ငှက်ကလေးသို့ (၂)
 |
| (ဓါတ်ပုံ - ရိုက်တာ) |
ငှက်ကလေးသို့ (၂)
ရေးသားသူ - ယျာတင်(MYARF)RB ကဗျာ
17.12.2014
ဖိနှိပ်ခံဆုံး သတ္တဝါတို့၏
လွတ်မြောက်ရေးကို ရှေးရှုလျက်နှင့်
အဆုံးအဆမဲ့ ကောင်းကင်ပေါ်ဝယ်
တောင်ပံခတ်၍ ပျံသန်းနေချိန်
မုန်တိုင်းသင့်လို့ လမ်းခရီးကြမ်းလည်း
အသင်ငှက် ...
စိတ်ဓာတ်ကျ၍ နောက်မဆုတ်နှင့် ...။
ဝေးဝေးဌာနေ မျက်ကွယ်ရာမှာ
အားပေးနေသူများ အမြဲရှိနေတာ
ငှက်ကလေး သိပါစေသား ...။
ရက်စက်ကြမ်းကြုတ် မျိုးတုံးခံလု
ထိုလိုသတ္တဝါများ နလှန်ထူဖို့
ကိုယ်ရောစိတ်ပါ အသင်မနား
ပျံသန်းရာအရပ် ကောင်းကင်ပေါ်ဝယ်
လျှပ်စီးလက်လို့ မိုးကြိုးပစ်လည်း
ဖြန့်ကြဲပြီးတဲ့ အတောင်ပံကို
ကြောက်စိတ်ငြိလို့ ပြန်မကျူံးနှင့် ...။
စေတနာမှန်လျှင် မိုးကြိုးနှင့်လွှဲစေ
မမြင်နိုင်တဲ့ ဝှက်တစ်နေရာမှာ
ဆုမွန်ခြွေသူများ အသင့်ရှိနေတာ
ငှက်ကလေး သိပါစေသား ...။
လူသားမဆန် နှိပ်စက်ခံနေ
အားကိုးရာမဲ့ လူနည်းစုအတွက်
တန်းတူအခွင့် တကယ်ရဖို့
တိုက်ပွဲဝင်ရာ ကောင်းကင်အရပ်မှာ
မိုးတိမ်ထူလို့ ပျံသန်းခက်ချိန်
စိုက်ထားတဲ့အား ပြန်မရုပ်နှင့် ...။
အသင်ငှက် ...
ထူတဲ့မိုးတိမ် မာန်ဖြင့်တိုးပေါက်
နောက်မဆုတ်ဘဲ ရှေ့သို့သာလျှောက်
အေးဒဏ်ခံလည်း မပူပါနှင့် ...
ကမ္ဘာခြားလည်း နီးနီးမှာသာ
အနွေးဓာတ်ရှင်များ အမြဲ ရှိနေတာ
ငှက်ကလေး သိပါစေသား ...။
ခုခံရာမဲ့ လောကအလယ်
အားကိုးစရာမဲ့ ဟစ်လို့ငိုကြွေး
ထိုငိုသံများ တိတ်စေဖို့ရာ
တောင်ပံအကုန် ရှိသမျှဖွင့်
အားမာန်အပြည့် ရွက်အကုန်လွင့်
ခက်ခဲလွန်းတဲ့ ခရီးကြမ်းကို
အသင်ငှက် ...
နောက်မဆုတ်တမ်း ရင်ဆိုင်ဖြေရှင်း
သံမဏိစိတ်ဖြင့် ရှေ့သို့လှမ်းချီ
ဦးမော့ရင်ကော့ ရည်မှန်းချက်ဆီ
ကြာနိုင်ပေမယ့် မလွဲရောက်မည်
ပန်းတိုင်နီးမည့် ထိုတစ်နေ့၌
ဂုဏ်ပြုသြဘာ လက်ခုပ်သံများ
တစ်လောကလုံး ဟိန်းသွားပြီး၍
ဘဝဂ်ထိတိုင် ပျံနှံသွားအောင်
လက်ခုပ်တီးရန် အာခဲသူများ
စိတ်ကြွကိုယ်ကြွ စောင့်ဆိုင်းနေတာ
အိုး ငှက်ကလေး ...
အသင်သိပါစေသား ...။
*** အမျိုးသမီး အခွင့်အရေး လှုပ်ရှားသူ မဝေဝေနု၏ ၁၇၊၁၂၊၂၀၁၄ ရက်နေ့တွင် ကျရောက်သော (၂၈) နှစ်မြောက် မွေးနေ့ကို ဂုဏ်ပြု၍ ရေးဖွဲ့ပါသည်။
