စစ်သားများက အသက် ၁၅ နှစ်အောက် ကလေးများကိုပင် ဖမ်းဆီး၍ ငွေညှစ်လျက်ရှိ
MYARF
RB News
19.12.2014
မောင်တော ။ ။ ရခိုင်ပြည်နယ်၊ မောင်တောမြို့နယ် ကျောက်ပြင်ဆိပ် ကျေးရွာမှ လူငယ် နှစ်ဦးနှင့် အသက် ၁၅ နှစ် အောက်ကလေး ငါးဦးကို အမှတ် (၆) နယ်မြေ လက်အောက်ခံ စစ်တပ် စခန်းမှ စစ်သားများက ဖမ်းဆီး၍ လူငယ် နှစ်ဦးကို ငွေညှစ်၍ ပြန်လည် လွှတ်ပေး ခဲ့သော်လည်း၊ ကျန်သည့် ကလေး ငါးဦးအနက် သုံးဦး ထံမှ ငွေညှစ်ရန် ကြိုးစားလျက် ရှိပြီး၊ နှစ်ဦးကို ဖမ်းဆီး ခေါ်ဆောင် သွားကြောင်း သတင်း ရရှိပါသည်။
ဒီဇင်ဘာလ (၁၈) ရက်နေ့ ညနေ ၅ နာရီ အချိန်တွင် မောင်တောမြို့နယ် အမှတ် (၆) နယ်မြေ လက်အောက်ခံ စစ်တပ် စခန်းမှ စစ်သား နှစ်ဦးသည် အရပ်ဝတ် များဖြင့် ကျောက်ပြင်ဆိပ် ကျေးရွာ အုပ်စု၊ အရှေ့ရွာသို့ ရောက်ရှိလာပြီး၊ ဖုန်းဆင်းမ်ကဒ် မပါသည့် ဖုန်းများဖြင့် သီချင်း နားထောင် နေသော အဒူရာဇတ် (ဘ) ဦးဖော်ဇောလ်အာမတ် (အသက် ၂၅ နှစ်) နှင့် ဆော်ဒါန်ဟူစိန်း (ဘ) ဦးအော်လီအာမတ် (အသက် ၂၂ နှစ်) တို့ကို ဘင်္ဂလား ဆင်းမ်ကဒ်ဖြင့် ဖုန်းသုံးနေသည်ဟု လုပ်ကြံ စွပ်စွဲ၍ ဖမ်းဆီး ခေါ်ဆောင် သွားခဲ့သည်။
ဖမ်းဆီးခံရသည့် လူငယ် နှစ်ဦးကို စစ်သားများက စခန်းသို့ ခေါ်ဆောင် သွားပြီး လူမဆန်စွာ ရိုက်နှက်၍ ငွေကျပ် ၆ သိန်း တောင်းရာ၊ လူငယ်နှစ်ဦးမှာ ငွေကြေး တတ်နိုင်သည့် မိသားစုများမှ မဟုတ်သဖြင့် ရွာသားများက စုပေါင်း၍ ငွေကျပ် ၄ သိန်း ငါးသောင်း ကိုစစ်သားများ လက်ထဲသို့ ပေးခဲ့သော်လည်း၊ စစ်သားများက ကျန်သည့် ငွေကျပ် တစ်သိန်း ငါးသောင်း အတွက်ဟု ဆိုကာ ထပ်မံ၍ တစ်ညလုံး ရိုက်နှက် ညှဉ်းပန်း နှိပ်စက်ပြီး ဒီဇင်ဘာလ (၁၉) ရက်နေ့ နံနက် ၉ နာရီတွင် ပြန်လည် လွှတ်ပေး ခဲ့ကြောင်း ဒေသခံ တစ်ဦးက RB News သို့ပြောပါသည်။
အလားတူ ဒီဇင်ဘာလ (၁၈) ရက်နေ့ ည ၉ နာရီ အချိန်တွင် စစ်သား ၂၀ ဦးခန့် ထပ်မံ ရောက်ရှိလာပြီး ရွာထဲတွင် ဂိမ်း ကစားနေသည့် ၁၅ နှစ်အောက် ကလေး ၅ ဦးကို ဖမ်းဆီးပြီး ကျေးရွာ အုပ်ချုပ်ရေးမှူး ရုံးသို့ ခေါ်ဆောင် သွားခဲ့သည်။ ထို့နောက် စစ်သားများက အုပ်ချုပ်ရေးမှူး ထံကလေး ၃ ဦးကို အပ်နှံခဲ့ပြီး ငွေကျပ် ၅ သိန်း ယူထားရန် မှာကြားပြီး၊ ကျန်သည့် ကလေး ၂ ဦးကို စခန်းရှိ ဗိုလ်ကြီးထံ သတင်းပို့ပြီး ဖြစ်နေ၍ ခေါ်ဆောင် သွားရမည်ဟု ဆိုကာ ဖမ်းဆီး ခေါ်ဆောင် သွားကြောင်း ဒေသခံများက ပြောပါသည်။
ကျေးရွာ အုပ်ချုပ်ရေးမှူး ရုံးခန်းတွင် အပ်နှံခံရသည့် ကလေး (၃) ဦးမှာ --
(၁) မော်န်ဇူရ် (ဘ) ဦးဒေါလ်လာ
(၂) ရှာဘာတုလ္လာ (ဘ) ဦးဇာဖောရ်ဟူစိန်း
(၃) မောင်နှမ ကျေးရွာမှ နွားကျောင်းသား တစ်ယောက် -- တို့ဖြစ်သည်။ ၎င်းတို့ (၃) ဦးက ငွေကျပ် ၅ သိန်းကို ကျေးရွာ အုပ်ချုပ်ရေးမှူး ထံပေးနိုင်မှသာ ပြန်လည် လွတ်မြောက် လာမည် ဖြစ်ကြောင်း ဒေသခံများက ပြောပါသည်။
စခန်းသို့ ဖမ်းဆီး ခေါ်ဆောင် သွားသော ကလေးငယ် နှစ်ဦးမှာ --
(၁) ရာမတ်ကော်ရီးမ် (ဘ) ဦးမာမတ်ဆော်လာမ်
(၂) ဟာလာယာ (ဘ) ဦးအုမောရ်ဟာမ်ဇာ -- တို့ဖြစ်ကြောင်း သိရှိရပါသည်။
