဝက်ကျိန်းကျေးရွာရှိ ဒေသခံ ရိုဟင်ဂျာများ ပိုင်ဆိုင်သည့် လယ်ယာမြေ များကို ယခင် န.စ.က လက်ထက်တွင် သိမ်းယူခဲ့ပြီး မြိုလူမျိုးများကို ပေးအပ်ခဲ့သည်။ မတရားသဖြင့် အလကား ရရှိသည့် လယ်ယာမြေများကို မြိုလူမျိုးများက ကိုယ်တိုင် မထွန်ယက်ဘဲ ရိုဟင်ဂျာ လူမျိုးများကို ငှားရမ်းလေ့ ရှိသည်။ ယခုနှစ်တွင် ဦးမာမတ်ဟူစိန်း၏ သားများ ဖြစ်သည့် ဦးရှော်ရှိဒုလ္လာနှင့် ဦးဟာမိတ်ဟူစိန်း တို့မှအပ ကျန်သည့် ရိုဟင်ဂျာများက လယ်ယာမြေများကို မငှားရမ်းခဲ့သဖြင့် လယ်ယာမြေ အများအပြား လုပ်ကိုင်သူမဲ့ လျက်ရှိသည်။ ထိုသို့ လုပ်ကိုင်သူမဲ့ နေသည့် လယ်ယာမြေများတွင် ရိုဟင်ဂျာများ ပိုင်ဆိုင်သည့် နွားများ ၀င်ရောက်လျှင် မြိုလူမျိုးများက ဖမ်းဆီး၍ ကျေးရွာ အုပ်ချုပ်ရေးမှူး ဦးကံဖူးထံ အပ်နှံလေ့ရှိပြီး၊ အုပ်ချုပ်ရေးမှူးက နွားတစ်ကောင် အတွက် ငွေကျပ် ၂၀၀၀၀/- မှ ၅၀၀၀၀/- ထိ ပိုင်ရှင်များထံမှ ငွေညှစ်၍ ပြန်ပေးကြောင်း ဒေသခံများက ပြောပါသည်။

ထို့အပြင် ကျေးရွာ အတွင်းရှိ တံတားများ ပြုပြင်ရန် သစ်အချို့ကို တံတားအနားတွင် ပုံထားခဲ့ပြီး၊ အဆိုပါ သစ်များကို ရိုဟင်ဂျာ ရွာသားများက ခိုးယူသည်ဟု စွပ်စွဲ၍ ငွေညှစ်လျက် ရှိသည်။ ဇွန်လ (၂၈) ရက်နေ့တွင် ဟာဖီးဇ် ဦးဆုလ်တာန် (ဘ) ဦးမာမတ်ဟူဆောင်းကို သစ်များ ခိုးယူသည်ဟု မဟုတ်မမှန် စွပ်စွဲ၍ အုပ်ချုပ်ရေးမှူး ဦးကံဖူးက ငွေကျပ် ၂၀၀၀၀/- ညှစ်ယူခဲ့ကြောင်း သိရှိရပါသည်။

Comment ရေးရန်

Rohingya Exodus