နောက်ဆုံးသတင်း/ဆောင်းပါးများ

မ.က.ဖ အဖွဲ့မှူးက NVC လက်ခံရန် စည်းရုံးဟောပြောသော်လည်း ဒေသခံရိုဟင်ဂျာများက လက်ခံရန် သဘောမတူ

MYARF
RB News
16.3.2017

မြင်းလွတ် ။ ။ ရခိုင်ပြည်နယ်၊ မောင်တောခရိုင်၊ မြင်းလွတ်မြို့မှ ဒေသခံရိုဟင်ဂျာများကို ကျီးကန်းပြင် နယ်ခြားစောင့်ရဲတပ်ဖွဲ့ ဌာနချုပ် အခြေစိုက် မ.က.ဖ အဖွဲ့မှူးက မြင်းလွတ် နယ်မြေစခန်းသို့ ဆင့်ခေါ်၍ NVC လက်ခံရန် စည်းရုံးဟောပြောခဲ့ကြောင်း သတင်းရရှိပါသည်။ 

မတ်လ (၁၆) ရက်နေ့ နေ့လည် ၂ နာရီခွဲအချိန်တွင် မောင်တောမြို့နယ် မြောက်ပိုင်း ကျီးကန်းပြင်ကျေးရွာရှိ နယ်ခြားစောင့်ရဲတပ်ဖွဲ့ ဌာနချုပ် အခြေစိုက် မ.က.ဖ အဖွဲ့မှူး ဦးထွန်းထွန်းနိုင်သည် မောင်တောခရိုင်၊ မြင်းလွတ်မြို့သို့ သွားရောက်၍ မြင်းလွတ်မြို့ရှိ ရပ်ကွက် (၈) ခု၊ သပြေတော၊ ကျောင်းတောင် (ဂေါ်ရာခါလီ) နှင့် ဥဒေါင်း ကျေးရွာများမှ ရပ်မိရပ်ဖများ၊ ဘာသာရေးဆရာများကို မြင်းလွတ်နယ်မြေစခန်းသို့ ဆင့်ခေါ်၍ NVC လက်ခံရန် စည်းရုံးဟောပြောခဲ့သည်။ 

မ.က.ဖ အဖွဲ့မှူး ဦးထွန်းထွန်းနိုင်က “ခင်ဗျားတို့ ရှေးယခင်ကတည်းက ဒီနိုင်ငံမှာ နေထိုင်လာတာ ကျွန်တော်တို့သိတယ်၊ ခင်ဗျားတို့ကို ယခင်က အမျိုးသားမှတ်ပုံတင် (သုံးခေါက်ချိုး) ကဒ်တွေ ထုတ်ပေးခဲ့တယ်။ ပြီးတော့ ယာယီသက်သေခံကဒ် (၀ှိုက်ကဒ်) တွေ ထုတ်ပေးခဲတ့ယ်။ အခု နိုင်ငံတော်စီမံကိန်းနဲ့ ခင်ဗျားတို့ကို NVC ကဒ်တွေ ထုတ်ပေးနေတယ်။ အားလုံးက အဲဒီကဒ်တွေကို လက်ခံယူကြပါ။ အသုံးဝင်ပါမယ်။ သွားလာရေး၊ စီးပွားရေး၊ ပညာရေးအတွက် အဆင်ပြေပါလိမ့်မယ်။ NVC လက်ခံပြီး သုံးလ သို့မဟုတ် ခြောက်လ ကြာရင် နိုင်ငံသားကဒ် လျှောက်လို့ရတယ်။ အဲဒီအချိန်မှာ နိုင်ငံသားဖြစ်သွားပါလိမ့်မယ်” ဟု မက်လုံးပေး ဟောပြောစည်းရုံး ခဲ့ကြောင်း ဒေသခံများက RB News သို့ပြောသည်။ 

၎င်းက ဆက်လက်၍ “အချို့လူဆိုးလူညံ့တွေက NVC လက်မခံဖို့ ခင်ဗျားတို့ကို စည်းရုံးနေတယ်။ အချို့က NVC လက်ခံရင် သတ်မယ်၊ ရိုက်မယ်၊ ပြန်ပြေးဆွဲသွားမယ် ဆိုပြီး ခြိမ်းခြောက်နေတာ ကျွန်တော်တို့သိတယ်။ အဲဒီ လူဆိုးတွေပြောတဲ့ စကားကို နားမထောင်ပါနဲ့၊ အဲဒီလူဆိုးတွေက ဘာမှ လုပ်မပေးနိုင်ဘူး” ဟု ပြောဆိုခဲ့သည်။ 

မြင်းလွတ်မြို့ အရှေ့ပိုင်းရပ်ကွက်မှ ဦးအဒူလ်ဟာဘဲစ် (ခ) ဦးစောရွှေက “အရင်အစိုးရက ကျွန်တော်တို့ကို အမျိုးသားမှတ်ပုံတင်ကဒ်တွေ ထုတ်ပေးခဲ့တယ်။ ပြီးတော့ ပြန်ရုပ်သိမ်းပြီးတော့ အဲဒီထက် အဆင့်နိမ့်တဲ့ ယာယီကဒ်တွေ ထုတ်ပေးခဲ့တယ်။ ပြန်ရုပ်သိမ်းခဲ့တယ်။ ဘာအခွင့်အရေးမှ မရခဲ့ဘူး။ အခု ထုတ်ပေးနေတဲ့ NVC က အရင်ကဒ်တွေထက် အဆင့်နိမ့်တယ်။ နိုင်ငံခြားသား ပုံဖော်နေတာ ဖြစ်တဲ့အတွက် ကျွန်တော်တို့ အနေနဲ့ လက်ခံနိုင်စရာ အကြောင်းမရှိဘူး” ဟု ပြန်လည် ချေပ ပြောဆိုခဲ့သည်။ 

ထို့နောက် ဦးထွန်းထွန်းနိုင်က “ယခင်က စကားတွေ မပြောနဲ့ ယခုဟာကိုပဲပြောပါ၊ NVC က နိုင်ငံတော် စီမံကိန်း ဖြစ်တဲ့အတွက် သေချာပါတယ်။ လက်ခံကြည့်ပါ၊ အကျိုးရှိပါမယ်” ဟု အခြေအမြစ်မရှိသည့် မက်လုံးများ ပေးခဲ့ကြောင်း၊ သို့သော်လည်း ဒေသခံ ရိုဟင်ဂျာများက NVC လက်ခံရန် လုံးဝ သဘောမတူခဲ့ကြောင်း သိရှိရပါသည်။ 



Comment ရေးရန်

Rohingya Exodus