ဘူးသီးတောင် ပြိုင်းတောင်ကျေးရွာကို နယ်ခြားစောင့်ရဲ၊ မ.က.ဖ နှင့် စစ်သားများက ၀န်းရံ ပိတ်ဆို့ စစ်ဆေး
MYARF
RB News
22.7.2018
ဘူးသီးတောင် ။ ။ ရခိုင်ပြည်နယ်၊ ဘူးသီးတောင်မြို့နယ် တောင်ပိုင်း ညောင်ချောင်း နယ်ခြားစောင့်ရဲတပ်ဖွဲ့မှ နယ်ခြားစောင့်ရဲများနှင့် မ.က.ဖ အဖွဲ့ဝင် (၅၀) ဦးခန့်နှင့် စစ်သား (၅၀) ဦးခန့်တို့သည် ပြိုင်းတောင်ကျေးရွာကို ၀န်းရံပိတ်ဆို့ စစ်ဆေးခဲ့သည်။
ညောင်ချောင်း နယ်မြေ နယ်ခြားစောင့်ရဲတပ်ဖွဲ့မှ နယ်ခြားစောင့်ရဲများနှင့် မ.က.ဖ အဖွဲ့ဝင် (၅၀) ဦးခန့်နှင့် ဘူးသီးတောင်မြို့နယ် တောင်ပိုင်းတွင် လုံခြုံရေးတာဝန်ထမ်းဆောင်နေသည့် စစ်ကြောင်းမှ စစ်သား (၅၀) ဦးခန့်တို့သည် ဇူလိုင်လ (၂၀) ရက်နေ့ နေထွက်ချိန်ခန့်တွင် ပြိုင်းတောင်ကျေးရွာသို့ ရောက်ရှိလာပြီး စစ်သားများက ရွာအပြင်ဘက်မှ ၀န်းရံပိတ်ဆို့ထားပြီး နယ်ခြားစောင့်ရဲ အချို့က ခွဆုံနှင့် အချက်အချာကျသော နေရာတွင် နေရာယူထားခဲ့သည်။
ကျန်သည့် နယ်ခြားစောင့်ရဲအချို့နှင့် မ.က.ဖ အဖွဲ့ဝင်များက ရိုဟင်ဂျာနေအိမ် (၅) အိမ်သို့ ၀င်ရောက်၍ အိမ်သူအိမ်သားများကို အိမ်ထောင်စုလူဦးရေစာရင်းနှင့် အညီ စစ်ဆေးခဲ့ပြီး၊ နေအိမ်များအတွင်း ရှာဖွေ စစ်ဆေးခဲ့သည်။
ထို့နောက် နယ်ခြားစောင့်ရဲများနှင့် မ.က.ဖ အဖွဲ့ဝင်များသည် အာရ်ဗီစာသင်ကျောင်းတွင် နေရာယူပြီး၊ ရွာသားများကို အိမ်ထောင်စုလူဦးရေစာရင်းနှင့်အတူ အာရ်ဗီစာသင်ကျောင်းသို့ ဆင့်ခေါ်ခဲ့သည်။ ယင်းအာရ်ဗီစာသင်ကျောင်းတွင် မိသားစုတစ်စုချင်းစီကို အိမ်ထောင်စုလူဦးရေစာရင်းနှင့် တိုက်ဆိုင်စစ်ဆေးခဲ့ကြောင်း ဒေသခံများက RB News သို့ပြောပါသည်။
နယ်ခြားစောင့်ရဲများ၊ မ.က.ဖ အဖွဲ့ဝင်များနှင့် စစ်သားများ ရွာထဲသို့ မရောက်လာမှီ ကျေးရွာအတွင်းမှ လယ်သမားအချို့နှင့် ငါးဖမ်းသမားအချို့သည် ၎င်းတို့၏ လုပ်ငန်းခွင်သို့ ရောက်နှင့်သွားပြီး ဖြစ်သောကြောင့် စစ်ဆေးနေစဉ် ရွာထဲသို့ ပြန်ဝင်လာ၍ စစ်ဆေးခံနိုင်ခြင်း မရှိခဲ့ပေ။
စစ်ဆေးစဉ် စစ်ဆေးခံရန် ပျက်ကွက်ခဲ့သည့် လယ်သမားများနှင့် ငါးဖမ်းသမားများနှင့် ပတ်သက်၍ မ.က.ဖ အဖွဲ့ဝင်များက မေးမြန်းရာ မိသားစုဝင်များက လုပ်ငန်းခွင်သို့ ရောက်နေကြောင်း ရှင်းပြသော်လည်း မ.က.ဖ အဖွဲ့ဝင်များက ခရီးလွန်၊ မတွေ့ရှိဟု မှတ်တမ်းတင်ယူသွားခဲ့သည်။ အိမ်ထောင်စုလူဦးရေစာရင်းတွင် မည်သို့မျှ မှတ်သားခြင်း မရှိသော်လည်း လုပ်ငန်းခွင်သို့ ရောက်ရှိနေသည်ကို ခရီးလွန်ဟု မှတ်တမ်းတင်သွားသောကြောင့် မိသားစုဝင်များက စိုးရိမ်ပူပန်လျက်ရှိနေကြသည်။
ထို့နောက် စစ်သားများနှင့် နယ်ခြားစောင့်ရဲများသည် ပြိုင်းတောင်ကျေးရွာအုပ်စု ဒိုင်းနက်ရွာရှိ ဗုဒ္ဓဘာသာ ဘုန်းကြီးကျောင်းကို ၀င်ရောက်စစ်ဆေးခဲ့သည်။ ယင်းဘုန်းကြီးကျောင်းတွင် ၂၀၁၂ ခုနှစ်၌ တရားမ၀င် သိုလှောင်ထားသည့် သေနတ် ၃၅ လက်ခန့် ဖမ်းဆီးရမိခဲ့သောကြောင့် ၀င်ရောက် စစ်ဆေးခြင်း ဖြစ်နိုင်သည်ဟု ဒေသခံများကဆိုသည်။
နံနက် ၁၁ နာရီခန့်တွင် နယ်ခြားစောင့်ရဲများ၊ မ.က.ဖ အဖွဲ့ဝင်များနှင့် စစ်သားများသည် သိမ်တောင်ပြင် ကျေးရွာဘက်သို့ ထွက်ခွာသွားပြီး၊ သိမ်တောင်ပြင်ကျေးရွာတွင် နေ့လည်စာ သုံးဆောင်ကာ နယ်မြေစခန်းသို့ ပြန်လည် ထွက်ခွာသွားကြောင်း သိရသည်။
ပြိုင်းတောင်ကျေးရွာအုပ်စုတွင် ယခင်က အိမ်ခြေ ၂၅၀ ခန့်ရှိခဲ့ပြီး ယခုအခါ အိမ်ခြေ ၁၀၀ ကျော်သာ ကျန်ရှိတော့သည်။
