နောက်ဆုံးသတင်း/ဆောင်းပါးများ

ပေါက်တော ဆင်တက်မော်မှ မလေးရှားနိုင်ငံသို့ စက်လှေတစ်စင်း ထွက်ခွာရန် စီစဉ်လျက်ရှိ

RB News
28.12.2017

ပေါက်တော ။ ။ ရခိုင်ပြည်နယ်၊ ပေါက်တောမြို့နယ် ဆင်တက်မော် ကျေးရွာမှ မလေးရှားနိုင်ငံသို့ လူကုန်ကူးသည့် စက်လှေတစ်စင်း ထွက်ခွာရန် စီစဉ်လျက်ရှိကြောင်း သတင်းရရှိပါသည်။

ပေါက်တောမြို့နယ် ဆင်တက်မော် ကျေးရွာတွင် ၂၀၁၂ ခုနှစ် နှောင်းပိုင်းတွင် ကျောက်ဖြူမြို့နယ်မှ လာရောက်ခိုလှုံလျက်ရှိသည့် မွတ်စလင် ဒုက္ခသည်များနှင့် စစ်တွေမြို့နယ်တွင် ဒုက္ခသည်ဘ၀သို့ ရောက်သွားသူများကို လူကုန်ကူးသည့် ပွဲစားက စည်းရုံးထားပြီး ဒီဇင်ဘာလ (၂၉) ရက်နေ့ ညပိုင်းတွင် စက်လှေ ထွက်ခွာရန် စီစဉ်ထားကြောင်း ဒေသခံတစ်ဦးက RB News သို့ပြောပါသည်။

စက်လှေဖြင့် မလေးရှားနိုင်ငံသို့ ထွက်ခွာရန် အမျိုးသား၊ အမျိုးသမီး၊ လူငယ်၊ သက်ကြီးရွယ်အို၊ ကလေးများ၊ လသားအရွယ် ကလေးငယ်များ ၁၀၀ ခန့် အသင့်ဖြစ်နေပြီး စစ်တွေမြို့မှ ၅၀ ဦးခန့် စက်လှေငယ်ဖြင့် ဆင်တက်မော်သို့ တိတ်တဆိတ် ထွက်ခွာသွားကြောင်း အဆိုပါဒေသခံကပြောပါသည်။

စက်လှေ ထွက်ခွာနိုင်ရန် အတွက် သက်ဆိုင်ရာ အာဏာပိုင်များကို ငွေကြေးပေး၍ ညှိနှိုင်းထားပြီး ဖြစ်သည့် အတွက် ဒီဇင်ဘာလ (၂၉) ရက်နေ့ ညပိုင်းတွင် စက်လှေ ထွက်ခွာရန် အသင့် ဖြစ်နေကြောင်း အဆိုပါ ဒေသခံက အတည်ပြု ပြောကြားသည်။

စက်လှေပေါ်တွင် လိုက်ပါမည့်သူများထံမှ လူကုန်ကူးသည့် ပွဲစားက ငွေကျပ် ၃ သိန်း ယူကြောင်း သိရှိရသည်။

ယခုကဲ့သို့ လူကုန်ကူးခြင်းမှာ တရားမ၀င်သည့် လုပ်ငန်း ဖြစ်သော်လည်း ဒေသဆိုင်ရာ အာဏာပိုင်များက လာဘ်ငွေယူထားသောကြောင့် ရပ်တန့်ပေးမည် မဟုတ်သဖြင့် ပြည်နယ်အစိုးရနှင့် ပြည်ထောင်စုအစိုးရတို့မှ လူကုန်ကူးခံရမည့်သူများကို ကယ်တင်ပေးစေလိုကြောင်း အဆိုပါ ဒေသခံက ဒေသခံများ ကိုယ်စား ပြောသည်ဟု ဆိုသည်။




Comment ရေးရန်

Rohingya Exodus