ကျောက်ပြင်ဆိပ် အုပ်ချုပ်ရေးမှူးက ရွာသားတစ်ဦးကို အကြောင်းမဲ့ ဖမ်းဆီး ငွေညှစ်

RB News

1.9.2016

မောင်တော ။ ။ ရခိုင်ပြည်နယ်၊ မောင်တော မြို့နယ် မြောက်ပိုင်း ကျောက်ပြင်ဆိပ် ကျေးရွာ အုပ်ချုပ်ရေးမှူးသည် နယ်ခြားစောင့်ရဲ များနှင့် ပူးပေါင်း၍ ဒေသခံ ရိုဟင်ဂျာတစ်ဦးကို မတရားသဖြင့် ဖမ်းဆီးချုပ်နှောင်ကာ ငွေကျပ် နှစ်သိန်း ညှစ်ယူခဲ့ကြောင်း သတင်း ရရှိပါသည်။ 

သြဂုတ်လ (၂၉) ရက်နေ့တွင် ကျောက်ပြင်ဆိပ် ကျေးရွာ အုပ်ချုပ်ရေးမှူးသည် BD ပြေး တရားခံများကို လိုက်လံ ဖမ်းဆီးရန်ဟု ဆိုကာ ယင်းကျေးရွာ အခြေစိုက် နယ်ခြားစောင့် ရဲတပ်ဖွဲ့ဝင် များကို ရွာထဲသို့ ခေါ်ဆောင်လာခဲ့သည်။ 

ကျေးရွာ အုပ်ချုပ်ရေးမှူးသည် ကင်းစောင့်နေသည့် ရွာသားများ အပါအ၀င် နယ်ခြားစောင့် ရဲတပ်ဖွဲ့ဝင် များနှင့် အတူ ယင်းကျေးရွာအုပ်စု တောင်ရွာမှ ဦးဂျီရာမာန် (ဘ) ဦးဂေါ်နူမျာ (အသက် ၃၃ နှစ်) ၏ နေအိမ်ကို စီးနင်း ၀င်ရောက်၍ တစ်စုံတစ်ရာ ပြောဆိုခြင်းမရှိဘဲ ဦးဂျီရာမာန်ကို ဖမ်းဆီး ခေါ်ဆောင်သွားကာ သြဂုတ်လ (၃၀) ရက်နေ့ နံနက်ပိုင်း ငွေကျပ် နှစ်သိန်း ညှစ်ယူ၍ ပြန်လည် လွှတ်ပေးခဲ့ကြောင်း ဒေသခံတစ်ဦးက RB News သို့ပြောသည်။