ငါးခူရမှ နယ်ခြားစောင့်ရဲ များက ဒေသခံ နှစ်ဦးကို လုပ်ကြံ ဖမ်းဆီး၍ ငွေညှစ်

မောင်တော ။ ။ ရခိုင်ပြည်နယ်၊ မောင်တော မြို့နယ် မြောက်ပိုင်း၊ အမှတ် (၅) နယ်မြေ ငါးခူရ စခန်းမှ နယ်ခြားစောင့်ရဲ (၆) ဦးသည် ဒီဇင်ဘာလ (၁၃) ရက်နေ့ ည ၁၀ နာရီအချိန်တွင် လောင်းဒုံ ကျေးရွာအုပ်စု မျှာဇင်ရွာသို့ သွားရောက်၍ အိမ်ခြံဂိတ်ဝတွင် ရပ်နေသည့် ဦးအာနိုဝါရ်ဆာဒဲခ် (ဘ) ဦးအီမာန်ဟူစိန်းကို ဘင်္ဂလားဖုန်းဖြင့် ဖုန်းပြောနေသည်ဟု စွပ်စွဲ၍ စစ်ဆေးရာ MPT ဖုန်းတစ်လုံးသာ တွေ့ရှိခဲ့သည်။ ဘင်္ဂလားဖုန်း မတွေ့ရှိသော်လည်း ဘင်္ဂလားဖုန်း ၀ှက်ထားသည်ဟု လုပ်ကြံ စွပ်စွဲ၍ ရိုက်နှက်ကာ MPT ဖုန်းကိုလည်း သိမ်းယူသည့် အပြင် ငွေကျပ် လေးသောင်း ငါးထောင်လည်း ညှစ်ယူခဲ့ကြောင်း ဒေသခံ တစ်ဦးက RB News သို့ပြောပါသည်။ 

ထို့နောက် ညသန်းခေါင်ယံ (၁) နာရီ အချိန်တွင် ဦးအဒူရှကူရ် (ဘ) ဦးအာခ်ဘောရ်အလီ၏ နေအိမ်သို့ သွားရောက်၍ ဦးအဒူရှကူရ် အတွက် လူတစ်ဦးက တိုင်တန်း ထားသည်ဟု လုပ်ကြံ ပြောဆို၍ ၎င်းအား နေအိမ်တွင်ပင် ၂ နာရီထိ ရိုက်နှက်ပြီးနောက် ဖမ်းဆီး ခေါ်ဆောင် သွားခဲ့သည်။ စခန်းသို့ ရောက်သည်နှင့် ဆက်လက်၍ တစ်ညလုံး ရိုက်နှက် ခြိမ်းခြောက်ခဲ့ပြီး ဒီဇင်ဘာလ (၁၄) ရက်နေ့တွင် ငွေကျပ် ငါးသိန်း ညှစ်ယူ၍ ပြန်လည် လွှတ်ပေး ခဲ့ကြောင်း အဆိုပါ ဒေသခံက ပြောပါသည်။ နယ်ခြားစောင့်ရဲ များ၏ ရိုက်နှက်မှုကြောင့် ဦးအဒူရှကူရ်၏ မျက်နှာတွင် ပြင်းထန်စွာ ဒဏ်ရာ ရရှိခဲ့သည်။