ရွက်ညိုတောင် စခန်း (၁၂) မှ ဗိုလ်မှူးက အာဏာ အလွဲ သုံးစား ပြုလုပ်၍ ငွေညှစ်လျက်ရှိ
MYARF
RB News
17.1.2015
မောင်တော ။ ။ ရခိုင်ပြည်နယ်၊ မောင်တောမြို့နယ် ရွက်ညိုတောင် ကျေးရွာ အခြစိုက် စစ်စခန်း အမှတ် (၁၂) မှ ဗိုလ်မှူးသည် အာဏာ အလွဲသုံးစား ပြုလုပ်၍ ဒေသခံ ရိုဟင်ဂျာ များထံမှ နည်းအမျိုးမျိုးဖြင့် ငွေညှစ်လျက် ရှိကြောင်း သတင်း ရရှိပါသည်။
မောင်တောမြို့နယ် မြောက်ပိုင်း ရွက်ညိုတောင် ကျေးရွာ အခြေစိုက် စစ်တပ် စခန်းအမှတ် (၁၂) မှ ဗိုလ်မှူး တစ်ဦးနှင့် ၎င်း၏ တပည့် ဖြစ်သူ တို့သည် ဇန်န၀ါရီလ (၁၆) ရက်နေ့ နံနက် ၁၁း၃၀ နာရီတွင် ကျားခေါင်းတောင် ကျေးရွာသို့ ၀င်ရောက်၍ မိမိ၏ ခြံဝင်း အတွင်းမှ သရက်ပင် တစ်ပင် ခုတ်လှဲနေသည့် ဦးဆော်ယာဒူလ်ဘော်ရှော်ရ် (ဘ) ဦးအာလ်တာဟူစိန်းကို အပင်ခုတ်ရန် ခွင့်ပြုချက် မယူဟု ဆိုကာ ငွေကျပ် ၇၀၀၀/- ညှစ်ယူခဲ့သည်။ ထို့နောက် မွန်းတည့် ၁၂ နာရီ အချိန်တွင် ရေခဲချောင်း ခွဆုံးရွာသို့ ၀င်ရောက်ပြီး ကွမ်းယာဆိုင်တွင် ကွမ်းဝယ်နေသည့် ရွာသား နှစ်ဦး ဖြစ်သည့် ဦးဆော်လီမုလ္လာ (ဘ) ဦးဖေရာန်အလီ (ငါးရောင်း) နှင့် ဦးနူရ်ဟာန် တို့ကို ခေါ်၍ ဘင်္ဂလား ဖုန်းရှိသည်ဟု စွပ်စွဲ၍ ရှာဖွေ ခဲ့သည်။ မည်သည့် ဖုန်းမှ မတွေ့ရှိသော်လည်း ဆိုင်ထဲတွင် ဖွက်ထားခဲ့သည်ဟု ဆိုကာ အမျိုးမျိုး ခြိမ်းခြောက်၍ အဆိုပါ ရွာသား နှစ်ဦးထံမှ ငွေကျပ် နှစ်သိန်း ငါးသောင်း ညှစ်ယူ ခဲ့ကြောင်း ဒေသခံ တစ်ဦးက RB News သို့ပြောပါသည်။
ယင်းနေ့ နေ့လည် တစ်နာရီ အချိန်တွင် ရေခဲချောင်း ခွဆုံရှိ ဈေးသို့ ၀င်ရောက်ပြီး ဈေးခေါင်း ဖြစ်သူ ဦးမိုဟာမတ် အာယုဖ် (ဘ) ဦးမုစ်တာဖာကမာလ်ကို ဈေးဆိုင် တစ်ဆိုင်မှ အားကစား ၀တ်စုံ တစ်စုံ ၀ယ်ခိုင်း၍ ကျသင့်ငွေကို ဈေးခေါင်း ဖြစ်သူအား ရှင်းခိုင်းခဲ့ကြောင်း သိရသည်။
၎င်းဗိုလ်မှူးသည် နေ့စဉ် နေ့တိုင်း ရွာများ အတွင်းသို့ ၀င်ရောက်၍ ဒေသခံ ရိုဟင်ဂျာ များထံမှ မတရားသဖြင့် ငွေညှစ်ခြင်းများ ပြုလုပ်လျက် ရှိသည်ဟု ဆိုသည်။
ယခင်က နယ်ခြားစောင့် ရဲများသာ ညှဉ်းပန်း နှိပ်စက်၊ ငွေညှစ်သော်လည်း ယခုအခါ တပ်မတော်သား များပါ နယ်ခြားစောင့် ရဲများကဲ့သို့ပင် ဆိုးသွမ်း လာသည်ကို တွေ့ရသည်။ မောင်တောမြို့နယ် အမှတ် (၂) နယ်မြေရှိ တပ်ရင်း (၅၆၄) မှ ဗိုလ်ကြီး အောင်ဖုန်းလှိုင် နှင့် အဖွဲ့က ဒေသခံ ရိုဟင်ဂျာများ အိမ်တွင် မွေးမြူထားသည့် ကြက်၊ ဘဲ၊ ဆိတ်များကို ဤရက်ပိုင်းအတွင်း ဖမ်းဆီး လုယက် သွားကြောင်း ဒေသခံ တစ်ဦးက RB News သို့ပြောပါသည်။
