လူကုန်ကူးမှုနှင့် မူးယစ်ဆေးဝါး နှိမ်နင်းရေးမှ ရဲများက အပြစ်မဲ့ ဒေသခံများထံမှ ငွေညှစ်

သြဂုတ်လ (၆) ရက်နေ့ ညနေ ၄ နာရီအချိန်တွင် ပေါင်းဇားရွာသို့ ပြန်နေသည့် ဦးနုရ်ဟာဖီးဇ် (ဘ) ဦးဟာမိတ်ဟူစိန်း (အသက် ၃၅ နှစ်) ကို ရွှေဇားတံတားအနီး၌ လူကုန်ကူးမှုနှင့် မူးယစ်ဆေးဝါး နှိမ်နင်းရေး အဖွဲ့မှ ရဲတပ်ဖွဲ့ဝင်များက “မင်း ဘင်္ဂလားဒေ့ရ်ှသွားတာ ငါတို့သိတယ်၊ ဒုက္ခမရောက်ချင်ရင် ငါတို့ကို ငွေ ဘယ်လောက် ပေးနိုင်မလဲပြော” ဟု အခြေအမြစ်မရှိ စွပ်စွဲပြီးနောက် နည်းမျိုးစုံဖြင့် ခြိမ်းခြောက်၍ ငွေကြေး အမြောက်အမြား တောင်းခံခဲ့သည်။ အပြစ်မဲ့ဖြစ်သည့် ဦးနုရ်ဟာဖီးဇ်လည်း ဖမ်းဆီးမခံရရေးအတွက် နောက်ဆုံးတွင် ၎င်းတွင်ပါရှိသည့် ငွေကျပ် သုံးသောင်း ပေးခဲ့ရကြောင်း ဒေသခံတစ်ဦးက RB News သို့ပြောပါသည်။

အလားတူ သြဂုတ်လ (၁) ရက်နေ့ နေ့လည်ပိုင်းတွင် အဆိုပါ ရဲတပ်ဖွဲ့ဝင်များသည် ရွှေဇားကျေးရွာအုပ်စု၊ စေတီပြင်ဈေးတွင် လဘက်ရည်ဆိုင်ထိုင်နေသည့် ဦးဒိလ်မိုဟာမတ် (ဘ) ဦးဇာဟိတ်ဟူစိန်း (အသက် ၃၅ နှစ်) ကို အကြောင်းမဲ့ ဖမ်းဆီးခေါ်ဆောင်သွားပြီး အမျိုးမျိုး ခြိမ်းခြောက်၍ ငွေကျပ် နှစ်သိန်း ညှစ်ယူ၍ ပြန်လည် လွှတ်ပေးခဲ့သည်။

ဇူလိုင်လ (၂၇) ရက်နေ့တွင် အဆိုပါရဲတပ်ဖွဲ့ဝင်များသည် ရွှေဇားနှင့် လှဘော်ဇား ကြားရှိ တံတားအနီးတွင် လှဘော်ဇား ရွာသား ဦးဂျာဘဲဒ် (အသက် ၃၀ နှစ်) ကို “မင်းအဖေ ဘင်္ဂလားဒေ့ရှ် သွားတာ ငါတို့သိတယ်၊ ဒုက္ခမရောက်ချင်ရင် ငါတို့ကို ငွေ ၁၀ သိန်း ပေးရမယ်” ဟု ပြောဆို စွပ်စွဲ၍ ခြိမ်းခြောက်ကာ ငွေကျပ် (၅) သိန်း ညှစ်ယူခဲ့သည်။

ထို့အပြင် ပေါင်းဇားကျေးရွာတွင် အာဏာပိုင်များ၏ လက်ကိုင်တုတ်တစ်ဦး ဖြစ်သည့် မိုဟာမတ်အာလောမ် (ဘ) ဦးမိုဟာမတ်အစ္စလာမ် (အသက် ၄၅ နှစ်) သည် ကျေးရွာအုပ်ချုပ်ရေး၊ နယ်ခြားစောင့်ရဲတပ်ဖွဲ့တို့နှင့် ရင်းနှီးသည်ကို အခွင့်ကောင်းယူ၍ ရွာသားများကို နည်းမျိုးစုံဖြင့် ဒုက္ခပေးလျက်ရှိသည်။ မဟုတ်မမှန် သတင်းများ ဖန်တီး၍ နယ်ခြားစောင့်ရဲများနှင့် ပူးပေါင်း၍ အပြစ်မဲ့ ရွာသားများထံမှ ငွေညှစ်လျက် ရှိသည့်အပြင် လွန်ခဲ့သည့် တစ်လခွဲခန့်က တစ်ဖက်နိုင်ငံတွင် ဒုက္ခသည်ဘ၀ဖြင့် ခိုလှုံနေသည့် လုပ်အားပေးကျောင်းဆရာ ဦးဆားဘဲရ် (ယခင် ဘူးသီးတောင်တွင် နေထိုင်သူ) ပိုင်ဆိုင်သည့် နှစ်ထပ်အိမ်ကို မိုဟာမတ်အာလောမ်က ဖျက်ဆီး၍ သစ်သားများကို ၎င်း၏ တူ ဖြစ်သူ အုစ်မာန်ဂေါ်နီ (ဘ) ဦးအစ္စမိုင်လ် (အသက် ၂၅ နှစ်) အား အိမ်ဆောက်ရန် ပေးလိုက်ကြောင်း ဒေသခံများက RB News သို့ပြောပါသည်။ 

လွန်ခဲ့သည့်နှစ် စက်တင်ဘာလက နယ်ခြားစောင့်ရဲများ ရွာထဲသို့ လာရောက်၍ ရွာသားများအား လူနေအိမ် (၅) လုံးကို အကြောင်းမဲ့ ဖျက်ဆီးခိုင်းခဲ့ကြောင်း သိရသည်။