မောင်တော ရွှေဇားကျေးရွာမှ ရိုဟင်ဂျာနေအိမ် (၈) လုံး မီးရှို့ခံရ
MYARF
RB News
31.1.2018
မောင်တော ။ ။ ယနေ့ ဇန်န၀ါရီလ (၃၁) ရက်နေ့ နံနက် ၁ နာရီခန့် အချိန်တွင် ရခိုင်ပြည်နယ်၊ မောင်တောမြို့နယ် ရွှေဇားကပ္ပကောင်းကျေးရွာအုပ်စု ကမ်းပိုင်းနားရွာမှ ရိုဟင်ဂျာနေအိမ် (၈) အိမ် မီးရှို့ခံခဲ့ရကြောင်း သတင်းရရှိပါသည်။
ဇန်န၀ါရီလ (၃၀) ရက်နေ့ ည ၉ နာရီကျော် အချိန်မှစ၍ နယ်ခြားစောင့်ရဲတပ်ဖွဲ့၏ ကင်းလှည့်ကား နှစ်စီးသည် ရွှေဇားအုပ်စု တစ်ခုလုံး လမ်းကြားပါမကျန် လှည့်ပတ်ခဲ့ပြီး နံနက် ၁၂ နာရီခွဲခန့်တွင် ပြန်လည် ထွက်ခွာသွားခဲ့သည်။ ၎င်းတို့ ထွက်ခွာသွားပြီး ခဏအကြာတွင် ပေါက်ကွဲသံတစ်ခုပမာ အသံတစ်ခုကြားခဲ့ရပြီး၊ အသံကြားရသည်နှင့် တစ်ပြိုင်နက် နေအိမ်များ မီးလောင်နေသည်ကို တွေ့မြင်ခဲ့ရကြောင်း ရွာသားတစ်ဦးက RB News သို့ပြောသည်။
“ကျွန်တော်တို့ ထင်တာကတော့ အဲဒီနယ်ခြားစောင့်ရဲတပ်ဖွဲ့ရဲ့ ကင်းလှည့်ကားတွေ ပြန်ပြန်ချင်း ဆိုင်ကယ် နှစ်စီး ရွာထဲဝင်လာတာလာ ကြားလိုက်တယ်။ ပုဒ်မ ၁၄၄ ရှိနေတော့ အပြင်ထွက်ပြီး မကြည့်ရဲကြဘူး။ သိပ်မကြာဘူး အဲဒီဆိုင်ကယ်တွေ ပြန်ထွက်သွားတာလည်း ကြားရတယ်။ ထွက်သွားပြီး ၅ မိနစ်တောင် မကြာလိုက်ဘူး၊ အိမ်တွေ မီးလောင်နေတာကို မြင်လိုက်ရတယ်” ဟု အဆိုပါ ရွာသားက ဆက်လက်ပြောပါသည်။
ကမ်းပိုင်းနားရွာနှင့် ကပ်လျက် တည်ရှိနေသည့် ကင်ဘဲရွာသား တစ်ဦးက “မနေ့က ည ၁၂ နာရီကျော်မှာ ဆိုင်ကယ်နှစ်စီး လူ ၄ ယောက် ရောက်လာပြီး လမ်းဘေးက အိမ်တစ်အိမ်ကို မီးရှို့တယ်၊ မီးစွဲတာနဲ့ အိမ်ရှင်က မြင်လိုက်တော့ အိမ်နီးချင်းတွေကို အော်ဟစ် အကူအညီတောင်းတယ်၊ အဲဒီဆိုင်ကယ်နဲ့ ရောက်လာသူတွေ ပြေးသွားတာကို မြင်လိုက်ရတယ်” ဟု ပြောသည်။
မီးရှို့မှုကြောင့် မီးလောင် ပျက်စီးသွားသည့် နေအိမ်များမှာ --
(၁) ဦးလေးရူး
(၂) ဦးနူရ်အစ္စလာမ်
(၃) ဦးအာဘူကာလာမ်
(၄) ဦးနူရုလ်ဟောက်
(၅) ဦးရော်ရှိတ်
(၆) ဦးနူရ်ဟာဆောင်း
(၇) ဦးရာမတ်အူလ္လာ
(၈) ဦးအီဗြာဟိမ်း -- တို့၏ နေအိမ်များ ဖြစ်ကြသည်။
