ကျောက်ချောင်းတွင် စစ်သားများက အကြောင်းမဲ့ ပစ်ခတ်၊ ဒေသခံများကို ဖမ်းဆီး

RB News

4.12.2016

တောင်ပြိုလက်ဝဲ ။ ။ ရခိုင်ပြည်နယ်၊ မောင်တောခရိုင်၊ တောင်ပြိုလက်ဝဲမြို့ ၊ အမှတ် (၄) နယ်မြေ (၄) အပိုင် ကျောက်ချောင်း ကျေးရွာ၌ ယနေ့ နံနက် အစောပိုင်းတွင် စစ်ကားလေးစီး အပြည့်ဖြင့် စစ်သား တစ်ရာကျော် ၀င်ရောက်လာပြီး အကြောင်းမဲ့ သေနတ်ဖြင့် ပစ်ခတ်ခြင်းနှင့် အပြစ်မဲ့ ဒေသခံများကို ဖမ်းဆီးခြင်းများ ပြုလုပ်ခဲ့ကြောင်း သတင်း ရရှိပါသည်။ 

“သူတို့ မနက် ၈ နာရီလောက်မှာ လိပ်ရကျေးရွာဘက်ကနေ ကျွန်တော်တို့ရဲ့ အလယ်ရွာကို ရောက်လာတာပါ။ ၀င်လာတာနဲ့ သေနတ်နဲ့ အဆက်မပြတ် ပစ်တယ်။ ရွာကို ၀ိုင်းပြီး ရွာသား ၂၀ ကျော်ကို ဖမ်းတယ်။ အမျိုးသမီး အချို့ကိုလည်း မဖွယ်မရာ လုပ်တယ်။ စစ်သားတွေ ဖမ်းထားတဲ့ လူတွေရဲ့ နာမည်တွေ အားလုံး အတိအကျ ပြောဖို့တော့ ခက်တယ်။ ဘာလို့လဲဆိုတော့ စစ်သားတွေနားကို ကျွန်တော်တို့ မသွားရဲဘူး။ အခု ကျွန်တော်တို့ တောထဲမှာပါ” ဟု ဒေသခံတစ်ဦးက RB News သို့ပြောသည်။ 

ဖမ်းဆီးခံရသူ အချို့မှာ --

(၁) ဦးရှော်မ်ရှု (ဘ) ဦးဟာဆောန်အလီ

(၂) ဦးဟာမိတ်ဟူစိန်း (ဘ) ဦးဖော်ဇော်ရ်အလီ

(၃) ဦးဟာလာမီယာ (ဘ) ဦးနာဇီရ်ဟူစိန်း

(၄) ဦးမာမတ်ဒူလ္လာ (ဘ) ဦးနူရ်မာမတ်

(၅) မော်လ၀ီ အာမီးရ်ဟူစိန်း

(၆) ဦးဂူရာမျာ

(၇) ဦးမာမတ်ဆီဒိတ် -- အပါအ၀င် (၂၀) ဦးကျော် ဖြစ်သည်။ 

ဖမ်းဆီးခံရသူများမှာ အလယ်ရွာနှင့် ဂုံးနားရွာတို့မှ ဖြစ်ကြသည်။ 

“စစ်သားတွေကတော့ အလယ်ရွာနဲ့ ဂုံးနားရွာမှာ ရှိနေသေးတယ်။ ရွာသားတွေကို မတရားဖမ်းဆီးတာတွေ၊ ရိုက်နှက် ဖမ်းဆီးတာတွေ ထပ်လုပ်မယ်လို့ ထင်ရတယ်” ဟု အခြား ဒေသခံတစ်ဦးက ပြောသည်။

“ဘာပြဿနာမှ မရှိတဲ့ ကျွန်တော်တို့ရွာမှာ လာပြီး အကြောင်းမဲ့ သေနတ် ပစ်ဖောက်တာတွေ၊ အမျိုးသမီး တွေကို မဖွယ်မရာ လုပ်တာတွေကတော့ မတရားဘူး။ သူတို့ လုပ်ချင်းတိုင်း လုပ်နေတယ်။ လူသတ်ဖို့၊ အပြစ်မဲ့တွေကို ဖမ်းဖို့၊ မုဒိမ်းကျင့်ဖို့ လိုင်စင်ရထားသလိုမျိုး လုပ်နေတယ်။ အခုလို စစ်သားတွေ ရောက်လာတာက ရွာအုပ်ချုပ်ရေးမှူး မောင်မောင်စိုးက စစ်ကြောင်းမှူးနဲ့ ဗိုလ်မှူးကို ပေးမယ်ဆိုပြီး ရွာသားတွေ ဆီက ကောက်ထားတဲ့ ငွေတွေ အားလုံးကို မပေးဘဲ သူ့အတွက် ချန်လိုက်လို့ ဖြစ်မယ်” ဟု ၎င်းက ဆက်လက်ပြောပါသည်။