နောက်ဆုံးသတင်း/ဆောင်းပါးများ

ဇီးပင်ချောင်းမှ ဒေသခံနှစ်ဦး၏ ဖုန်းများထဲသို့ နယ်ခြားစောင့်ရဲများက ဘင်္ဂလားဆင်းမ်ကဒ် ထည့်ပေးပြီး လုပ်ကြံ ဖမ်းဆီး ငွေညှစ်

RB News
25.2.2017

တောင်ပြိုလက်ဝဲ ။ ။ ရခိုင်ပြည်နယ်၊ တောင်ပြိုလက်ဝဲမြို့နယ် ဇီးပင်ချောင်း အခြေစိုက် နယ်ခြားစောင့်ရဲများက ဒေသခံနှစ်ဦး၏ အိမ်များထဲသို့ ဧည့်စာရင်းစစ်မည့် ပုံစံဖြင့် ၀င်ရောက်၍ ဖုန်းများထဲသို့ ဘင်္ဂလားဆင်းမ်ကဒ်များ လဲထည့်ကာ လုပ်ကြံဖမ်းဆီး ငွေညှစ်ခဲ့ကြောင်း သတင်းရရှိပါသည်။ 

ယနေ့ ဖေဖော်ဝါရီလ (၂၅) ရက်နေ့ နံနက် ၁ နာရီခွဲ အချိန်တွင် တောင်ပြိုလက်ဝဲမြို့၊ ဇီးပင်ချောင်း အခြေစိုက် နယ်ခြားစောင့်ရဲတပ်ဖွဲ့ စခန်းမှ နယ်ခြားစောင့်ရဲ ၁၀ ဦးသည် ဇီးပင်ချောင်းကျေးရွာအုပ်စု၊ ချောင်းကုလားရွာသို့ လာရောက်၍ ယင်းကျေးရွာမှ ဦးမာမတ်အလီ (ဘ) ဦးအလီဟူဆောင်း၏ နေအိမ်ထဲသို့ ဧည့်စာရင်း စစ်ဆေးမည့် ပုံစံဖြင့် ၀င်ရောက်၍ ဦးမာမတ်အလီ MPT Sim Card ဖြင့်သုံးနေသည့် ဖုန်းကိုယူပြီး နယ်ခြားစောင့်ရဲများက ၎င်းတို့နှင့်အတူ အသင့်ပါရှိသော Bangla Sim Card ကို ဖုန်းထဲသို့ထည့်၍ လုပ်ကြံဖမ်းဆီးခဲ့သည်။ 

ထို့နောက် ယင်းကျေးရွာမှ ဦးရာဟမတ်အူလ္လာ (ဘ) ဦးဟူဆောင်းအာမတ်၏ နေအိမ်ထဲသို့ အလားတူ ပုံစံဖြင့် ၀င်ရောက်၍ MPT Sim Card ပါ ဖုန်းနှစ်လုံးထဲသို့ Bangla Sim Card နှစ်ခုထည့်ပေးကာ ဦးရာဟမတ်အူလ္လာ ကို ဖမ်းဆီး၍ ခေါ်ဆာင်သွားခဲ့သည်။ 

နံနက်ပိုင်းတွင် ဦးမာမတ်အလီ ထံမှ ငွေကျပ် ၆ သိန်း၊ ဦးရာဟမတ်အူလ္လာ ထံမှ ငွေကျပ် ၁၂ သိန်း ညှစ်ယူ၍ ပြန်လည် လွှတ်ပေးခဲ့ကြောင်း ဒေသခံများက RB News သို့ပြောသည်။ ၎င်းတို့နှစ်ဦးကို ဖမ်းဆီးငွေညှစ်ရာတွင် တပ်ကြပ်ဇော်ဇော်ဦးလည်း ပါဝင်ခဲ့ကြောင်း သိရှိရသည်။ 

ပြည်သူ့လွှတ်တော်တွင် ဘင်္ဂလားဆင်းမ်ကဒ် သုံးသူများကို ဖမ်းဆီး အရေးယူရန် အဆိုတင်သွင်းပြီးနောက် ယခုအခါ နယ်ခြားစောင့်ရဲများက ယခင်ကဲ့သို့ ဘင်္ဂလားဆင်းမ်ကဒ်များ ထည့်သွင်းပေး၍ လုပ်ကြံ ဖမ်းဆီးကာ ငွေညှစ်နေခြင်း ဖြစ်သည်။ 




Comment ရေးရန်

Rohingya Exodus