တောင်ဘဇား နယ်ခြားစောင့် ရဲများက အပြစ်မဲ့ ဒေသခံ ကင်းသမား များကို ဖမ်းဆီး ရိုက်နှက်

ဘူးသီးတောင် ။ ။ ရခိုင်ပြည်နယ်၊ ဘူးသီးတောင် မြို့နယ် တောင်ဘဇား အခြေစိုက် နယ်ခြားစောင့် ရဲတပ်ဖွဲ့မှ ရဲများသည် အပြစ်မဲ့ ဒေသခံ ကင်းသမား များကို ဖမ်းဆီး၍ ရိုက်နှက် ခဲ့ကြောင်း သတင်း ရရှိပါသည်။

ဖေဖော်ဝါရီလ (၃) ရက်နေ့ ည ၁၀ နာရီ အချိန်တွင် တောင်ဘဇား နယ်ခြားစောင့် ရဲတပ်ဖွဲ့ ကင်းစခန်းမှ ကင်းစခန်းမှူးနှင့် တပ်ဖွဲ့ဝင် (၃) ဦးတို့သည် ငါးရန့်ချောင်း ကျေးရွာ အုပ်စု၊ ကျီးနှုတ်သီးရွာ (၁၃) ရပ်ကွက်တွင် ကင်းစောင့် နေသော ဒေသခံ ရွာသား ကင်းသမား များကို အကြောင်းမဲ့ လူမဆန်စွာ ရိုက်နှက်၍ ဖမ်းဆီး ခေါ်ဆောင် သွားခဲ့သည်။ အဆိုပါ ကင်းစခန်းမှူးသည် ညပိုင်း အချိန်တွင် ရွာထဲသို့ ၀င်ရောက် ဤကဲ့သို့ မကြာခဏ ပြုလုပ်လေ့ ရှိပြီး၊ ညနေပိုင်းများ အမျိုးသမီးများ ရေခပ်ဆင်းချိန်တွင်လည်း ကိုယ်ထိ လက်ရောက် စော်ကားမှုများ ပြုလုပ်လေ့ ရှိသည်ဟု ဒေသခံများက RB News သို့ပြောပါသည်။

ဖမ်းဆီးခံရသည့် ကင်းသမား (၃) ဦးမှာ --

(၁) ဦးမာမတ်နူရ် (ဘ) ဦးနူရ်မာမတ် (အသက် ၃၀ နှစ်)
(၂) ဦးဇာဖောရ်အုလ္လာ (ဘ) ဦးအေဇာရ်မျာ (အသက် ၃၈ နှစ်)
(၃) ဦးဟာဘီအုလ္လာ -- တို့ဖြစ်သည်။

အလားတူ ဖေဖော်ဝါရီလ (၁) ရက်နေ့ကလည်း နယ်ခြားစောင့် ရဲကင်း စခန်းတွင် ချက်ပြုတ်ပေးသူ ဦးဟာဖီးဇ်အာမတ် (အသက် ၄၀ နှစ်) ကို ကင်းစခန်းမှူးက ရွာထဲမှ မိန်းမပျို တစ်ဦး ရှာပေးရန် ပြောဆိုခဲ့ရာ ဦးဟာဖီးဇ်အာမတ်က ရှာမပေးနိုင်ကြောင်း ပြန်လည် ပြောဆိုသဖြင့် လူမဆန်စွာ ရိုက်နှက်၍ နှစ်ရက်တိတိ ချုပ်နှောင် ထားခဲ့ကြောင်း သိရသည်။

ဖေဖော်ဝါရီလ (၃) ရက်နေ့က ဖမ်းဆီးခဲ့သည့် ကင်းသမားများကို ယနေ့ ဖေဖော်ဝါရီလ (၅) ရက်နေ့တွင် ပြန်လည် လွှတ်ပေးလိုက်သော်လည်း ၎င်းတို့အား ရိုက်နှက် နှိပ်စက်မှုကြောင့် ရရှိသည့် ဒဏ်ရာများကို ဆေးကုသ နေရသည်ဟု ဒေသခံများက ပြောပါသည်။