ဘူးသီးတောင် ကျောင်းတောင် ဒေသတွင် နယ်ခြားစောင့်ရဲများက နယ်မြေရှင်းလင်းရေး ခေါင်းစဉ်တပ်၍ ဒေသခံများကို ဖမ်းဆီး ငွေညှစ်

RB News

14.8.2017

ဘူးသီးတောင် ။ ။ ရခိုင်ပြည်နယ်၊ ဘူးသီးတောင်မြို့နယ် မြောက်ပိုင်း ကျောင်းတောင်ကျေးရွာ တ၀ိုက်တွင် အစိုးရ လက်နက်ကိုင် အဖွဲ့အစည်းများက နယ်မြေရှင်းလင်းရေး ခေါင်းစဉ်ဖြင့် ဒေသခံရိုဟင်ဂျာများကို ဖမ်းဆီး၍ လူမဆန်စွာ ရိုက်နှက်ကာ မတရားသဖြင့် ငွေညှစ်လျက် ရှိကြောင်း သတင်းရရှိပါသည်။ 

ဘူးသီးတောင်မြို့နယ် မြောက်ပိုင်း တောင်ဘဇာ အခြေစိုက် နယ်ခြားစောင့်ရဲတပ်ဖွဲ့ နယ်မြေစခန်းမှ နယ်မြေမှူးအပါအ၀င် နယ်ခြားစောင့်ရဲ (၄၀) ဦးတို့သည် တင်းမေကျေးရွာအုပ်စုသို့ နယ်မြေရှင်းလင်းရေး ခေါင်းစဉ်ဖြင့် အကြိမ်ကြိမ်ဝင်ရောက်၍ အပြစ်မဲ့ ဒေသခံရိုဟင်ဂျာများကို ဖမ်းဆီးခေါ်ဆောင်သွားပြီး ရိုက်နှက် ညှဉ်းပန်းနှိပ်စက်ကာ ငွေညှစ်လျက် ရှိကြောင်း ဒေသခံများက RB News သို့ပြောပါသည်။

အမှတ် (၉) နယ်မြေ တောင်ဘဇာ စခန်းမှ နယ်မြေမှူး ရဲမှူးထွန်းနိုင် အပါအ၀င် တပ်ဖွဲ့ဝင် (၂၅) ဦးနှင့် ကျောင်းတောင် အခြေစိုက် နယ်ခြားစောင့်ရဲတပ်ဖွဲ့ စခန်းမှ တပ်ဖွဲ့ဝင် (၁၅) ဦးတို့ ပူးပေါင်း၍ သြဂုတ်လ (၁၁) ရက်နေ့တွင် တင်းမေကျေးရွာအုပ်စု၊ အမှတ် (၆) ရပ်ကွက်ကို ၀န်းရံပိတ်ဆို့ပြီး အပြစ်မဲ့ ရွာသား (၂၄) ဦးကို ဖမ်းဆီး၍ ငွေကျပ် (၃၆) သိန်း ညှစ်ယူ၍ (၂၃) ဦးကို ပြန်လည် လွှတ်ပေးခဲ့သော်လည်း မော်လ၀ီမာမတ်အလီကို မဟုတ်မမှန် လုပ်ကြံစွပ်စွဲ၍ ဖမ်းဆီးထားကြောင်း သိရှိရသည်။ 

တစ်ဖန် သြဂုတ်လ (၁၃) ရက်နေ့ ညသန်းခေါင်ယံ တစ်နာရီခန့် အချိန်တွင် တင်းမေကျေးရွာအုပ်စု မြစ်နားရွာကို ၀န်းရံပိတ်ဆို့၍ တစ်အိမ်တက်ဆင်း ရှာဖွေခဲ့သည်။ ရှာဖွေစဉ် ဥပဒေနှင့် မလွတ်ကင်းသည့် ပစ္စည်းတစ်စုံတစ်ရာ မတွေ့ရှိခဲ့သော်လည်း ဒေသခံရွာသား (၁၆) ဦးကို ဖမ်းဆီး၍ ကျောင်းတောင်စခန်းသို့ ခေါ်ဆောင်သွားခဲ့ကြောင်း၊ နံနက် (၄) နာရီအချိန်တွင် (၁၂) ဦးကို ငွေကျပ်တစ်သိန်းစီ ညှစ်ယူ၍ ပြန်လည် လွှတ်ပေးခဲ့ကြောင်း၊ ကျန်သည့် (၄) ဦးဖြစ်သည့် ဦးနူရ်အာလောမ် (ဘ) ဦးဘော်ရှိရ်အာမတ် (အသက် ၄၂ နှစ်)၊ ဦးအဲရ်ရှားဒ် (ဘ) ဦးအဒူဂေါ်ဖာရ် (အသက် ၃၁ နှစ်)၊ ဦးရှာကဲရ် နှင့် ဦးဇာကဲရ် တို့ကို တစ်ညလုံး လူမဆန်စွာ ရိုက်နှက်ပြီးနောက် သြဂုတ်လ (၁၄) ရက်နေ့ နေ့လည် တစ်နာရီအချိန်တွင် ငွေကျပ် (၅) သိန်း ညှစ်ယူ၍ ပြန်လည် လွှတ်ပေးခဲ့ကြောင်း ဒေသခံများက RB News သို့ပြောပါသည်။