၅၅၁ ဒုတပ်ရင်းမှူးက မောင်တော တောင်ပိုင်း ရွာများသို့ သွားရောက်၍ ဒေသခံများကို ကျေးရွာအုပ်ချုပ်ရေးမှူးများမှ တဆင့် ခြိမ်းခြောက်

MYARF

RB News

2.7.2018

မောင်တော ။ ။ ရခိုင်ပြည်နယ်၊ မောင်တောမြို့နယ် မြို့သူကြီးကျေးရွာအုပ်စု အခြေစိုက် တပ်ရင်း (၅၅၁) မှ ဒုတပ်ရင်းမှူးနှင့် အဖွဲ့သည် မောင်တော တောင်ပိုင်းရှိ ကျေးရွာများသို့ သွားရောက်၍ ဒေသခံများကို ကျေးရွာအုပ်ချုပ်ရေးမှူးမှ တဆင့် ခြိမ်းခြောက်ခဲ့သည်။ 

ဇွန်လ (၂၉) ရက်နေ့တွင် မောင်တောမြို့နယ် မြို့သူကြီးကျေးရွာအုပ်စု ဝေသာလီစခန်းတွင် တာဝန်ကျနေသည့် တပ်ရင်း (၅၅၁) မှ ဒုတပ်ရင်းမှူးနှင့် အင်အား (၅၀) ခန့်ရှိသည့် အဖွဲ့သည် ဒုညောင်ပင်ကြီးနှင့် ပဒင်းကျေးရွာသို့များသို့ လုံခြုံရေး ကင်းလှည့်သည့် ပုံစံဖြင့် သွားရောက်၍ ရွာများကို လှည့်လည်ပြီးနောက် ကျေးရွာအုပ်ချုပ်ရေးမှူးများနှင့် တွေ့ဆုံကာ လမ်းတစ်လျှောက်ရှိ အိမ်များတွင် အမျိုးသမီးများအတွက် အကာဖြစ်အောင် ကာထားသည့် ခြံစည်းရိုးများ ပယ်ဖျက်ပေးရန်နှင့် ပုဇွန်ကန်များတွင် ဆောက်လုပ်ထားသော တဲများ၏ နံရံများ ပယ်ဖျက်ပေးရန် အမိန့်ပေးခဲ့သည်။ 

ထို့အပြင် ယင်းရွာများတွင် ဘင်္ဂလားဒေ့ရ်ှမှ လူများပြန်ဝင်လာသည်များ ရှိကြောင်း၊ ထိုလူများကို ရွာမှ အမြန်ဆုံး နှင်ထုတ်ရန် အမိန့်ပေးခဲ့ကြောင်း၊ ဒီတစ်ကြိမ်ဘဲပြောတာ၊ နောက်မပြောတော့ဘူး၊ ၀င်လာရင် တွေ့မယ်ဟု ပြောဆိုခဲ့ကြောင်း ဒေသခံများက RB News သို့ပြောသည်။

ဇွန်လ (၃၀) ရက်နေ့ နံနက်ပိုင်းတွင် အဆိုပါ ဒု-တပ်ရင်းမှူးနှင့် အဖွဲ့သည် ပန်းတောပြင်ကျေးရွာသို့ သွားရောက်၍ ဒု-ညောင်ပင်ကြီးနှင့် ပဒင်းကျေးရွာများတွင် ပြောဆိုခဲ့သည့်အတိုင်း ပြောဆိုခဲ့သည်။

တပ်ရင်း (၅၅၁) မှ ဒု-တပ်ရင်းမှူးသည် ၎င်းသွားသည့် ကျေးရွာတိုင်းတွင် ကျေးရွာအုပ်ချုပ်ရေးမှူးများကို မင်းတို့ ငါတို့နဲ့ ပူးပေါင်းမှုမရှိဘူးဟု စွပ်စွဲပြောဆို၍ ရှောင်တခင် ၀င်စစ်တဲ့အခါမှာ တစ်ခုခုတွေ့ရင် တစ်ရွာလုံး အပြစ်ပေးခံရမည်ဟု ခြိမ်းခြောက်လေ့ရှိသည်။ 

ထိုကဲ့သို့ ခြိမ်းခြောက်ခြင်းမှာလည်း ကျေးရွာအုပ်ချုပ်ရေးမှူးများကို ၎င်းအား ငွေဆက်သခြင်း မရှိခြင်း၊ မဟုတ်မမှန်သတင်းများ ပေး၍ ငွေညှစ်၍ရအောင် ဖန်တီးမပေးခြင်း တို့ကြောင့် ဖြစ်သည်ဟု ဒေသခံများက ဝေဖန်ပြောဆိုသည်။