နောက်ဆုံးသတင်း/ဆောင်းပါးများ

ကျောက်ပြင်ဆိပ်မှ အာဏာပိုင်များ၏ သတင်းပေးက ငွေအဆမတန် ညှစ်ယူပြီး ဒေသခံများကို ဒုက္ခပေးလျက်ရှိ



MYARF
RB News
10.4.2015

မောင်တော ။ ။ ရခိုင်ပြည်နယ်၊ မောင်တော မြို့နယ် မြောက်ပိုင်း ကျောက်ပြင်ဆိပ် ကျေးရွာတွင် အာဏာပိုင် များ၏ သတင်းပေး ဦးဆော်လီမူလ္လာက မလေးရှားနိုင်ငံမှ ပြန်လည် ရောက်ရှိလာသူများ ထံမှ ငွေ သိန်းချီ၍ ညှစ်ယူမှုများ ပြုလုပ်လျက် ရှိကြောင်း သတင်း ရရှိပါသည်။

မောင်တော မြို့နယ် မြောက်ပိုင်း ကျောက်ပြင်ဆိပ် ကျေးရွာမှ ဦးဘုလ္လာ (ခ) အဒူနော်ဘီ (ဘ) ဦးအဒူဆော်လာမ် (အသက် ၅၀ နှစ်) သည် လွန်ခဲ့သည့် ၅ နှစ်ကျော်ခန့်က မိသားစု စားဝတ်နေရေး အခက်အခဲကြောင့် မလေးရှား နိုင်ငံသို့ ထွက်ခွာ သွားခဲ့ပြီး စီးပွားရှာခဲ့သည်။ ၎င်းသည် ၂၀၁၅ ခုနှစ် မတ်လတွင် ကျောက်ပြင်ဆိပ် ကျေးရွာရှိ ၎င်း၏ နေအိမ်သို့ ရောက်ရှိလာခဲ့ပြီးနောက် ၎င်းကျေးရွာရှိ အာဏာပိုင်များ၏ သတင်းပေး ဦးဆော်လီမူလ္လာက ကြားသိသည့်အခါ ၎င်းထံ သွားရောက်၍ အမှတ် (၅) နယ်မြေ ကျောက်လှေကား စခန်းရှိ နယ်ခြားစောင့် ရဲတပ်ဖွဲ့ ရဲမှူးနှင့် ညှိနှိုင်းပေးရန်ဟု ဆိုကာ ငွေကျပ် သိန်း ၂၀ ညှစ်ယူခဲ့ပြီး ၎င်းကို နေအိမ်တွင် နေထိုင်ရန် ပြောကြားခဲ့သည်။

မလေးရှား နိုင်ငံတွင် နေထိုင်သော ၎င်းကျေးရွာသား လူကုန်ကူးမှု ပွဲစား ဦးမာဒူလ္လာ (ဘ) ဦးမာတာမီးန်လည်း မကြာခဏ ကျောက်ပြင်ဆိပ် ကျေးရွာသို့ ရောက်ရှိလာပြီး ဦးဆော်လီမူလ္လာနှင့် ကျေးရွာ အုပ်ချုပ်ရေးမှူး တို့ကို ငွေပေး၍ ဒေသခံရွာသား များကို စည်းရုံးပြီး ထိုင်းနိုင်ငံသို့ ခေါ်ယူသွားပြီး အခြား လူကုန်ကူးမှု ပွဲစားများ လက်ထဲသို့ ရောင်းချလေ့ ရှိသည်။ ယခုအခါ ဦးမာဒူလ္လာသည် ကျောက်ပြင်ဆိပ်ရွာသို့ ရောက်ရှိနေပြီး အာဏာပိုင်များ၏ သတင်းပေး ဦးဆော်လီမူလ္လာကို ငွေကျပ် သိန်း ၂၀ ပေးကာ ၎င်း၏ နေအိမ်တွင် နေထိုင်လျက် ရှိသည်။ ဧပြီလ (၂) ရက်နေ့တွင် ဦးဆော်လီမူလ္လာက မလေးရှားမှ ရောက်ရှိလာသူ နှစ်ဦးထံမှ ထပ်မံ၍ ငွေကျပ် ၃ သိန်းစီ တောင်းခံရာ ၎င်းတို့ နှစ်ဦးက ငွေမပေးခဲ့သဖြင့် ဦးဆော်လီမူလ္လာက မလေးရှားနိုင်ငံမှ တရားမ၀င် ရောက်ရှိလာသည်ဟု နယ်မြေ (၅) မှ ရဲမှူးထံ အကြောင်းကြားခဲ့သည်။

ဧပြီလ (၄) ရက်နေ့ နေ့လည် ၁၂ နာရီ အချိန်တွင် နယ်မြေ (၅) မှ ရဲမှူးသည် နယ်ခြားစောင့် ရဲတပ်ဖွဲ့ဝင် (၁၀) ဦးနှင့် အတူ ကားတစ်စီးဖြင့် ကျောက်ပြင်ဆိပ်ရှိ နယ်ခြားစောင့် ရဲကင်းစခန်းသို့ ရောက်ရှိလာပြီး ယူနီဖောင်း ချွတ်ကာ နေ့လည် ၂ နာရီ အချိန်တွင် ဦးအဒူနော်ဘီ၏ အိမ်သို့ သွား၍ အိမ်ခြံဝင်း ဂိတ်ကို ပြိုဖျက် ၀င်ရောက်၍ ဦးအဒူနော်ဘီအား မိသားစုဝင်များ၏ ရှေ့မှောက်တွင် လူမဆန်စွာ ရိုက်နှက်၍ ဖမ်းဆီး ခေါ်ဆောင် သွားခဲ့သည်။ ထို့နောက် လူကုန်ကူးမှု ပွဲစား ဦးမာဒူလ္လာ၏ နေအိမ်သို့ သွားရောက်၍ ရှာဖွေခဲ့သော်လည်း ဦးမာဒူလ္လာကို မတွေ့ရှိခဲ့ကြောင်း ဒေသခံ တစ်ဦးက RB News သို့ပြောသည်။

ဧပြီလ (၅) ရက်နေ့တွင် ဦးအဒူနော်ဘီကို နယ်ခြားစောင့် ရဲတပ်ဖွဲ့ ဌာနချုပ်သို့ ခေါ်ဆောင်သွားခဲ့ပြီး ညနေပိုင်းတွင် ကျောက်လှေကား စခန်း (နယ်မြေ ၅ စခန်း) သို့ ပြန်လည် ခေါ်ဆောင်လာခဲ့သည်။ ဧပြီလ (၈) ရက်နေ့တွင် ဦးမာဒူလ္လာကို ဖမ်းဆီးပြီး ဘူးသီးတောင် မြို့နယ်ရှိ အကျဉ်းထောင်သို့ ပို့ခဲ့ကြောင်း သိရသည်။ ဧပြီလ (၇) ရက်နေ့တွင် အာဏာပိုင်များ၏ သတင်းပေး ဦးဆော်လီမူလ္လာက ဦးမာဒူလ္လာထံမှ ထပ်မံ၍ ငွေကျပ် ၆ သိန်း ရယူခဲ့သည်။

အာဏာပိုင်များ၏ သတင်းပေးဖြစ်သူ ဦးဆော်လီမူလ္လာသည် ဒေသခံ ရွာသားများကို လိမ်လည်၍ ငွေအဆမတန် ရယူပြီး ပြဿနာ ဖြေရှင်းပေးခြင်း မရှိဘဲ ဒုက္ခပေးလျက် ရှိသည်ဟု ဒေသခံများက ပြောပါသည်။

Comment ရေးရန်

Rohingya Exodus