နယ်ခြားစောင့်ရဲများနှင့် န.တ.လ ရွာသားများက ရိုဟင်ဂျာများထံမှ လုယက်ထားသည့် ပစ္စည်းများ ကျွဲ၊နွား တိရိစ္ဆာန်များကို ပြန်လည် ရောင်းချလျက်ရှိ

MYARF
RB News
31.12.2016

မောင်တော ။ ။ ရခိုင်ပြည်နယ်၊ မောင်တောမြို့နယ် မြောက်ပိုင်းတွင် စစ်တပ်နှင့် နယ်ခြားစောင့်ရဲတပ်ဖွဲ့တို့သည် ကြက်ရိုးပြင်၊ ငါးစားကြူး၊ ပြောင်းပိုက်၊ ဦးရှည်ကျ၊ ဆင်သေပြင်၊ စေတီပြင်၊ ဒိုးတန်း၊ ကျားခေါင်းတောင်၊ ရေခဲချောင်းခွဆုံ၊ ဓါးကြီးစား၊ ပွင့်ဖြူချောင်း၊ မြောတောင်၊ ရေတွင်းကျွန်း၊ ဖားဝပ်ချောင်း၊ မောင်နှမ၊ ၀ါးပိတ်၊ ကျီးကန်းပြင် စသည့်ကျေးရွာများသို့ န.တ.လ ရွာသားများနှင့် မကြာခဏ ၀င်ရောက်၍ ရိုဟင်ဂျာအမျိုးသားများကို ရိုက်နှက် မောင်းထုတ်ကာ၊ စစ်သားများက အမျိုးသမီးများကို မုဒိမ်းကျင့်၊ နယ်ခြားစောင့်ရဲများနှင့် န.တ.လ ရွာသားများက လုယက်ဖျက်ဆီးခြင်းများ ပြုလုပ်ခဲ့သည့် အပြင် ကျွဲ၊ နွား၊ ဆိတ်၊ ကြက်ဘဲများကို ယူဆောင်သွားခဲ့သည်။ လုယက်ခဲ့သမျှ ပစ္စည်းများနှင့် ကျွဲ၊ နွား တိရိစ္ဆာန်များကို န.တ.လ ရွာများတွင် စုဆောင်း ထားခဲ့ပြီး၊ ယခုအခါ န.တ.လ ရွာများမှ တဆင့် ဘူးသီးတောင်၊ တောင်ပြိုလက်ဝဲနှင့် မောင်တောမြို့ရှိ ဆင်ခြေဖုံး ရပ်ကွက်များသို့ သယ်ယူသွားပြီး ရောင်းချလျက် ရှိကြောင်း သတင်း ရရှိပါသည်။

ကျီးကန်းပြင်နှင့် ၀ါးပိတ်ကကျေးရွာများမှ လုယက်ယူဆောင် သွားခဲ့သည့် ကျွဲ၊ နွား၊ ဆိတ်များကို အောင်သာယာ၊ အောင်မင်္ဂလာ၊ ငွေတောင်၊ ရွာသာယာ စသည့် ကျေးရွာများတွင် စုဆောင်းထားခဲ့ပြီး၊ ယခုအခါ မြို့ပေါ်နှင့် ဆင်ခြေဖုံး ကျေးရွာများသို့ ယူဆောင်သွားပြီး ရောင်းချလျက် ရှိကြောင်း ဒေသခံများက RB News သို့ပြောသည်။

မြို့မကညင်တန်း ကျေးရွာဈေးတွင် ရောင်းချနေသည့် အသားများမှာ ယင်းကျေးရွာအုပ်စု ဒဲလ်ဖာရာ (ခရိုင်အုပ်ချုပ်ရေးမှူးရုံး၏ မြောက်ဘက်) မှ ဦးရှော်ဖိခ်၊ ဦးအီဆက် (ဘ) ဦးအီလီယာစ် တို့အဖွဲ့က န.တ.လ ရွာသားများမှ ၀ယ်ယူ၍ ရောင်းချနေခြင်း ဖြစ်သည်ဟု ဆိုသည်။

ကြက်ရိုးပြင်၊ ငါးစားကြူး၊ ပြောင်းပိုက်၊ ဆင်သေပြင်၊ စေတီပြင်၊ ကျွန်းခေါင်း၊ ကြိုက်ချောင်း၊ ဒိုးတန်း၊ ဦးရှည်ကျ၊ ကျားခေါင်းတောင်၊ ရေတွင်းကျွန်း၊ ရေခဲချောင်းခွဆုံ၊ ပွင့်ဖြူချောင်း၊ ဓါးကြီးစား စသောကျေးရွာများမှ လုယက်သွားခဲ့သည့် ကျွဲ၊ နွား၊ ဆိတ်များကို လောင်းဒုံ န.တ.လ ရွာ၊ ကံပြင်၊ စံပယ်ပင်ရင်း၊ ရွက်ညိုတောင် ရခိုင်ရွာ စသည့် ရခိုင်ရွာများနှင့် န.တ.လ ရွာများတွင် စုဆောင်းထားခဲ့ပြီး၊ ဘူးသီးတောင်မြို့နယ် ဖုံညိုလိပ် ကျေးရွာသို့ သယ်ဆောင်သွားကာ သားသတ်လိုင်စင်သမားကို ရောင်းချခဲ့ကြောင်း သိရှိရသည်။ သားသတ်လိုင်စင်သမားက ဘူးသီးတောင် အရှေ့ပိုင်းနှင့် မြောက်ပိုင်းရှိ ကျေးရွာများသို့ ထပ်ဆင့် ဖြန့်ဝေရောင်းချလျက် ရှိသည်ဟု ဒေသခံများက ပြောပါသည်။

ကျွဲ၊ နွား၊ တိရိစ္ဆာန်များကို တောင်ပြိုလက်ယာ ကျေးရွာအုပ်စုသို့လည်း သယ်ဆောင်သွားပြီး၊ ယင်းကျေးရွာမှ ဦးဟာရှိမ် (ဘ) ဦးအဒူကော်ရိမ်၊ ဦးမာမတ်ဒုလ်ဟောက် (ဘ) ဦးအာဘူဆူးဖီယန်၊ ဦးအုစ်မာန် (ဘ) ဦးရှောမ်ရှု၊ ဦးအာဘူလ်ဟူစိန်း (ဘ) ဦးအာရိဖ်အုလ္လာ၊ ဦးအာရောဖ်အာမတ် (ဘ) ဦးအာဘူဆူးဖီယန် တို့ကို ရောင်းချခဲ့သည်။ ၀ယ်ယူသူများက နယ်စပ်မိုင်တိုင် ၃၄ နှင့် ၃၅ တို့မှတဆင့် ဘင်္ဂလားဒေ့ရှ် နိုင်ငံဘက်သို့ ပို့ဆောင် ရောင်းချလျက် ရှိကြောင်း ယင်းကျေးရွာမှ ဒေသခံများက ပြောပါသည်။

ရွက်ညိုတောင် ရခိုင်ရွာတွင် စုဆောင်းထားခဲ့သည့် ကျွဲ၊ နွား၊ ဆိတ်များကို သရက်အုပ် ကျေးရွာအုပ်စု တောင်ရွာမှ ဦးအာယုဖ် (ဘ) ဦးဆော်လာမတ်အုလ္လာ အား ရောင်းချခဲ့ပြီး၊ ၎င်းက သရက်အုပ်ကျေးရွာတွင် အသားများရောင်းချခဲ့သည့် အပြင် ကျောက်လှေကား၊ ဇင်ပိုင်ညာ၊ မင်္ဂလာကြီး ကျေးရွာများသို့ အကောင်လိုက် သယ်ဆောင်သွား၍ ရောင်းချခဲ့ကြောင်း သိရှိရသည်။ မောင်တောမြို့ပေါ်သို့ ရောင်းချခဲ့ခြင်းလည်း ရှိသည်ဟု ဒေသခံများက ပြောပါသည်။