ဖုရားပြင်အောင်ပ အုပ်ချုပ်ရေးမှူးက မြို့နယ် အုပ်ချုပ်ရေးမှူး အားကိုးဖြင့် ဒေသခံများက ကြုံးဝါး

ဘူးသီးတောင် ။ ။ ရခိုင်ပြည်နယ်၊ ဘူးသီးတောင် မြို့နယ် အုပ်ချုပ်ရေးမှူး ဦးသန်းရွှေ အပါအ၀င် (၈) ဦးပါဝင်သည့် အဖွဲ့သည် ဒီဇင်ဘာလ (၈) ရက်နေ့ နံနက် (၁၀) နာရီခန့် အချိန်တွင် ဘူးသီးတောင် မြို့နယ် တောင်ပိုင်း၊ ဖုရားပြင်အောင်ပ ကျေးရွာအုပ်စု၊ အုပ်ချုပ်ရေးမှူး ဦးမောင်ချမ်းသာ၏ နေအိမ်သို့ သွားရောက်ခဲ့သည်။ မြို့နယ် အုပ်ချုပ်ရေးမှူးနှင့် အဖွဲ့ကို ကျေးရွာ တာဝန်ခံ ဦးဆူလေမာန်နှင့် ရာအိမ်မှူး၊ ဆယ်အိမ်မှူးများက ခရီးဦး ကြိုဆိုခဲ့သည်။ ကျေးရွာ အုပ်ချုပ်ရေးမှူး ဦးမောင်ချမ်းသာက ငွေကျပ် တစ်သိန်းနှစ်သောင်း အကုန်ကျခံ၍ မြို့နယ် အုပ်ချုပ်ရေးမှူးနှင့် အဖွဲ့ကို ဧည့်ခံ ကျွေးမွေးခဲ့သည်။ 

နေ့လည် (၃) နာရီအချိန်တွင် ရိုဟင်ဂျာ လူမျိုးများ ဖြစ်သည့် ကျေးရွာ တာဝန်ခံ ဦးဆူလေမာန်နှင့် ရာအိမ်မှူး၊ ဆယ်အိမ်မှူး များကို အိမ်ပြန်စေပြီး ကျေးရွာ အုပ်ချုပ်ရေးမှူးနှင့် မြို့နယ် အုပ်ချုပ်ရေးမှူးနှင့် အဖွဲ့တို့ ဆွေးနွေးခဲ့သည်။ ထို့နောက် မြို့နယ် အုပ်ချုပ်ရေးမှူးနှင့် အဖွဲ့ ပြန်လည် ထွက်ခွာ သွားခဲ့သည်။ 

ညနေပိုင်းတွင် ကျေးရွာ အုပ်ချုပ်ရေးမှူး ဦးမောင်ချမ်းသာက ရိုဟင်ဂျာရွာထဲသို့ သွားရောက်ပြီး “အင်တာနက် သမားတွေက ငါတို့ အတွက် အင်တာနက်ပေါ် တင်ပြီး ငါတို့ကို ဘာလုပ်နိုင်မှာလဲ၊ ဘာတစ်ခုမှ မလုပ်နိုင်ဘူး။ ငါတို့ကို အုပ်ချုပ်ရေးမှူး ခန့်အပ်တာ မြန်မာနိုင်ငံ အစိုးရပါ။ UN, OIC, အမေရိကန်တို့ မဟုတ်ဘူး။ ငါတို့ကို အရေးယူရင်လည်း မြန်မာနိုင်ငံ အစိုးရကပဲ အရေးယူနိုင်မှာ၊ မြန်မာနိုင်ငံ အစိုးရက ငါတို့ လက်ထဲမှာဘဲ ရှိတယ်။ ငါတို့ဟာ ငါတို့ ပုံမှန် လုပ်သွားမှာဘဲ၊ မင်းတို့ ကုလားတွေကို ဖမ်းဆီးတာ၊ ငွေညှစ်တာ၊ ရိုက်နှက်တာ ငါတို့အလုပ်ပဲ၊ မသင်္ကာ ဖြစ်တဲ့ကောင်တွေကို ဖမ်းဆီး မြို့နယ် အုပ်ချုပ်ရေးမှူး၊ ရဲစခန်း၊ နယ်ခြားစောင့်ရဲတပ်ဖွဲ့ စခန်းတွေကို အပ်နှံဖို့ မြို့နယ် အုပ်ချုပ်ရေးမှူးက ငါ့ကို ပြောခဲ့တယ်” ဟု ကြုံးဝါး ပြောဆိုခဲ့ကြောင်း ဒေသခံများက RB News သို့ပြောပါသည်။