စစ်တွေမှ ရိုဟင်ဂျာ အမျိုးသမီးတစ်ဦးကို အမြောက်တပ်ရင်းမှ စစ်သားများက အုပ်စုဖွဲ့ မုဒိန်းကျင့်ဟု ယုံကြည်ရ

RB News
19.8.2016

စစ်တွေ ။ ။ ရခိုင်ပြည်နယ်၊ စစ်တွေမြို့၊ အောင်မင်္ဂလာ ရပ်ကွက်မှ ကွယ်လွန်သူ ဦးယာကွတ်၏ အသက် ၂၅ နှစ် အရွယ် သမီးဖြစ်သူ မရီးဇ်ဝါးနာကို စစ်တွေမြို့ရှိ အမြောက်တပ်ရင်းမှ စစ်သားများက အုပ်စုဖွဲ့ မုဒိန်းကျင့်ခဲ့သည်ဟု ယုံကြည်ရကြောင်း ဒေသခံများက ပြောပါသည်။

သြဂုတ်လ (၁၆) ရက်နေ့က လက်မချေကျေးရွာမှ သက္ကေပြင် ကျေးရွာသို့ သွားနေသည့် မရီးဇ်ဝါးနားကို အမြောက်တပ်ရင်းမှ စစ်သားများက ခေါ်ဆောင် သွားပြီး၊ သြဂုတ်လ (၁၇) ရက်နေ့ နံနက် အစောပိုင်းတွင် အမြောက်တပ်ရင်း အနီးတွင် သတိလစ်နေသည့် အနေအထားဖြင့် ပစ်ထားခဲ့သည်။ ထို့နောက် စစ်သားများက သက္ကေပြင် ကျေးရွာ အုပ်ချုပ်ရေးမှူး ဦးလှမြင့်ထံ အကြောင်းကြား၍ မရီးဇ်ဝါးနားကို သယ်ဆောင်သွားရန် ပြောကြားခဲ့ကြောင်း ဒေသခံများက ဆိုသည်။ ဦးလှမြင့်က မရီးဇ်ဝါးနားကို သတိလစ်နေသည့် အနေအထားဖြင့် သက္ကေပြင် ကျေးရွာရှိ ဆေးခန်းသို့ ခေါ်ဆောင် သွားခဲ့သည်။ ဆေးခန်းတွင် ဆေးဝါးကုသမှု ရရှိခဲ့သော်လည်း ယင်းနေ့ ည (၇) နာရီ အချိန်တွင် သေဆုံးသွားခဲ့သည်။

ယနေ့ (သြဂုတ်လ ၁၉) ရက်နေ့ နံနက်ပိုင်းတွင် သက္ကေပြင် ဆေးခန်းတွင် လုံခြုံရေး တာဝန်ယူထားသည့် ရဲများက မရီးဇ်ဝါးနား၏ အလောင်းကို သယ်ဆောင်သွားရန် အတွက် ဆွေမျိုးတော်စပ်သူများကို ရှာခိုင်းရန် သက္ကေပြင် အုပ်ချုပ်ရေးမှူး ဦးလှမြင့်ကို ညွန်ကြားခဲ့ရာ၊ ဦးလှမြင့်က အဒေါ်တော်စပ်သူ တစ်ဦးကို ရှာဖွေတွေ့ရှိခဲ့သည်။ ထို့နောက် နံနက် ၁၀ နာရီ အချိန်တွင် မရီးဇ်ဝါးနား၏ အလောင်းကို သယ်ဆောင်သွားပြီး၊ နေ့လည် ၂း၃၀ နာရီ အချိန်တွင် လက်မချေ ကျေးရွာရှိ သင်္ချိုင်းတွင် မြေမြှပ်သဂြိုဟ်ခဲ့ကြောင်း သိရှိရသည်။