အမေရိကန် သံရုံးမှ ကိုယ်စားလှယ်များ စစ်တွေ အောင်မင်္ဂလာသို့ သွားရောက်၍ ဒေသခံများကို တွေ့ဆုံ
RB News
12.5.2016
စစ်တွေ ။ ။ ရခိုင်ပြည်နယ် စစ်တွေမြို့၊ အောင်မင်္ဂလာ ရပ်ကွက်ရှိ ဒေသခံ ရိုဟင်ဂျာ များကို ရန်ကုန်မြို့ အခြေစိုက် အမေရိကန် သံရုံးမှ ကိုယ်စားလှယ်များက ယနေ့ မေလ (၁၂) ရက်နေ့ နံနက် ၈း၃၀ နာရီ အချိန်တွင် သွားရောက် တွေ့ဆုံခဲ့သည်။
အမေရိကန် သံရုံးမှ ကိုယ်စားလှယ် အဖွဲ့သည် ရိုဟင်ဂျာ အသိုင်းအ၀ိုင်းမှ ခေါင်းဆောင်များ ဖြစ်သည့် ဦးကျော်လှအောင်၊ ဦးအောင်ဝင်း၊ ဦးရွှေလှ၊ ဦးအောင်သိန်း စသည်တို့နှင့် တွေ့ဆုံ၍ ကျန်းမာရေး၊ ပညာရေး၊ သွားလာရေးနှင့် နိုင်ငံသား ဖြစ်မှု ကိစ္စများကို ရင်းနှီး ပွင့်လင်းစွာ မေးမြန်းခဲ့သည်။
ဦးကျော်လှအောင်နှင့် ဦးအောင်ဝင်းတို့က မိမိတို့သည် မိမိတို့ကိုယ် မိမိ ရိုဟင်ဂျာဟု ခေါ်ခြင်းသက်သက် မဟုတ်ကြောင်း၊ မိမိတို့တွင် သမိုင်းဆိုင်ရာ အချက်အလက်များ ရှိကြောင်း၊ မိမိတို့ကို ရှေးယခင်ကတည်းကပင် ရိုဟင်ဂျာ လူမျိုး ဖြစ်သည့် အထောက်အထား များစွာ ရှိကြောင်း ရှင်းလင်း တင်ပြခဲ့သည်။
သံရုံး ကိုယ်စားလှယ်များက လက်ရှိ အခြေနေနှင့် ပတ်သက်၍ မေးမြန်းရာ ဦးရွှေလှက ရခိုင်လူမျိုးများက ၎င်းတို့၏ နေအိမ်များတွင် လူစိမ်းများ ခေါ်ထားကြောင်း၊ အဆိုပါ လူစိမ်းများမှာ ရခိုင်တပ်မတော် - AA တပ်ဖွဲ့ဝင်များ ဖြစ်ကြောင်း၊ ၎င်းတို့က လူစိမ်းများ အိမ်တွင်ထား၍ ရိုဟင်ဂျာများက အောင်မင်္ဂလာ ရပ်ကွက်တွင် လူစိမ်းများ ခေါ်ထားသည်ဟု ၀ါဒဖြန့်လျက် ရှိကြောင်း၊ မိမိတို့သည် ၂၀၁၂ ခုနှစ် ဇွန်လမှစ၍ လုံခြုံရေးတပ်ဖွဲ့ အစောင့်အရှောက်ဖြင့် နေထိုင်ရသူများ ဖြစ်ကြောင်း၊ မိမိတို့အနေဖြင့် လုံခြုံရေး တပ်ဖွဲ့၏ ခွင့်ပြုချက် မပါဘဲ ရပ်ကွက်မှ အပြင်သို့ ထွက်၍ပင် မရကြောင်း၊ ထို့အပြင် အောင်မင်္ဂလာ ရပ်ကွက် အတွင်းရှိ လူများသည် နိုင်ငံတကာ အန်ဂျီအို များမှ အကူအညီ မရသဖြင့် ဒုက္ခသည် စခန်းသို့ ပြောင်းရွှေ့ သွားသည်ပင် ရှိကြောင်း၊ ဤရပ်ကွက်အတွင်းသို့ မည်သည့် လူစိမ်းမှ ၀င်၍ မရကြောင်း၊ ယခုကဲ့သို့ ၀ါဒဖြန့်မှုကြောင့် ပြဿနာ တစ်စုံတစ်ရာ ဖြစ်ပွားမည်ကို စိုးရိမ်ကြောင်း တင်ပြခဲ့သည်။
အမေရိကန် သံရုံးမှ ကိုယ်စားလှယ် များသည် နံနက် ၁၀ နာရီ အချိန်တွင် အောင်မင်္ဂလာ ရပ်ကွက်မှ ပြန်လည် ထွက်ခွာ သွားကြောင်း သိရှိရသည်။
သတင်းနှင့် ဓါတ်ပုံများကို Peace Muhammad Arkani မှ ပေးပို့သည်။
