ငြိမ်းချမ်းရေးကုန်ကြမ်းများ
ရိုဟင်းစိုးမိုးဝင်း
RB News
30.10.2016
လူသားဟူသည် လောကတွင် တစ်ဦးတည်း ရပ်တည် ရှင်သန်မနေနိုင်။ လူ့အဖွဲ့အစည်းတွင် အဖွဲ့ဝင်တစ်ဦး အဖြစ် ပါဝင်၍ မိမိဘ၀ရပ်တည်ရေးနှင့် အခြားလူများနှင့် သဟဇာတကျကျ နေထိုင်ရေးတို့အတွက် ကြိုးပမ်း ကြရသည်။ အခြားလူများနှင့် သဟဇာတကျကျ နေထိုင်ရေး အတွက် လူတစ်ဦးစီတွင် လိုက်နာကျင့်ကြံရမည့် လူ့ကျင့်ဝတ်၊ လူ့တာဝန်၊ လူ့ဝတ္တရား ကိုယ်စီရှိကြသည်။ လူသားတစ်ဦးအနေဖြင့် လိုက်နာရမည့် ကျင့်ဝတ်များဟူသည် မိမိပတ်ဝန်းကျင်ရှိ လူသားအားလုံးအတွက် ကြည့်တတ်၊ မြင်တတ်၊ သိတတ်၊ ဆောင်ရွက်တတ်သည့် ကျင့်ဝတ်များဖြစ်ကြသည်။
တစ်နည်းအားဖြင့် မိမိကိုယ်ကျိုး စီးပွားကို ဦးစားမပေးဘဲ အများကောင်းကျိုးကို ဆောင်ရွက်တတ်သော ကျင့်ဝတ်များဖြစ်ရသည်။ ဤသို့ ကျင့်ဝတ်များ ကိုယ်စီ လိုက်နာပါက စိုးရိမ်မှု၊ ပူပန်မှု၊ သောကရောက်မှု တို့သည် မိမိဘဝ၌ ကွန်းခိုရာ ရလိမ့်မည် မဟုတ်ပေ။ စိုးရိမ်မှု၊ ပူပန်မှု၊ သောကရောက်မှုတို့ ကင်းဝေးနေပါက မိမိ၏ စိတ်သည် ကြည်လင်ချမ်းမြေ့ပေမြဲပင်။ ချမ်းမြေ့မှသာ ငြိမ်းချမ်းသောဘဝကို ပိုင်ဆိုင်ရပေအံ့။
လူတိုင်းလိုလို ငြိမ်းချမ်းသော ဘဝကို ပိုင်ဆိုင်နိုင်ခြင်းသည်သာလျှင် ငြိမ်းချမ်းရေး၏ အနှစ်သာရတည်း။ သို့သော် ငြိမ်းချမ်းရေးဟူသည် မိုးပေါ်က အလိုလိုကျလာသော အရာမဟုတ်၊ ကိုယ်တိုင် ဖန်တီးယူနိုင်မှသာ လက်ဝယ် ရရှိသောအရာ ဖြစ်ပေသည်။
ယနေ့ မြန်မာနိုင်ငံတွင် နေရာဒေသ အတော်များများ၌ စစ်ပွဲများ ဖြစ်ပွားနေလျက်ရှိပေရာ စစ်ပွဲများကြောင့် ထောင်သောင်းမကသော ပြည်သူများ အိုးအိမ် စွန့်ခွာ တိမ်းရှောင်နေရသည်။ မိမိ၏နေရပ်ဒေသကို စွန့်ခွာနေရသည်။ လူသားတို့အတွက် မမေ့သင့်သော တစ်နေရာသည် မိမိ၏ဇာတိ မွေးရပ်မြေဟု အဆိုပြုပါသည်။
လူတစ်ဦးအနေဖြင့် မိမိမွေးဖွားသန့်စင်ခဲ့ရာ နေရာဒေသကို အမြတ်တနိုး တန်ဖိုးထားကြသည်။ မိမိမွေးဖွားရာ အမိတိုင်းပြည်ပေါ် မည်သည့် အတားအဆီးပင် ဖြစ်စေ ၊ မည်သည့်ပြဿနာပင် ဖြစ်စေ ဖြစ်ပွားခဲ့ပါက မည်သူကမျှ စိတ်ချမ်းသာမည် မဟုတ်သည်က အမှန်ပင်။ မိမိ၏နေရပ် မွေးရပ်မြေကို လူတို့ ခင်တတ် မင်တတ်၊ တွယ်တာတတ်၊ သံယောဇဉ်ထားတတ်သည့် စိတ်ကြောင့် ကိုယ့်ရပ်ကိုယ့်မြေကို စောင့်ရှောက်လေ့ရှိသည်။ ဖြည့်ဆည်း ပေးလေ့ ရှိမြဲပင် ဖြစ်သည်။ ထို့ကြောင့် မည်သူတစ်ဦးကမှ မိမိနေရပ်ဒေသမှ အိုးအိမ်စွန့်ခွာချင် စိတ်ပေါက်မည် မဟုတ်ပေ။
ဤနေရာတွင် ကွယ်လွန်သွားပြီ ဖြစ်သော အိန္ဒိယသမ္မတဟောင်း အေ၊ပီ၊ဂျေ အဗ္ဗဒူကာလမ်၏ အဆိုတစ်ရပ်ကို သတိရမိသည်။
အဆိုက - "အိပ်မက်တွေ မြင်မက်ကြပါ။ အိပ်မက်တွေထဲကမှ အတွေးတွေ ဖြစ်လာမယ်။ အတွေးတွေရှိပါမှ အလုပ်ဖြစ်မယ်။"
အေ၊ပီ၊ဂျေ အဗ္ဗဒူကာလမ် (အိန္ဒိယသမ္မတဟောင်း) ပြောထားသလိုပါပဲ ကျွန်တော်တို့အားလုံးလည်း ငြိမ်းချမ်းရေးဖို့ အိပ်မက်တွေ ပြိုင်တူမြင်မက်ကြမည်ဆိုလျှင် ငြိမ်းချမ်းရေး အိပ်မက်တွေထဲကမှ ငြိမ်းချမ်းရေး အတွေးတွေ ဖြစ်လာမည်။ ငြိမ်းချမ်းရေး အတွေးတွေ ရှိပါမှ ငြိမ်းချမ်းရေး အလုပ်တွေ အမှန်တကယ် ဖြစ်လာမည်။ ငြိမ်းချမ်းရေး၏ အသီးအပွင့်ကို သုံးဆောင်နိုင်မည်ဖြစ်သည်။
သို့ဖြစ်ပါ၍ နေရာဒေသအနှံ့ ဖြစ်ပွားနေသော စစ်ပွဲများ ရပ်တန့်နိုင်အောင် စွမ်းဆောင်နိုင်ခြင်းသည် မြန်မာပြည်သူပြည်သားတို့၏ ကြီးမားသော တာဝန်တစ်ရပ် ဖြစ်ပေသည်။ ဆင်းရဲချမ်းသာ၊ အဖြူ အမည်း မရွေး၊ လူမျိုးမရွေး ဘာသာမရွေး စုပေါင်းလက်တွဲကာ ဆောင်ရွက်ရမည့် တာဝန်တစ်ရပ်ပင် ဖြစ်ပေသည်။ ရွှင်လန်းချမ်းမြေ့ကြပါစေ့့့  ။
