ခမောင်းဆိပ်မှ နယ်ခြားစောင့်ရဲ များက ကင်းသမားများကို ရိုက်နှက် ညှဉ်းပန်းနှိပ်စက်

RB News

1.9.2016

ခမောင်းဆိပ် ။ ။ ရခိုင်ပြည်နယ်၊ မောင်တောခရိုင်၊ ခမောင်းဆိပ်မြို့ ယခင် နယ်မြေ (၁) အပိုင် ရဲအောင်စံရာဖွေ ကျေးရွာအုပ်စု၊ မာဇီးရွာ တံတားအနီးတွင် အခြေစိုက်သော နယ်ခြားစောင့် ရဲတပ်ဖွဲ့ ကင်းစခန်းမှူးနှင့် တပ်ကြပ်တို့သည် လူကြီးလူအို မရွေး ကန်ကျောက် ရိုက်နှက် နှိပ်စက်လျက် ရှိကြောင်း သတင်း ရရှိပါသည်။

သြဂုတ်လ (၂၈) ရက်နေ့ ညသန်းခေါင်ယံ တစ်နာရီခွဲခန့် အချိန်တွင် ရဲအောင်စံရာဖွေ ကျေးရွာအုပ်စု၊ ရဲအောင်ရွာတွင် ကင်းစောင့်နေသည့် ရိုဟင်ဂျာများကို နယ်ခြားစောင့်ရဲများက စစ်ဆေးခဲ့ရာ ကင်းစောင့်နေသူ (၄) ဦးအနက် (၃) ဦးမှာ အသင့်အနေအထား ရှိနေပြီး၊ ကျန်တစ်ဦးမှာ အိမ်သာတက်နေသည်ကို တွေ့ရှိခဲ့သည်။ 

နယ်ခြားစောင့်ရဲ များက ကင်းစောင့်နေစဉ် အိမ်သာ မတက်ရဟု ဆိုကာ ဦးဟာဘီ (ဘ) ဦးနော်ဇိရ်အာမတ် (အသက် ၆၀ နှစ်) ကို ကင်းသမား (၃) ဦးရှေ့မှောက်တွင် လက်သီးဖြင့် သုံးလေးချက် ဆင့်ထိုးပြီး ဆိုင်ကယ်ပေါ်သို့ တင်၍ စခန်းသို့ ခေါ်ဆောင် သွားခဲ့သည်။ ထို့နောက် စခန်းတွင် တစ်ညလုံး ခြောက်ပေါက်ထဲတွင် ထည့်သွင်းထားပြီး ခြေဖြင့် ကန်ကျောက်၊ လက်သီးဖြင့် ထိုး၊ တုတ်ဖြင့် ရိုက်ခဲ့သည်။ မိုးလင်းချိန်တွင် ပြန်လည် လွှတ်ပေးခဲ့သော်လည်း လမ်းမလျှောက်နိုင်တော့၍ မိသားစုဝင်များ သွားရောက်၍ ထမ်းပြီး ပြန်လည် ခေါ်ဆောင်လာခဲ့ရကြောင်း ဒေသခံများက RB News သို့ပြောသည်။ 

မိသားစုဝင်များက ၎င်းကို တမန်းသား ကျန်းမာရေးဌာနသို့ ပို့ဆောင်ပြီး ဆေးကုသ နေသော်လည်း ယခုအချိန်ထိ အခြေအနေ ကောင်းမလာဘဲ အိပ်ရာထဲ လဲလျောင်း နေရသည်ဟု ဒေသခံများက ပြောပါသည်။ 

အလားတူ သြဂုတ်လ (၂၀) ရက်နေ့တွင်လည်း ယင်းကျေးရွာအုပ်စု၊ မာဇီးရွာရှိ ကင်းတဲနေရာသို့ နယ်ခြားစောင့်ရဲများ သွားရောက်၍ ကင်းသမားများကို ထအော်ရမည့် တာဝန်မကျေဟု ဆိုကာ ဦးအာဘူလ်ဟူစိန်း (ဘ) ဦးအာရှုအလီ (အသက် ၅၀ နှစ်) ကို ကင်းတဲနေရာတွင်ပင် ထိုးကြိတ် ရိုက်နှက်ပြီး စခန်းသို့ ခေါ်ဆောင်သွားက တစ်ညလုံး ခြောက်ပေါက် ထည့်ထားပြီး လူမဆန်စွာ နှိပ်စက်ခဲ့သည်။ 

နယ်ခြားစောင့်ရဲ များ၏ လူမဆန်စွာ နှိပ်စက်မှုကြောင့် အောင်သပြေရှိ ဆေးခန်းတွင် ဆေးကုသမှု ခံယူခဲ့ရသည်။ ဦးအာဘူလ်ဟူစိန်းက အောင်သပြေရှိ ရဲမှူးထံ တိုင်ကြားရန် ကြိုးစားခဲ့သော်လည်း စခန်းရှိ ဒုရဲအုပ်က ရဲမှူးနှင့် တွေ့ဆုံခွင့် မပေးဘဲ “ငါပြောပေးမယ်” ဟု ဆိုကာ နှင်ထုတ်ခဲ့သည်။

မာဇီးရွာ တံတားအနီးရှိ ကင်းစခန်းမှ နယ်ခြားစောင့်ရဲ များ၏ အချိန်မတော် လှုပ်ရှားမှု၊ ရိုင်းစိုင်းစွာ ဆက်ဆံမှု၊ ညှဉ်းပန်းနှိပ်စက်မှု တို့ကြောင့် နယ်မြေ တည်ငြိမ်အေးချမ်းမှုပါ ပျက်ပြားလာနိုင်သောကြောင့် အထက် အာဏာပိုင်များ အနေဖြင့် အမြန်ဆုံး အရေးယူ ဟန့်တားပေးပါရန် ပန်ကြားကြောင်း ဒေသခံများက RB News သို့ပြောသည်။