ရွက်ညိုတောင် အခြေစိုက် စစ်သားများက ဒေသခံများကို ရိုက်နှက် ညှဉ်းပန်းနှိပ်စက်
Rohingya Eye
RB News
25.10.2014
မောင်တော ။ ။ ရခိုင်ပြည်နယ်၊ မောင်တောမြို့နယ် မြောက်ပိုင်း ရွက်ညိုတောင် ကျေးရွာရှိ နယ်ခြားစောင့် ရဲတပ်ဖွဲ့ ကင်းစခန်းတွင် စခန်းချထားသည့် စစ်ကြောင်း (စစ်တပ်) အဖွဲ့သည် ပွင့်ဖြူချောင်း ကျေးရွာအုပ်စု အတွင်းသို့ ၀င်ရောက်၍ အပြစ်မဲ့ ဒေသခံ ရိုဟင်ဂျာ များကို ရိုက်နှက် ညှဉ်းပန်း နှိပ်စက်ခဲ့ကြောင်း သတင်း ရရှိပါသည်။
အောက်တိုဘာလ ၂၄ ရက်နေ့ နံနက် ၇ နာရီ အချိန်တွင် မောင်တောမြို့နယ် မြောက်ပိုင်း ပွင့်ဖြူချောင်း ကျေးရွာ အုပ်စု (မိုက်မူန္နာ)၊ မာဂျာန်တော်လီရွာသို့ ရွက်ညိုတောင် ကျေးရွာရှိ နယ်ခြားစောင့် ရဲတပ်ဖွဲ့ စခန်းတွင် စခန်းချ ထားသော စစ်ကြောင်း (စစ်တပ်) အဖွဲ့သည် မြောတောင် ကျေးရွာမှ တဆင့် ရောက်ရှိလာပြီး၊ ကွမ်းရွက်ခြံသို့ သွားနေသည့် ဦးမာမတ်ဆော်ယောဒ် (ဘ) ဦးဆွေယာဒ်ဟူစိန်း (အသက် ၃၈ နှစ်) ကို အကြောင်းမဲ့ လူမဆန် ရိုက်နှက်ခဲ့ရာ ဦးခေါင်းတွင် ပြင်းထန်စွာ ဒဏ်ရာ ရရှိသွားကြောင်း ဒေသခံ တစ်ဦးက RB News သို့ပြောပါသည်။
အလားတူ အဆိုပါ စစ်ကြောင်းသည် လမ်းသွားနေသည့် ဆာလေအာမတ် (ဘ) ဦးနူရ်အာလမ် (အသက် ၂၄ နှစ်) ကိုလည်း သေနတ်ဖြင့် ရိုက်ရာ၊ ခြေထောက်တွင် ပြင်းထန် ဒဏ်ရာ ရရှိခဲ့သည့် အပြင် နားတဖက်မှလည်း ယခုအချိန်ထိ သွေးထွက်လျက် ရှိနေကြောင်း အဆိုပါ ဒေသခံက ပြောပါသည်။
ထို့အပြင် အဆိုပါရွာရှိ မာတာလောမ် (ဘ) ဦးနူရ်အာလမ် (အသက် ၂၈ နှစ်) ၏ စားကုန်ဆိုင်ထဲသို့ ၀င်ရောက်၍ ဘီစကွတ်မုန့်များ၊ ရေသန့်ဘူးများနှင့် ဆေးလိပ်ဘူးများကို လိုင်စင်ရ ဓါးပြများ သဖွယ် ယူဆောင်သွားသည့် အပြင်၊ ရွာအတွင်းမှ ကြက်များနှင့် ဆိတ်များကိုလည်း ဖမ်းဆီး ယူဆောင် သွားသည်ဟု ဆိုသည်။
၎င်းရွာရှိ ကျောင်းသို့ နယ်ခြားစောင့် ရဲတပ်ဖွဲ့မှ ရဲမှူးနှင့် စစ်ကြောင်း အဖွဲ့မှ ဗိုလ်ကြီးတို့ လာရောက်၍ ရပ်မိရပ်ဖများကို ဆင့်ခေါ်၍ “ခင်ဗျားတို့ရွာမှာ လူမိုက်တွေ ရှိနေတဲ့ အတွက်ကြောင့် ခင်ဗျားတို့ကို ကျုပ်တို့က ကျွဲ၊ နွားလို ဆက်ဆံ ရမယ်” ဟု ရိုင်းပျစွာ ပြောဆိုသည့် အပြင် ခြိမ်းခြောက်စကား များလည်း ပြောကြားခဲ့ကြောင်း သိရှိရပါသည်။
အောက်တိုဘာလ ၂၂ ရက်နေ့ နံနက် ၉း၃၀ နာရီ အချိန်ကလည်း မောင်တောမြို့နယ် မြောက်ပိုင်း ဖားဝပ်ချောင်း ကျေးရွာသို့ စစ်ကြောင်း အဖွဲ့ ၀င်ရောက်လာစဉ် အကြောင်းမဲ့ ဖမ်းဆီး ညှဉ်းပန်း နှိပ်စက်ခံ ရမည်ကို စိုးရိမ်၍ ဆိုင်တစ်ဆိုင်တွင် ထိုင်နေရာမှ ထ၍ အိမ်ပြန်သူ အဒူရှကူရ် (ဘ) ဦးအဒူမာလဲခ် (အသက် ၂၁ နှစ်) ကို လိုက်လံ ဖမ်းဆီးပြီး စစ်သားများက ၀ိုင်းဝန်း ထိုးကြိတ်ခဲ့ရာ၊ ပြင်းထန်သော ဒဏ်ရာများဖြင့် သွေးထွက်လျက် ရှိနေခဲ့သော်လည်း ဆေးကုခွင့် မပေးဘဲ ရွက်ညိုတောင်ရှိ နယ်ခြားစောင့် ရဲတပ်ဖွဲ့ စခန်းသို့ ခေါ်ဆောင် သွားပြီး ချုပ်နှောင် ထားကြောင်း ဒေသခံများက ပြောပါသည်။
