ဝက်ရူးပြန် ရောဂါဖြင့် သေဆုံးသော ရုပ်အလောင်း မြေမြှပ်ရန် နယ်ခြားစောင့်ရဲကို ငွေပေးရ

မောင်တော ။ ။ ရခိုင်ပြည်နယ်၊ မောင်တော မြို့နယ် မြောက်ပိုင်း၊ ငါးစကြူး ကျေးရွာအုပ်စု ပန်းမြောင်ရွာမှ ဦးအာဘူလ်ဟာရှိမ်၏ သား မာမတ်ရော်ဖိတ် (အသက် ၁၇ နှစ်) သည် ငယ်စဉ် ကတည်းကပင် ၀က်ရူးပြန် ရောဂါ ဝေဒနာသည် တစ်ဦး ဖြစ်သည်။ ၂၀၁၄ ခုနှစ်တွင် ပန်းမြောင်ရွာ မီးလောင်ခံရပြီး နောက်ပိုင်းတွင် မာမတ်ရော်ဖိတ် တို့မိသားစုသည် ထင်းခုတ် ရောင်းချ၍ အသက်မွေး ၀မ်းကျောင်း ပြုနေရသည်။ 

ဖေဖော်ဝါရီလ (၂) ရက်နေ့ နံနက်ပိုင်းတွင် မာမတ်ရော်ဖိတ်သည် ထင်းခုတ်ရန် တောင်ပေါ်သို့ သွားခဲ့သည်။ တောတောင်ထဲတွင် ၀က်ရူးပြန် ရောဂါ ထ၍ စမ်းချောင်းထဲသို့ လဲကျကာ သေဆုံး သွားခဲ့သည်။ မိသားစုက သတင်းကြား၍ မာမတ်ရော်ဖိတ်၏ ရုပ်အလောင်းကို အိမ်သို့ သယ်လာကာ မြေမြှပ်ရန် ပြင်ဆင်နေစဉ် ငါးစကြူး ကျေးရွာအုပ်စု လိပ်အိုင်ရွာ (နိယာရ်ဘိလ်) မှ ရာအိမ်မှူး ဦးနုရ်မာမတ် (ငါးခူရ နယ်ခြားစောင့် ရဲတပ်ဖွဲ့ စခန်း၏ သတင်းပေး) ရောက်ရှိလာပြီး၊ ငါးခူရ နယ်ခြားစောင့် ရဲတပ်ဖွဲ့ စခန်းမှ တပ်ရင်းမှူး၏ ခိုင်းစေချက် အရ လာရောက် ရသည်ဟု ဆိုကာ နယ်ခြားစောင့် ရဲတပ်ဖွဲ့၏ ခွင့်ပြုချက် မရဘဲ အလောင်းကို မြေမမြှပ်ရန် ပြောကြားခဲ့သည်။ 

ဆက်လက်ပြီး တပ်ရင်းမှူးအား ငွေကျပ် တစ်သိန်း ပေးမှသာ မြေမြှပ်ခွင့် ရမည်ဟု ပြောကြား၍ ငွေကျပ် တစ်သိန်း တောင်းခံခဲ့သည်။ မာမတ်ရော်ဖိတ်၏ မိသားစုသည် အလွန်ဆင်းရဲ၍ ငွေကျပ် တစ်သိန်း မတတ်နိုင်၍ ရွာထဲတွင် အလှူခံခဲ့သည်။ အလှူခံ၍ ရသည့် ငွေကျပ် ၇၅၀၀၀/- ကို ဖေဖော်ဝါရီလ (၃) ရက်နေ့တွင် ဦးနူရ်မာမတ်၏ လက်ထဲသို့ ပေးမှသာ အလောင်းကို မြေမြှပ်ခွင့် ပြုခဲ့ကြောင်း ဒေသခံများက RB News သို့ပြောပါသည်။ 

ရောဂါကြောင့် သေဆုံးခဲ့ရသူ ဆင်းရဲသား မိသားစု မြေမြှပ်ခွင့် ရရေး အတွက် ငွေညှစ်ယူသော နယ်ခြားစောင့် ရဲတပ်ဖွဲ့၏ လုပ်ရပ်မှာ အလွန်ပင် ရက်စက် ကြမ်းကြုတ်ရာ ရောက်ပေသည်ဟု ဒေသခံများက ဝေဖန် ပြောဆိုနေကြသည်။