ဦးရှည်ကျကျေးရွာ၌ စစ်တပ်ကော်မရှင်က မုဒိမ်းမှုများကို မှတ်တမ်းမတင်
Rohingya Eye
RB News
28.2.2017
မောင်တော ။ ။ ရခိုင်ပြည်နယ်၊ မောင်တောမြို့နယ် မြောက်ပိုင်း ဦးရှည်ကျ ကျေးရွာသို့ နယ်ခြားစောင့်ရဲတပ်ဖွဲ့မှ နယ်မြေမှူး ရောက်ရှိလာပြီး NVC ကဒ်ကိုင်ရန် ခြိမ်းခြောက်ခြင်း၊ စစ်တပ်မှ ကော်မရှင်အဖွဲ့က ဒေသခံများကို စစ်ဆေးခဲ့သော်လည်း မုဒိမ်းမှုများကို မှတ်တမ်းတင်ခြင်း မရှိကြောင်း သတင်းရရှိပါသည်။
ဖေဖော်ဝါရီလ (၂၇) ရက်နေ့တွင် မောင်တောမြို့နယ် မြောက်ပိုင်း ငါးခူရကျေးရွာ အခြေစိုက် နယ်ခြားစောင့်ရဲတပ်ဖွဲ့ နယ်မြေ (၅) မှ နယ်မြေမှူးသည် နံနက် (၉) နာရီအချိန်တွင် ဦးရှည်ကျကျေးရွာသို့ ရောက်ရှိလာပြီး ရပ်မိရပ်ဖများနှင့် အစိုးရ အလယ်တန်းကျောင်း၌ အစည်းအဝေး တစ်ရပ် ကျင်းပခဲ့သည်။
နယ်မြေမှူးက “NVC ကဒ်ကို တစ်ယောက်မကျန် ကိုင်ဆောင်ရမယ်၊ ဒီနိုင်ငံမှာနေရင် ဒီနိုင်ငံဥပဒေတွေကို လေးစားလိုက်နာရမယ်၊ NVC ကဒ်ကိုင်ဆောင်ရင် မြို့ပေါ်သွားနိုင်မယ်၊ တကယ်လို့ မကိုင်ဆောင်နိုင်ရင် ဒီနိုင်ငံမှာ နေလို့ရမှာ မဟုတ်ဘူး။ ဘင်္ဂလားဒေ့ရ်ှနိုင်ငံကို ပို့ရလိမ့်မယ်” ဟု စသည်ဖြင့် ခြိမ်းခြောက် ပြောဆိုခဲ့သော်လည်း အစည်းအဝေး တက်ရောက်သူ လူကြီးတစ်ဦးက NVC ကဒ်ယူ၍ အခွင့်အရေး ရရှိမည်ဟု မယုံကြည်ပါကြောင်း၊ ယခင်က အမျိုးသားမှတ်ပုံတင် ကိုင်ဆောင်ခဲ့ပါကြောင်း၊ အဆိုပါ ကဒ်ပြားကို သိမ်းယူ၍ မိမိတို့ သဘောဆန္ဒမပါဘဲ ယာယီသက်သေခံကဒ်ပြားများ ပေးအပ်ခဲ့ပါကြောင်း၊ ယခုယာယီကဒ်ပြားများ ရုတ်သိမ်း၍ NVC ကဒ် ကိုင်ဆောင်လျှင် အခွင့်အရေး ရလိမ့်မည် ဆိုသည်ကို အယုံအကြည် မရှိပါကြောင်း၊ မိမိတို့ အနေဖြင့် လက်မခံနိုင်ပါကြောင်း ပြောဆိုခဲ့သောကြောင့် နံနက် ၁၀ နာရီခွဲ အချိန်တွင် စိတ်ဆိုးဒေါသထွက်၍ ပြန်သွားခဲ့ကြောင်း ဒေသခံများက RB News သို့ပြောသည်။
နယ်မြေမှူး ထွက်ခွာသွားပြီးနောက် နာရီဝက်ခန့် အကြာတွင် ကာကွယ်ရေးဦးစီးချုပ်ရုံးမှ ဖွဲ့စည်းထားသည့် ဒု-ဗိုလ်ချုပ်ကြီးအေးဝင်း ဦးဆောင်သော ကော်မရှင်အဖွဲ့သည် တပ်ရင်း (၅၅၁) မှ တပ်ရင်းမှူး ဗိုလ်မှူးကျော်ဇေယျနှင့် အတူ ရောက်ရှိလာပြီး နံနက် ၁၁ နာရီမှ ညနေ ၅ နာရီထိ ရပ်ရွာလူကြီး ၁၁ ဦးနှင့် အမျိုးသမီးအချို့ကို စစ်ဆေးမေးမြန်းခဲ့ရာ မုဒိမ်းမှုများကို ကိုယ်တိုင်ကိုယ်ကျ ကြုံတွေ့ခဲ့ခြင်းကို ထွက်ဆိုသော်လည်း ကော်မရှင်အဖွဲ့က အလေးမထားသည့် အပြင် မှတ်တမ်းတင်ခြင်းပင် မရှိဟု သိရှိရသည်။
ကော်မရှင်အဖွဲ့သည် ဟန်ပြစုံစမ်းစစ်ဆေးရေးသာ လုပ်ဆောင်နေခြင်း ဖြစ်ပြီး၊ စစ်သားများ ပြစ်မှုကျူးလွန်ခြင်း မရှိဟု ငြင်းဆိုနိုင်အောင် ကြိုးစားနေခြင်းသာ ဖြစ်သည်ဟု စစ်ဆေးခံခဲ့သူတစ်ဦးက ပြောပါသည်။
