ရခိုင်လူမျိုးများထံမှ WY စာတမ်းပါ မူးယစ်ဆေးဝါးများ ဖမ်းဆီးရမိ
MYARF
RB News
15.3.2015
ဘူးသီးတောင် ။ ။ ရခိုင်ပြည်နယ်၊ စစ်တွေမြို့မှ WY စာတမ်းပါ မူးယစ်ဆေးဝါးများ သယ်ဆောင်လာသည့် ရခိုင်လူမျိုး (၄) ဦးကို ဘူးသီးတောင် မြို့နယ်တွင် ဖမ်းဆီးရမိခဲ့ကြောင်း သတင်း ရရှိပါသည်။
မတ်လ (၁၀) ရက်နေ့က စစ်တွေမြို့မှ ရခိုင်လူမျိုး (၄) ဦးသည် စက်လှေတစ်စီးဖြင့် ဆန်အိတ် အပြည့်တင်၍ ဘူးသီးတောင် မြို့နယ်သို့ လာနေစဉ် ဘူးသီးတောင် မြို့နယ် တောင်ပိုင်း၊ ခွဆုံကျေးရွာ ချောင်းရှိ ရေတပ်မှ စက်လှေကို စစ်ဆေးရာ WY စာတမ်းပါ မူးယစ်ဆေးဝါးပြားများ ဆန်အိတ် တစ်အိတ်ထက်မက တွေ့ရှိသဖြင့် သယ်ဆောင်လာသူ (၄) ဦကို ဖမ်းဆီး၍ ဘူးသီးတောင် မြို့နယ်၊ ညောင်ချောင်းရှိ နယ်ခြားစောင့် ရဲတပ်ဖွဲ့သို့ လွှဲအပ်ခဲ့သည်။
၎င်းတို့ကို ညောင်ချောင်း နယ်ခြားစောင့် ရဲတပ်ဖွဲ့ စခန်းမှ စစ်ဆေးရာ တောင်ပြိုလက်ဝဲ မြို့နယ်ခွဲတွင် တာဝန်ကျနေသော နယ်ခြားစောင့် ရဲတပ်ဖွဲ့မှ ရဲအုပ် တစ်ဦးအတွက် သယ်ယူလာခြင်း ဖြစ်သည်ဟု ထွက်ဆိုခဲ့ကြောင်း သိရသည်။ ဖမ်းဆီးခံရသူ (၄) ဦးကို မတ်လ (၁၄) ရက်နေ့က ဘူးသီးတောင် မြို့နယ် တရားရုံးတွင် ရုံးတင် စစ်ဆေးခဲ့ပြီးနောက် ညောင်ချောင်းရှိ နယ်ခြားစောင့် ရဲတပ်ဖွဲ့ စခန်းသို့ ပြန်လည် ခေါ်ဆောင် သွားခဲ့ကြောင်း ဒေသခံ တစ်ဦးက RB News သို့ပြောသည်။
မတ်လ (၁၄) ရက်နေ့ နေ့လည်ပိုင်းတွင်လည်း ဘူးသီးတောင်မြို့နယ် သိမ်တောင်ပြင် ကျေးရွာမှ ညောင်ချောင်းသို့ သွားနေသည့် ရခိုင်လူမျိုး နှစ်ဦး၏ ကျောပိုးအိတ်များကို ညောင်ချောင်းမှ နယ်ခြားစောင့် ရဲများက စစ်ဆေးရန် ခေါ်သဖြင့် အိတ်များကို ပစ်ချ၍ နှစ်ဦးစလုံး ထွက်ပြေး သွားခဲ့သည်။ ထို့နောက် နယ်ခြားစောင့် ရဲများက ကျောပိုးအိတ်များကို စစ်ဆေးခဲ့ရာ အိတ်များတွင် WY စာတမ်းပါ မူးယစ်ဆေးဝါးပြားများ အပြည့်ထည့် ထားသည်ကို သိမ်းဆည်း ရမိခဲ့ကြောင်း အဆိုပါ ဒေသခံက ပြောပါသည်။
