နောက်ဆုံးသတင်း/ဆောင်းပါးများ

တမန်းသား ကျေးရွာတွင် မီးလောင်မှု ဖြစ်ပွားပြီး အိမ်ခြေ (၂၆) လုံး လောင်ကျွမ်းသွား



MYARF
RB News
5.2.2016

မောင်တော ။ ။ ဖေဖော်ဝါရီလ (၄) ရက်နေ့ နေ့လည် ၁၂း၄၅ နာရီ အချိန်တွင် ရခိုင်ပြည်နယ်၊ မောင်တော မြို့နယ် မြောက်ပိုင်း၊ တမန်းသား ကျေးရွာဈေး၏ အနောက်မြောက်ဘက်ရှိ ဦးဆော်လီမူလ္လာ (ဘ) ဦးနူရ်အာမတ်၏ နေအိမ်မှ စ၍ မီးစတင် လောင်ကျွမ်းပြီး အိမ်ခြေ (၂၆) လုံး မီးလောင်၍ ပြာကျခဲ့ရသည်။ အိမ်အများစုမှာ ပူးတွဲအိမ်များ ဖြစ်ကြသည်။ ယင်းအိမ် (၂၆) လုံးတွင် မိသားစု (၄၁) စုရှိသည်။ 

မီးလောင်မှုကြောင့် အမျိုးသား (၈၃) ဦးနှင့် အမျိုးသမီး (၁၂၅) ဦး အိုးအိမ်မဲ့ ဖြစ်သွားရကြောင်း ဒေသခံများက RB News သို့ပြောပါသည်။ 

နှစ်နာရီခန့် မီးလောင်ကျွမ်းခဲ့ပြီး၊ အချို့ လယ်သမားများ၏ နေအိမ်များတွင် စပါးများလည်း ရှိရာ၊ စပါးများပါ မီးလောင် ပျက်စီးခဲ့သည်။ အိမ်များ အတွင်းရှိ ဥစ္စာ ပစ္စည်းများ အားလုံးလည်း ပါဝင်သွားပြီး၊ မီးလောင်မှု ဖြစ်ပွားနေစဉ် လေတိုက်နှုန်း မြင့်လာသောကြောင့် နေအိမ် အမြောက်အမြား မီးလောင် သွားခဲ့ခြင်း ဖြစ်သည်။

ရွာသားများ ၀ိုင်းဝန်း မီးငြိမ်းသတ်နေစဉ် တမန်းသားရှိ နယ်ခြားစောင့်ရဲ များနှင့် စစ်သားများ ရောက်ရှိလာပြီး ရွာသားများနှင့် အတူ မီးငြိမ်းသတ်ခဲ့သည်။ မီးငြိမ်းသတ် နေစဉ် ရွာသား အချို့ ဒဏ်ရာ ရရှိခဲ့သည်။ 

နယ်ခြားစောင့်ရဲ များနှင့် စစ်သားများက မီးလောင် ပျက်စီးခံရသည့် နေအိမ်များ၏ စာရင်းများ ကောက်ခံ ပြုစုခဲ့ပြီး ရွာသားများကို အားပေး စကား ပြောဆိုခဲ့ကြောင်း ဒေသခံများက ပြောပါသည်။ ထို့နောက် နယ်ခြားစောင့်ရဲ များက မီးလောင် ပျက်စီးခံရသူ များအား တဲထိုးပေးရန် ၀ါး ၂၁၀၀ လုံး လှူဒါန်း ထောက်ပံ့ခဲ့သည်။ စားနပ် ရိက္ခာများလည်း ထောက်ပံ့ပေးသွားမည်ဟု ပြောဆိုခဲ့ကြောင်း သိရသည်။ 

နိုင်ငံတကာ အဖွဲ့အစည်း တစ်ခု ဖြစ်သည့် MALTESER အဖွဲ့ ရောက်ရှိလာပြီး ဒဏ်ရာ ရရှိသူများကို ဆေးကုသ ပေးခဲ့သည်။ UNHCR မှ ၀န်ထမ်းများ ရောက်ရှိလာပြီး စာရင်းများ ပြုစုခဲ့သည်။ မီးစတင် လောင်ကျွမ်းခဲ့သည့် အိမ်မှ အိမ်ရှင်သည် ကြောက်လန့်၍ တိမ်းရှောင် လျက်ရှိသည်။ အိုးအိမ်မဲ့ ဖြစ်သွားသည့် မီးဘေးသင့် များသည် ရွာထဲရှိ ဆွေမျိုးများ၏ အိမ်များတွင် ယာယီ ခိုလှုံလျက် ရှိသည်။

ရွာသာများက မီးဘေးသင့် ဒုက္ခသည်များကို ညစာ အတွက် ဆန်၊ ငါးခြောက်၊ ငရုတ်သီး စသည်များ ထောက်ပံ့ ပေးသည်။ အနီးအနားရှိ ရွာများမှလည်း ဆန်များ ထောက်ပံ့ပေးသည်။ အာဏာပိုင်များက ခွင့်ပြုမည် ဆိုလျှင် AZG (MSF) ကလည်း ကူညီရန် အသင့်ရှိသည်ဟု AZG တာဝန်ခံ များက ပြောကြားခဲ့သည်။ 

တမန်းသား ကျေးရွာသည် မောင်တော မြို့နှင့် ၃၂ မိုင်ခန့် အကွာတွင် ရှိသဖြင့် မောင်တော မြို့ရှိ မီးသတ်ကားများ လာရောက် ကူညီနိုင်ခြင်း မရှိခဲ့ကြောင်း ဒေသခံများက ပြောပါသည်။ 

မီးလောင်မှု စတင် ဖြစ်ပွားသည့် အိမ်တွင် မီးစတင် လောင်ကျွမ်းစဉ် တစ်ဦးမှ မရှိခဲ့သည့် အချိန် ဖြစ်သည်။ မိသားစုဝင်များ အားလုံး နေ့လည်စာ စားသောက်ပြီး အိမ်ကို သော့ခတ်ကာ စိုက်ခင်းသို့ သွားရောက်နေသည့် အချိန်ဖြစ်သည်။ နေ့လည်စာ ချက်ပြုတ်ပြီး မီးမငြိမ်းဘဲ မီးဖိုတွင် မီးထားကာ စိုက်ခင်းသို့ သွားနေခြင်းကြောင့် ဖြစ်နိုင်သည်ဟု ရွာသားများက သုံးသပ် နေကြသည်။

Comment ရေးရန်

Rohingya Exodus