နောက်ဆုံးသတင်း/ဆောင်းပါးများ

ကျားခေါင်းတောင်၊ ပွင့်ဖြူချောင်းမှ ဖမ်းဆီးခံထားရသူ ၂၀၀ ကျော်ကို ရှေ့နေငှားရမ်းခွင့်ပြုသော်လည်း အမှုနိုင်ရန် မလွယ်ကူ

Rohingya Eye
RB News
27.2.2017

မောင်တော ။ ။ ရခိုင်ပြည်နယ်၊ မောင်တောမြို့နယ် မြောက်ပိုင်း ကျားခေါင်းတောင်၊ ပွင့်ဖြူချောင်း စသည့် ကျေးရွာများမှ ဖမ်းဆီးခံထားရသူ ၂၀၀ ကျော်ကို ရှေ့နေငှားရမ်းခွင့် ပေးလိုက်သော်လည်း တရားလိုနှင့် သက်သေများမှာ စစ်တပ်နှင့် နယ်ခြားစောင့်ရဲတပ်ဖွဲ့ ဖြစ်နေသောကြောင့် အမှုနိုင်ရန် မလွယ်ကူဟု ရှေ့နေများက ပြောဆိုကြောင်း သတင်းရရှိပါသည်။

၂၀၁၆ ခုနှစ် နိုဝင်ဘာလ (၁၄) ရက်နေ့တွင် မောင်တောမြို့နယ် မြောက်ပိုင်း ရေတွင်းကျွန်း ကျေးရွာ၌ ကျားခေါင်းတောင်၊ ပွင့်ဖြူချောင်း အစရှိသော ကျေးရွာများမှ ရွာသားများသည် မတရားဖမ်းဆီးမှုကို ရှောင်ရှားနိုင်ရန် ခိုလှုံခဲ့ကြသည်။ ခိုလှုံနေစဉ် ယင်းနေ့တွင် စစ်တပ်က ၀န်းရံပိတ်ဆို့ပြီး အဆိုပါရွာများမှ ရွာသား ၂၀၀ ကျော်ကို ဖမ်းဆီး၍ နယ်ခြားစောင့်ရဲတပ်ဖွဲ့ ဌာနချုပ်တွင် ချုပ်နှောင်ထားခဲ့သည်။ ချုပ်နှောင်ထားစဉ် အစာရေစာ လုံလုံလောက်လောက် မပေးခဲ့သည့်အပြင် ညှဉ်းပန်းနှိပ်စက်မှု မျိုးစုံ ပြုလုပ်ခဲ့ကြောင်း ဒေသခံများက RB News သို့ပြောသည်။

ဖမ်းဆီးထားသူများအား နှစ်ပတ်ခန့်အကြာတွင် ဘူးသီးတောင်မြို့နယ်ရှိ အကျဉ်းထောင်သို့ ပို့ဆောင်ခဲ့ပြီး၊ ညှဉ်းပန်းနှိပ်စက်မှုများ ရပ်တန့်ခဲ့သော်လည်း တစ်နေ့လျှင် ထမင်းတစ်နပ်သာ ကျွေးကြောင်း၊ ကျွေးသည့် အချိန်တွင်လည်း လုံလုံလောက်လောက် မကျွေးကြောင်း သိရှိရသည်။ ၎င်းတို့အား ပဲဟင်းတစ်မျိုးတည်းဖြင့် ကျွေးခြင်းဖြစ်ပြီး၊ ကျန်းမာရေး စောင့်ရှောက်မှုလည်း လုံးဝ မရှိကြောင်း ဒေသခံများက ပြောပါသည်။

၎င်းတို့ကို ဘူးသီးတောင်မြို့နယ် အထွေထွေ အုပ်ချုပ်ရေးဦးစီးဌာန စာရေးများ၏ အဆောင်များတွင် သီးသန့် တရားရုံးအဖြစ် တရားသူကြီးများ ထိုင်၍ အမှုများကို ကြားနာစစ်ဆေးလျက် ရှိကြောင်း သိရှိရသည်။ ၎င်းတို့အား ပုဒ်မ ၃၀၂ (လူသတ်မှု)၊ ပုဒ်မ ၁၇/၁ (မတရားအသင်းအဖွဲ့ဖြင့် ဆက်သွယ်မှု)၊ ပုဒ်မ ၃၂၄ (ဘေးဖြစ်စေတတ်သော လက်နက်ဖြင့် အလိုအလျောက် နာကျင်စေမှု) စသော ပုဒ်မ ၄ ခုဖြင့် တရားစွဲဆို ထားကြောင်း၊ ယခုအခါ ရှေ့နေငှားရမ်းခွင့် ပေးထားကြောင်း သိရှိရသည်။

ယခင်က ပြစ်ဒဏ်ချခဲ့သူများကို တရားရုံးသို့ ခေါ်ဆောင်သွားခြင်း မပြုဘဲ တရားသူကြီးများက တရားခံရှိရာ နေရာများသို့ သွားရောက်၍ တရားစီရင်ချက်များကို ဖတ်ပြခဲ့ခြင်းသာ ဖြစ်ပြီး၊ မည်သူမည်ဝါအား မည်သည့် ပုဒ်ဖြင့် ပြစ်ဒဏ်မည်မျှ ချခဲ့သည်ကို မောင်တောမြို့နယ် တရားရုံးမှ အမှုလိုက် ရှေ့နေများပင် မသိရှိခဲ့ဟု ပြောဆိုကြောင်း ဖမ်းဆီးခံထားရသူ တစ်ဦး၏ မိသားစုမှ သိရှိရသည်။

အဆိုပါ ရွာသား ၂၀၀ ကျော်ကို ရှေ့နေ ငှားရမ်းခွင့် ပေးထားသော်လည်း တရားလို၊ သက်သေများမှာ စစ်တပ်နှင့် နယ်ခြားစောင့်ရဲတပ်ဖွဲ့ ဖြစ်နေသည့် အတွက် အမှုများကို နိုင်အောင် လုပ်နိုင်မည် မဟုတ်ကြောင်းကို ရှေ့နေများ ကိုယ်တိုင် သတိပေး ပြောဆိုခဲ့သည်ဟု ရှေ့နေ ငှားရမ်းရန် စီစဉ်နေသူများထံမှ သိရှိရသည်။




Comment ရေးရန်

Rohingya Exodus