နောက်ဆုံးသတင်း/ဆောင်းပါးများ

ဘူးသီးတောင် ဖရုံချောင်းမှ ဒေသခံ ရွာသားများ နေ့စဉ် ကျွန်သဖွယ် ခိုင်းစေခံနေရ



MYARF
RB News
10.6.2015

ဘူးသီးတောင် ။ ။ ရခိုင်ပြည်နယ်၊ ဘူးသီးတောင် မြို့နယ် တောင်ပိုင်း၊ ဖရုံချောင်း ကျေးရွာအုပ်စု၊ ဖရုံချောင်း ပြိုင်းတောင်ရွာမှ စစ်တပ်နှင့် နယ်ခြားစောင့် ရဲတပ်ဖွဲ့ တို့၏ သတင်းပေး ဦးဆော်လီမူလ္လာ (ဘ) ဦးအီမာန်ဟူစိန်းက ၎င်းကျေးရွာတွင် ရွာသူကြီး ပုံစံဖြစ်လျက် ရှိပြီး ဒေသခံများကို ညှဉ်းပန်း နှိပ်စက်လျက် ရှိသည်။ ရွာသားများကို ၎င်း၏ အိမ်ွင် အလုပ်လုပ်ခိုင်းကာ လုပ်အားခ မပေးဘဲ လုပ်ခတောင်းလျှင်လည်း လုပ်အားခ ပေးခိုင်းသည်ဟု လိမ်ညာ ပြောကာ၊ အပြန်အလှန် စကားအချေအတင် ပြောဆိုသူများကို စစ်တပ်နှင့် နယ်ခြားစောင့် ရဲများနှင့် ဖမ်းဆီးစေမည်ဟု ခြိမ်းခြောက်ခြင်း၊ အချို့ကို ရိုက်နှက်ခြင်း၊ အချို့ထံမှ ငွေညှစ်ခြင်းများ ပြုလုပ်လျက် ရှိကြောင်း ဒေသခံများက RB News သို့ပြောသည်။

လွန်ခဲ့သည့် မေလ နောက်ဆုံးပတ်တွင် ဖရုံချောင်း ပြိုင်းတောင်ရွာမှ ကော်လီမူလ္လာ (ဘ) ဦးဘော်ဒီအာလောမ်နှင့် အီနုစ် (ဘ) ဦးနော်ဇိရ်အာမတ် တို့အပါအ၀င် ဒေသခံ (၁၀) ဦးကို တစ်နေ့ လုပ်ခ ၄၀၀၀ ကျပ်စီ ပေးမည်ဟု ဆိုကာ ဂူတာပြင် ကျေးရွာရှိ မြို့နယ် အုပ်ချုပ်ရေးမှူးပိုင် ရေကန်ကို တစ်နေကုန် တူးစေ၍ ညနေချိန်တွင် လုပ်အားပေးခိုင်သည်ဟု ဆိုကာ လုပ်အားခ မပေးခဲ့ကြောင်း သိရသည်။ ခိုင်းစေခံရသူ ၁၀ ဦးထဲမှ နှစ်ဦးက ငွေပေးရမည်ဟု ပြောဆိုသဖြင့် ၎င်းတို့ နှစ်ဦးကို ရိုက်နှက်ခဲ့သည်။

မေလ (၂၄) ရက်နေ့ ည ၈ နာရီ အချိန်တွင် မုဆိုးမ တစ်ဦး ဖြစ်သည့် ဒေါ်ရာဘီယာခါတူ၏ သား အီဆုဖ် (အသက် ၁၄ နှစ်) ကို ကင်းစောင့် နေစဉ် ဦးဆော်လီမူလ္လာက ၎င်း၏ နေအိမ်သို့ ခေါ်ဆောင်သွားပြီး ဒေါ်ရာဘီယာခါတူအား ငွေတစ်သိန်း နှင့်အတူ လာရောက်၍ ရွေးယူရန် ဆင့်ခေါ်ခဲ့သည်။ အီဆုဖ်၏ မိခင်ဖြစ်သူက ဦးဆော်လီမူလ္လာသည် အရက်သေစာ သောက်သုံးသူ ဖြစ်၍ ညအချိန်တွင် မသွားသင့်ဟု ဆိုကာ မေလ (၂၅) ရက်နေ့ နံနက်ချိန်တွင် သွားတွေ့ရာ ညပိုင်းတွင် မလာခဲ့ဟု ဆိုကာ ဆဲဆိုပြီးနောက် သားဖြစ်သူ အီဆုဖ်ထံတွင် ဘင်္ဂလားဖုန်း ရှိသည်ဟု သတင်း ရရှိထားသဖြင့် ငွေကျပ် တစ်သိန်း ပေးရန် လိုအပ်ကြောင်း ပြောခဲ့သည်။ ဒေါ်ရာဘီယာခါတူက မိမိသည် အလွန်ဆင်းရဲသူ ဖြစ်၍ ငွေကျပ် တစ်သိန်း မတတ်နိုင်ဟု ဆိုကာ ငွေမပေးဘဲ ပြန်ထွက်သွား ခဲ့သည်။ ဦးဆော်လီမူလ္လာက သူမအား သတ်မည်၊ ဖမ်းမည်၊ အိမ်တွင် WY မူးယစ်ဆေးဝါး ထည့်၍ စစ်တပ်ခေါ်လာပြီး ဖမ်းဆီးခိုင်းမည်ဟု ခြိမ်းခြောက်သည့် အပြင်၊ ဓါးတစ်လက်ကိုင်ကာ ဒေါ်ရာဘီယာခါတူ၏ အိမ်သို့ အကြိမ်ကြိမ် သွားရောက်၍ သတ်ရန် ရှာဖွေခဲ့သော်လည်း မတွေ့ရှိခဲ့ကြောင်း ဒေသခံများက ပြောပါသည်။ ဦးဆော်လီမူလ္လာ၏ ခြိမ်းခြောက်မှုကြောင့် ဒေါ်ရာဘီယာခါတူမှာ မိမိ၏ နေအိမ်တွင် မနေရဲတော့ဘဲ အခြားရွာရှိ ဆွေမျိုးများ အိမ်တွင် ပုန်းအောင်းနေရသည်ဟု ဆိုသည်။

မေလ (၂၆) ရက်နေ့တွင် ဖရုံချောင်း ပြိုင်းတောင်ရွာမှ ကွမ်းယာရောင်းသူ ဟူဆောင်း (ဘ) ဦးဘော်ဒီအာလောမ် (အသက် ၃၂ နှစ်) က သူငယ်ချင်း တစ်ဦး၏ ဖုန်းမှ သီချင်း ကူးယူခဲ့ရာ ဦးဆော်လီမူလ္လာက အခြားသူ၏ ဖုန်းမှ သီချင်း ကူးယူခဲ့သည်ဟု ဆိုကာ ငွေကျပ် နှစ်သိန်း တောင်းခံလျက် ရှိသည်။ ဆယ်အိမ်မှူး ဦးမော်တော်လောဖ်နှင့် ဦးအီဆုဖ် တို့ကို အကြိမ်ကြိမ် စေလွှတ်၍ ငွေတောင်းခံသော်လည်း ဟူဆောင်းက ငွေမပေးခဲ့ကြောင်း၊ သို့ဖြစ်၍ ဦးဆော်လီမူလ္လာက ဟူဆောင်း၏ နွားရုံတွင် WY မူးယစ်ဆေးဝါး ထည့်၍ စစ်တပ်ဖြင့် ဖမ်းဆီးစေမည်ဟု ခြိမ်းခြောက်လျက် ရှိသည်။ ထိုသို့ ဒေသခံ ရွာသားများကို နေ့စဉ် ကျွန်သဖွယ် ပြုလုပ်လျက် ရှိသဖြင့် အထက် အာဏာပိုင်များက အရေးယူ ဆောင်ရွက် ပေးရန် အထူးလိုလားကြောင်း ဒေသခံများက RB News သို့ပြောပါသည်။

Comment ရေးရန်

Rohingya Exodus