ဘူးသီးတောင်ရှိ ကျေးရွာအချို့တွင် နယ်မြေရှင်းလင်း တာဝန်ယူထားသည့် စစ်သားများက ဒေသခံများကို ရိုက်နှက်

6.8.2017

ဘူးသီးတောင် ။ ။ ရခိုင်ပြည်နယ်၊ ဘူးသီးတောင်မြို့နယ် တောင်ပိုင်း ဘုရားပြင်အောင်ပ၊ ဖရုံချောင်း၊ ဂူတာပြင် စသည့် ကျေးရွာအုပ်စုများ အတွင်း နယ်မြေရှင်းလင်းရေး ဆောင်ရွက်နေသည့် စစ်သားများသည် ကျွဲ၊ နွား ကျောင်းနေသည့် ရိုဟင်ဂျာလူငယ်များကို နေ့စဉ်နှင့်အမျှ ရိုက်နှက်နေသောကြောင်း သတင်းရရှိပါသည်။ 

သြဂုတ်လ (၆) ရက်နေ့ နံနက် ၁၀ နာရီခန့် အချိန်တွင် ဘုရားအောင်ပြကျေးရွာမှ အီဆုပ်မာမတ် (ဘ) ဦးကာလာ (အသက် ၂၅ နှစ်) နှင့် ယာစီးန် (ဘ) ဦးအီနုစ် (အသက် ၁၆ နှစ်) တို့သည် ရွာ၏ အနောက်ဖက်ရှိ စားကျက်များတွင် ကျွဲ၊ နွားများ ကျောင်းနေစဉ် စစ်သား ၄၀ ကျော် ရောက်ရှိလာပြီး ၎င်းတို့အား တုတ်များ၊ သေနတ်များဖြင့် ရိုက်နှက်ခဲ့ကြောင်း၊ လူမဆန်စွာ ရိုက်နှက်မှုကြောင့် ကျွဲ၊ နွားကျောင်းနေသူ နှစ်ဦးစလုံး သတိလစ် သွားသဖြင့် ရွာသားများက ထမ်း၍ နေအိမ်များသို့ ခေါ်ဆောင်သွားခဲ့ရကြောင်း၊ အီဆုပ်မာမတ် ဆိုသူမှာ ခြေထောက်ကျိုးနေသူ တစ်ဦးဖြစ်ကြောင်း ဒေသခံများက RB News သို့ပြောပါသည်။ 

ဂူတာပြင်ကျေးရွာအုပ်စု ငှက်ပျောချောင်းကျေးရွာတွင် ခေတ္တစခန်းချနေသည့် စစ်သားများက ဆိုင်ကယ်ဖြင့် သွားလာနေသူများကို စစ်ဆေး၍ ငွေများ၊ စားသောက်ဖွယ်ရာများနှင့် ဆိုင်ပစ္စည်းများ လုယက်ခဲ့ကြောင်း၊ ညနေ ၄ နာရီအချိန်တွင် ပြိုင်းတောင်ကျေးရွာ၏ အနောက်ဖက် စားကျက်တွင် ကျွဲ၊ နွားကျောင်းနေသည့် ကလေးများကို ရိုက်နှက်ခဲ့ကြောင်း ရွာသားတစ်ဦးက RB News သို့ပြောသည်။ 

သြဂုတ်လ (၄) ရက်နေ့တွင်လည်း ဖရုံချောင်း ကျေးရွာ၏ အနောက်ဖက်ရှိ စားကျက်များတွင် ကျွဲ၊ နွား ကျောင်းနေသူ ၃၀ ဦးကျော်ကို ဖရုံချောင်းတွင် ခေတ္တ စခန်းချထားသည့် စစ်သားများက ရိုက်နှက်ခဲ့ကြောင်း သိရှိရသည်။ ရိုက်နှက်ခံရသူများထဲတွင် သက်ကြီးရွယ်အို နှစ်ဦး၊ အသက် ၁၄ နှစ်အောက်နှင့် ကျန်းမာရေး ချို့တဲ့နေသူများ ပါဝင်ကြောင်း သိရှိရသည်။ ရိုက်နှက်မှုကြောင့် ဒဏ်ရာရရှိသူများ ရှိသည့်အပြင် ခေါင်းကွဲသွားသူ တစ်ဦးလည်း ရှိသည်ဟု ဒေသခံများက ဆိုသည်။ 

စစ်သားများက နေ့စဉ် ရိုက်နှက်နေသည်ကို မြင်တွေ့နေသော်လည်း လယ်သမားများက ကျွဲ၊ နွား မကျောင်းနိုင်ပါက လယ်ယာမြေလုပ်ငန်း ဆက်လက် မလုပ်ကိုင်နိုင်မည်ကို စိုးရိမ်၍ နေ့စဉ် ကျွဲ၊ နွားများ ကျောင်းရန် ထွက်နေရကြောင်း၊ လယ်မြေ မစိုက်ပျိုးနိုင်ပါက မြို့နယ် အုပ်ချုပ်ရေးမှူးက လယ်မြေများ သိမ်းဆည်းမည်ဟု ခြိမ်းခြောက်ထားကြောင့် ယခုကဲ့သို့ ရိုက်နှက်ခံရသည့်ကြားက နေ့စဉ် ကျွဲ၊ နွားများ ကျောင်းနေရသည်ဟု ဒေသခံများက ပြောပါသည်။