မြောက်ဦး ပေါင်းတုတ်ရွာမှ ရိုဟင်ဂျာများက ၎င်းတို့အား ကူညီရန် မေတ္တာရပ်ခံ

RB News
9.5.2016

မြောက်ဦး ။ ။ ရခိုင်ပြည်နယ်၊ မြောက်ဦး မြို့နယ်၊ ပေါင်းတုတ် ကျေးရွာအုပ်စုတွင် ရိုဟင်ဂျာများ နေထိုင်သည့် ရွာသုံးရွာ ရှိပြီး၊ လူဦးရေအားဖြင့် (၆၇၁၃) ဦးခန့် နေထိုင်လျက် ရှိသည်။ ရွာသားများက ငါးဖမ်းလုပ်ငန်း၊ မြေတူးခြင်း လုပ်ငန်း၊ ထွန်ယက် စိုက်ပျိုးခြင်း လုပ်ငန်းများ လုပ်ကိုင်၍ အသက်မွေးဝမ်းကျောင်း ပြုလျက် ရှိနေကြသည်။

၂၀၁၂ ခုနှစ် ဆူပူ အကြမ်းဖက် ဖြစ်ပွားသည့် နောက်ပိုင်းတွင် အဆိုပါ လုပ်ငန်းများကို လုပ်ကိုင်နိုင်ခြင်း မရှိသလို ရွာအပြင် ထွက်၍ အလုပ်လုပ်ခွင့်လည်း မရှိဟု ဒေသခံများက RB News သို့ပြောသည်။ ကျေးရွာ အနီးအနားရှိ စစ်တပ် တပ်ရင်း၌ ထွန်ယက် စိုက်ပျိုးခြင်း လုပ်ငန်းကို လုပ်ကိုင်နိုင်ခဲ့သော်လည်း ရခိုင်တပ်မတော်နှင့် မြန်မာ့တပ်မတော်တို့ တိုက်ပွဲများ စတင်ခဲ့သည့် အချိန်မှစ၍ ထိုလုပ်ငန်းကိုလည်း လုပ်ကိုင်နိုင်ခြင်း မရှိတော့ဟု ဆိုသည်။

ယခုအခါ အလုပ်လက်မဲ့ ဘ၀ဖြင့် စားသောက်ရန် အလွန်ပင် ခက်ခဲလာသဖြင့် အချို့က သားသမီးများကို တောင်းရမ်း ခိုင်းပြီး စားသောက်နေရသည့် အခြေအနေပင် ဖြစ်နေသည်ဟု ဆိုသည်။ ထို့အပြင် မိုးရာသီ ရောက်ရှိတော့မည် ဖြစ်၍ ၎င်းတို့၏ နေအိမ်များ အမိုးအကာ ပြုပြင်ရေး အတွက် အလွန်ပင် အခက်ကြုံလျက် ရှိကြောင်း၊ ကျန်းမာရေး အတွက်လည်း အခက်အခဲ မျိုးစုံ ကြုံတွေ့လျက် ရှိသဖြင့် အကူအညီများ ရရှိရန် ပန်ကြားကြောင်း၊ အလှူရှင်များက ၎င်းတို့အား တတ်နိုင်သရွေ့ ကူညီရန် မေတ္တာရပ်ခံသည်ဟု ဒေသခံများက ပြောပါသည်။