နောက်ဆုံးသတင်း/ဆောင်းပါးများ

ဂေါ်ဒူသာရတွင် အကြောင်းမဲ့ သေနတ် ပစ်ဖောက်မှု၏ နောက်ဆက်တွဲ သတင်း




MYARF
RB News
10.2.2015

မောင်တော ။ ။ ရခိုင်ပြည်နယ်၊ မောင်တော မြို့နယ် ဂေါ်ဒူသာရ ကျေးရွာတွင် တံတား ကင်းစခန်းမှ ရဲမှူးငြိမ်းချမ်းအေးက အကြောင်းမဲ့ သေနတ် ပစ်ဖောက်မှုများ ပြုလုပ်ခဲ့ပြီး၊ အပြစ်မဲ့ ဒေသခံ တစ်ဦးက ဖမ်းဆီးပြီးနောက် အခြေအနေမှာ တည်ငြိမ် အေးချမ်းလျက် ရှိကြောင်း သတင်း ရရှိပါသည်။

ယမန်နေ့ ဖေဖော်ဝါရီလ (၉) ရက်နေ့ ည ၈ နာရီကျော် အချိန်တွင် မောင်တောမြို့နယ် တောင်ပိုင်း ဂေါ်ဒူသာရ ကျေးရွာရှိ တံတား ကင်းစခန်းမှ ရဲမှူး ငြိမ်းချမ်းအေးနှင့် နယ်ခြားစောင့် ရဲများသည် ကားတစ်စီးဖြင့် ဂေါ်ဒူသာရ ရွာမရှိ ဗလီခြံဝင်းထဲ ၀င်ရောက်ပြီး ဗလီထဲ၌ ၀တ်ပြုပြီး ထွက်လာသူများကို အကြောင်းမဲ့ ဖမ်းဆီးရန် ကြိုးစားခဲ့ရာ လူများ အော်ဟစ် ထွက်ပြေးခဲ့သော်လည်း မော်လ၀ီ ရှောမ်ရှု (ဘ) ဦးအဒူဆတာရ် (အသက် ၃၇ နှစ်) မှာ ထွက်မပြေးနိုင်သောကြောင့် အကြောင်းမဲ့ ဖမ်းဆီး ခံလိုက်ရသည်။ ဖမ်းဆီးခံရသူ မော်လ၀ီ ရှောမ်ရှုကို ယခုအချိန်ထိ ချုပ်နှောင်ထားပြီး လူမဆန်စွာ ရိုက်နှက် ညှဉ်းပန်း နှိပ်စက်မှုများ ပြုလုပ်လျက် ရှိကြောင်း ဒေသခံများက RB News သို့ပြောသည်။

ရဲမှူး ငြိမ်းချမ်းအေးနှင့် အဖွဲ့သည် ဗလီခြံဝင်းမှ လမ်းမပေါ်သို့ ထွက်လာပြီး မရပ်မနား သေနတ် ပစ်ဖောက်ခဲ့ပြီး၊ ကနဦးတွင် မိုးပေါ်ထောင်ပစ်ခဲ့သော်လည်း၊ နောက်ပိုင်းတွင် အထိတ်တလန့် ဖြစ်ပြီး ရွာအ၀င်ဝတွင် ရပ်နေကြသည့် လူအုပ်ထဲသို့ ပစ်ခတ်မှုများ ပြုလုပ်ခဲ့ကြောင်း သိရသည်။

ရဲမှူးငြိမ်းချမ်းအေးနှင့် အဖွဲ့က သေနတ်များ ပစ်ဖောက်ပြီးနောက် အလယ်သံကျော် ကျေးရွာရှိ နယ်ခြားစောင့် ရဲတပ်ဖွဲ့ တပ်ရင်းမှူးနှင့် ၃ မိုင်ရှိ တပ်မတော် တပ်ရင်းမှ တပ်ရင်းမှူး များကို အကြောင်းကြားခဲ့သည်။ ထို့နောက် အင်အား ၁၀၀ ကျော်ရှိသည့် နယ်ခြားစောင့် ရဲများနှင့် တပ်မတော်သားများ ကား ၆ စီးဖြင့် ရောက်ရှိလာပြီး ညသန်းခေါင်ယံ တစ်နာရီထိ ရွာအတွင်း ကင်းလှည့်ခဲ့ကြောင်း သိရသည်။

ယနေ့ ဖေဖော်ဝါရီလ (၁၀) ရက်နေ့ နံနက် ၁၀ နာရီကျော် အချိန်တွင် အလယ်သံကျော် ကျေးရွာရှိ နယ်ခြားစောင့် ရဲတပ်ဖွဲ့မှ တပ်ရင်းမှူး ရောက်ရှိလာပြီး ကျေးရွာ အုပ်ချုပ်ရေးမှူးကို ဆဲဆို၍၊ နယ်ခြားစောင့် ရဲများမှာ တရားခံ ဖမ်းဆီးရန် လာရောက်ခြင်း ဖြစ်ကြောင်း၊ ရွာသားများ အော်ဟစ်၍ တရားခံ မဖမ်းဆီး နိုင်သဖြင့် တရားခံများကို ရွာသားများက ဖမ်းဆီးပေးရမည်ဟု ပြောဆို ခြိမ်းခြောက်မှုများ ပြုလုပ်ခဲ့ကြောင်း သိရသည်။ ၎င်းက မည်သည့် တရားခံကို ရည်ညွန်းသည်ကို ပြောဆို မသွားဘဲ၊ ရဲမှူးငြိမ်းချမ်းအေး၏ ရမ်းကားမှုကို ကာကွယ်ရန် တမင် ပြောဆိုသွားခြင်း ဖြစ်သည်ဟု ဒေသခံများက ပြောပါသည်။
 

Comment ရေးရန်

Rohingya Exodus