ဥဒေါင်းကျေးရွာ အုပ်ချုပ်ရေးမှူးနှင့် အဖွဲ့က ရွာသူရွာသားများထံမှ နေ့စဉ်နေ့တိုင်း ငွေညှစ်လျက်ရှိသည်ဟု ရွာသားများပြော

RB News

3.4.2017

မြင်းလွတ် ။ ။ ရခိုင်ပြည်နယ်၊ မောင်တောခရိုင်၊ မြင်းလွတ်မြို့နယ်ခွဲ၊ ဥဒေါင်းကျေးရွာအုပ်စုမှ ကျေးရွာအုပ်ချုပ်ရေးမှူးနှင့် ရာအိမ်မှူးများ ပူးပေါင်း၍ ရွာသူရွာသားများ ထံမှ ငွေညှစ်လျက်ရှိကြောင်း သတင်းရရှိပါသည်။ 

ဥဒေါင်းကျေးရွာအုပ်စုမှ ရခိုင်လူမျိုး ကျေးရွာအုပ်ချုပ်ရေးမှူးသည် ရိုဟင်ဂျာလူမျိုးများကို ရာအိမ်မှူးများ အဖြစ်ခန့်ထားပြီး ရွာကို အုပ်ချုပ်လျက် ရှိသည်။ ကျေးရွာ ရာအိမ်မှူးများထဲမှ ဇုမ္မာရွာ၏ ရာအိမ်မှူးဖြစ်သူ ဦးကော်ရီမူလ္လာ (ဘ) ဦးဘော်ဒီရာမာန်သည် ဥက္ကဌဟောင်း အပါအ၀င် (၃) ဦးကို လက်ကိုင်တုတ်များ အဖြစ် အသုံးပြု၍ ရွာသူရွာသားများကို အပြစ်မရှိ အပြစ်ရှာ၍ နည်းအမျိုးမျိုးဖြင့် ခြိမ်းခြောက်၍ ငွေညှစ်လျက် ရှိကြောင်း ရွာသားများက RB News သို့ပြောသည်။

မတ်လ (၁၉) ရက်နေ့တွင် ဥဒေါင်းမြောက်ရွာမှ အရပ်လက်သည် ဒေါ်နူရ်ဇာဟာန် (ဘ) ဦးဘာဆာမျာကို အမျိုးသမီးတစ်ဦးကို ကိုယ်ဝန်ဖျက်ချရန် ကူညီခဲ့သည်ဟု မဟုတ်မမှန် လုပ်ကြံစွပ်စွဲ ခြိမ်းခြောက်၍ အုပ်ချုပ်ရေးမှူးနှင့် အဖွဲ့က ငွေကျပ် (၆) သိန်း ညှစ်ယူထားကြောင်း၊ အလားတူ မဟုတ်မမှန် စွပ်စွဲ၍ ရွာသူရွာသားများ ထံမှ နေ့စဉ်နေ့တိုင်း ငွေညှစ်လျက် ရှိကြောင်း ဒေသခံ ရွာသားများက ပြောပါသည်။