နောက်ဆုံးသတင်း/ဆောင်းပါးများ

ကျီးကန်းပြင် အလယ်ရွာမှ နှင်ထုတ်ခံရသည့် ဒေသခံများကို အိမ်ပြန်ခိုင်းခြင်းမှာ မမှန်ကန်သည့် သတင်းသာ ဖြစ်


RB News
24.11.2016

မောင်တော
။ ။ ရခိုင်ပြည်နယ်၊ မောင်တောမြို့နယ် မြောက်ပိုင်း ကျီးကန်းပြင် ကျေးရွာအုပ်စု၊ အလယ်ရွာမှ ဒေသခံ ရိုဟင်ဂျာများကို နယ်ခြားစောင့်ရဲတပ်ဖွဲ့ ဌာနချုပ်မှ ကွပ်ကဲရေးမှူး ရဲမှူးချုပ်သူရစန်းလွင်က နိုင်ငံတော်၏ အမိန့်အရဟု ဆိုကာ ယမန်နေ့ အောက်တိုဘာလ (၂၃) ရက်နေ့တွင် ကျေးရွာအတွင်းမှ အတင်းအဓမ္မ နှင်ထုတ်ခဲ့ပြီးနောက် ယင်းနေ့ ညပိုင်းမှစ၍ ၎င်းတို့အား အိမ်ပြန်ခိုင်းသည်ဟု သတင်းတစ်ရပ် ထွက်ပေါ်ခဲ့သည်မှာ လုံးဝ မှန်ကန်မှု မရှိကြောင်း သတင်း ရရှိပါသည်။

အောက်တိုဘာလ (၂၃) ရက်နေ့ နံနက်ပိုင်းတွင် နယ်ခြားစောင့်ရဲတပ်ဖွဲ့ ဌာနချုပ်မှ ကွပ်ကဲရေးမှူးသစ် ရဲမှူးချုပ်သူရစန်းလွင်က ကျီးကန်းပြင်ကျေးရွာအုပ်စုမှ ဘာသာရေးဆရာ နှစ်ဦးကို ဆင့်ခေါ်ပြီး ကျီးကန်းပြင် အလယ်ရွာရှိ ဒေသခံရိုဟင်ဂျာများကို နေအိမ်များမှ ၂၄ နာရီအတွင်း ထွက်သွားရန် အမိန့်ပေးခဲ့သဖြင့် ဒေသခံ ရိုဟင်ဂျာ မိသားစု ၃၀၀ ကျော် အိုးမဲ့အိမ်မဲ့ ဖြစ်ခဲ့ရသည်။

ယင်းနေ့ညပိုင်းမှစ၍ အိုးမဲ့အိမ်မဲ့ ဖြစ်သွားသူများကို နေအိမ်အသီးသီးသို့ ပြန်ခွင့်ပြုလိုက်ပြီးဟု သတင်းများ ထွက်ပေါ်ခဲ့သည်။ အဆိုပါသတင်းနှင့် ပတ်သက်၍ RB News မှ ကျီးကန်းပြင် ဒေသခံများထံမှ စုံစမ်း၍ အတည်ပြုခဲ့ရာ --

ဒေသခံတစ်ဦးက “ပြန်သွားခိုင်းတာတော့ လုံးဝ မဟုတ်ဘူး။ အမိန့်က နယ်ခြားစောင့်ရဲတပ်ဖွဲ့က ထုတ်ခဲ့တာ၊ အဲဒါကို စစ်တပ်ကို အကြောင်းမကြားထားဘူးလို့ ယူဆတယ်။ လူတွေက အချိန်တိုအတွင်းမှာ ဝေးလံတဲ့ နေရာကို သွားလို့ မရတော့ ရွာနဲ့ နီးနီးစပ်စပ်မှာဘဲ ဖြစ်သလို နေနေကြတယ်။ ဒီမနက် ၁၀ နာရီလောက်မှာ ကင်းလှည့်နေတဲ့ စစ်သားအချို့က ရွာအပြင်ပိုင်းမှာ ဖြစ်သလို နေနေတဲ့ နော်ဒီမ်ဖာရာက မိသားစုအချို့ဆီ ရောက်လာတယ်။ အဲဒီမိသားစုတွေကို အိမ်ပြန်ခိုင်းတယ်။ မိသားစုတွေက ကြောက်ပြီး သူတို့ သော့တွေ ပျောက်နေတယ်၊ အိမ်ပြန်လို့မရဘူးလို့ ပြောတော့ စစ်သားတွေက အိမ်တစ်အိမ်ရဲ့ သော့ကို ဖျက်ပေးတယ်။ ပြီးတော့ အိမ်ထဲဝင်ရှာတယ်။ အဲဒီ အိမ်ထဲမှာ ရှိတဲ့ ငွေသား ၆ သိန်းကို ယူပြီး၊ အဲဒီမိသားစုတွေကို အတင်းပြန်ဝင်ခိုင်းတယ်။ အဲဒီအချိန်မှာ အမျိုးသားတွေမရှိဘူး။ အမျိုးသမီးတွေချည်းဘဲ။ အမျိုးသမီးတွေ အိမ်ထဲဝင်ပြီး သိပ်မကြာဘူး၊ အမျိုးသားတွေက အခြေအနေ ကောင်းသွားပြီ ထင်ပြီး ပြန်ဝင်လာကြတယ်။ မိသားစု အနည်းငယ်ပါ။ အမျိုးသားတွေ ရောက်လာပြီး တစ်နာရီလောက်အကြာ နေ့လည် ၁၂ နာရီလောက်ပေါ့။ အဲဒီအချိန်မှာ နယ်ခြားစောင့်ရဲတွေ ရောက်လာပြီး အဲဒီမိသားစု အားလုံးကို ဖမ်းသွားတယ်။ အားလုံး ၃၅ ယောက်ပါ။ ဌာနချုပ်ကို ခေါ်သွားတယ်။ အတော်လေး ညှဉ်းပန်းနှိပ်စက်ပြီး ပြန်လွှတ်ပေးလိုက်တယ်” ဟု ပြောသည်။


နော်ဒီမ်ဖာရာ သည် ကျီးကန်းပြင်ကျေးရွာအုပ်စု၊ အလယ်ရွာအတွင်းရှိ ရွာငယ်တစ်ခု ဖြစ်သည်။

“အပြင်မှာ ထွက်နေတဲ့ ကွပ်ကဲရေးမှူး ကိုယ်တိုင် ပြန်ခိုင်းတယ်ဆိုတဲ့ သတင်းက လုံးဝ မဟုတ်ပါဘူး” ၎င်းက အတည်ပြု ပြောကြားသည်။

ထို့အပြင် အတင်းအဓမ္မ အိမ်ပြန်ရသည့် မိသားစုများ၏ ဆန်အိတ် ၁၄ အိတ်ကိုလည်း စစ်သားများ ဖျက်ဆီးခဲ့ကြောင်း အဆိုပါ ဒေသခံက ပြောပါသည်။

”မနေ့က အိမ်တွေကနေ ချက်ချင်း ထွက်ပေးရတော့ လူတွေက အစားအသောက်ကို အဓိက သယ်ကြတယ်။ ဒီနေ့ စစ်သားတွေ အတင်းပြန်ခိုင်းတဲ့ မိသားစုတွေမှာ ဆန် ၁၄ အိတ်ရှိတယ်။ အဲဒါကို ရွာအပြင်မှာ သူတို့နေတဲ့ နေရာနားမှာဘဲ ထားကြတာ။ အဲဒီကို စစ်သားတွေက သယ်သွားခိုင်းတော့ အမျိုးသမီးတွေချည်း မသယ်နိုင်ကြဘူး။ အမျိုးသမီးတွေက နောက်မှ အမျိုးသားတွေ လာရင် သယ်ခိုင်းမယ်လို့ စစ်သားတွေကို ပြောတော့ စစ်သားတွေက ဆန်အိတ်တွေကို ဖောက်ပြီး အနားမှာ ရှိတဲ့ မြောင်းထဲ ထည့်လိုက်တယ်။ အဲဒီတော့ ဆန် ၁၄ အိတ်စလုံး ပျက်စီးသွားတယ်”

အောက်တိုဘာလ (၂၃) ရက်နေ့တွင် မောင်တောခရိုင် အထွေထွေ အုပ်ချုပ်ရေး ဦးစီးဌာနတွင် အစည်းအဝေးတစ်ရပ် ကျင်းပခဲ့ပြီး၊ အနောက်ပိုင်းတိုင်း စစ်ဌာနချုပ် တိုင်းမှူး၊ နယ်ခြားစောင့်ရဲတပ်ဖွဲ့ ဌာနချုပ် ကွပ်ကဲရေးမှူး ရဲမှူးချုပ်သူရစန်းလွင် အပါအ၀င် တပ်မမှူး၊ ဗျူဟာမှူးများနှင့် ခရိုင်၊ မြို့နယ် အုပ်ချုပ်ရေးအဖွဲ့များ တက်ရောက်ခဲ့သည်။ အဆိုပါ အစည်းအဝေးတွင် ရဲမှူးချုပ်သူရစန်းလွင် က ၀ပိတ်နှင့် ကျီးကန်းပြင် အလယ်ရွာတို့ကို အပြတ်ရှင်းမည်ဟု ပြောကြားခဲ့ကြောင်း စုံစမ်းသိရှိရသည်။



Comment ရေးရန်

Rohingya Exodus