နောက်ဆုံးသတင်း/ဆောင်းပါးများ

အလယ်သံကျော်တွင် အာဏာပိုင်များ၏ လက်ပါးစေများက ရွာသားများကို အနိုင်ကျင့် စော်ကား



RB News
26.12.2015

မောင်တော ။ ။ ရခိုင်ပြည်နယ်၊ မောင်တော မြို့နယ် တောင်ပိုင်း အလယ်သံကျော် ကျေးရွာအုပ်စု၊ ဈေးကုန်တန်းရွာမှ ဦးမျိုးအောင် (ခ) ဦးဆွေယာဒ်ဒူလ္လာ၏ တူများသည် ဈေးထဲတွင် မင်းမဲ့စရိုက်ဆန်ဆန်ဖြင့် ဒေသခံ ရွာသားများကို ဗိုလ်ကျ အနိုင်ကျင့်လျက် ရှိကြောင်း သတင်း ရရှိပါသည်။ 

ဦးဆွေယာဒ်ဒူလ္လာ၏ တူ (၃) ဦးမှာ ဟာရှိမ်း၊ မာမတ်ရှော်ဘီနှင့် မာမတ်ရော်ဖိတ် တို့ဖြစ်သည်။ ၎င်းတို့သည် ဒေသဆိုင်ရာ အာဏာပိုင်များနှင့် ပူးပေါင်း၍ တစ်ဖက်နိုင်ငံသို့ ကျွဲ၊ နွား၊ ငါး၊ ငါးခြောက်၊ အုန်းသီး စသည့် ကုန်မျိုးစုံ တင်ပို့ ရောင်းချပြီး ချမ်းသာလာကြသူများ ဖြစ်သည်။ ထို့အပြင် WY မူးယစ်ဆေးဝါး လုပ်ငန်းကိုလည်း အကြီးအကျယ် လုပ်ကိုင်နေသည်ဟု ဒေသခံများ၏ ပြောကြားချက်များ အရ သိရသည်။ 

ဟာရှိမ်း (ဘ) ဦးအာမိရ်ဂုလာလ်သည် သားသတ်လိုင်စင် လုပ်ငန်း လုပ်ကိုင်ပြီး အမဲသားကို တစ်ဦးတည်း အဆမတန် ဈေးနှုန်းဖြင့် ရောင်းချလျက်ရှိပြီး၊ အခြားရွာမှ ၀ယ်ယူလာသည်ကို တွေ့ရှိလျှင် အမဲသားများကို သိမ်းယူလေ့ရှိသည်။ အမဲသားဝယ်လျှင် ၎င်းထံမှသာ ၀ယ်ရသည်။ အလားတူ ၎င်း၏ညီ မာမတ်ရော်ဖိတ်သည် ဆောက်လုပ် ပစ္စည်းများ၊ အီလက်ထရွန်နစ် ပစ္စည်းများနှင့် ဆီဆိုင်ဖွင့်ထားရာ စက်လှေသမားများက ၎င်းထံမှပင် ၀ယ်ယူရသည်။ ၎င်း၏ အစ်ကို မာမတ်ရှော်ဘီက ပိုက်ဆိုင်ဖွင့်ရာ ငါးဖမ်းလှေများမှာ အခြားနေရာမှ ၀ယ်ယူခွင့် မရှိဘဲ ၎င်းထံမှသာ ၀ယ်ယူရသည်။

အလယ်သံကျော်ရှိ စီးပွားရေး လုပ်ငန်းများကို ဦးဆွေယာဒ်ဒူလ္လာ၏ ဆွေမျိုးများ အားလုံးက ချုပ်ကိုင်ထားသည်။ ၎င်းတို့သည် အာဏာပိုင်များကို စီးပွားရေးအရ အကျိုးပြုနေသဖြင့် ၎င်းတို့ စိတ်ကြိုက် ရမ်းကားခွင့် ပြုထားသည်ဟု ဒေသခံများက RB News သို့ပြောပါသည်။ 

ဒီဇင်ဘာလ (၂၃) ရက်နေ့ နေ့လည် (၃) နာရီ အချိန်တွင် မောင်တူလာရွာမှ ရိုတီမုန့်ဆိုင် ရောင်းသူ မိုဟာမတ်အာယာစ် (ခ) အာဒီဘယော (ဘ) ဦးအဒူရှကူရ် (အသက် ၂၅ နှစ်) သည် အလယ်သံကျော် ဈေးတွင် မာမတ်ရော်ဖိတ် ထံမှ ရရန်ရှိသော အကြွေးကို တောင်းရာ ငွေမပေးသည့် အပြင် ညီအစ်ကိုများ အားလုံးက လူမဆန်စွာ ရိုက်နှက်ခဲ့သည်။ မိုဟာမတ်အာယာစ်၏ ဦးခေါင်းတွင် ဒဏ်ရာပြင်းထန်စွာဖြင့် သွေးများယိုစီးနေသည့် အချိန်တွင်ပင် သံတုတ်ဖြင့် ခြေထောက်ကို ရိုက်နှက်ခဲ့ကြောင်း မျက်မြင်သက်သေ များက ပြောပါသည်။ ထိုသို့ ရိုက်နှက်နေစဉ် အမှတ် (၄) နယ်ခြားစောင့် ရဲတပ်ဖွဲ့မှ တပ်ရင်းမှူး ကိုယ်တိုင် ဦးဆွေယာဒ်ဒူလ္လာနှင့် အတူ ထိုင်ကြည့်နေခဲ့သည်ဟု ဒေသခံများက ပြောပါသည်။ လူမဆန်စွာ ရိုက်နှက်နေသည်ကို ၀င်ရောက် တားဆီး ဟန့်တားခြင်း မရှိခဲ့ဟု ဆိုသည်။ 

မာမတ်ရော်ဖိတ်သည် ၂၀၁၃ ခုနှစ်မှ စ၍ ဒုတိယ အိမ်ထောင်ပြု ထားသော်လည်း မည်သည့် အာဏာပိုင်ကမှ အရေးယူခြင်း မရှိသည်မှာ အာဏာပိုင်များအား အကျိုးပြုနေသောကြောင့် ဖြစ်သည်။ အာဏာပိုင်များ အတွက် အကျိုးပြုနေလျှင် ထုတ်ပြန်ထားသည့် ဥပဒေများ သက်ရောက်မှု မရှိဟု ဒေသခံများက ပြောပါသည်။

Comment ရေးရန်

Rohingya Exodus