ဘူးသီးတောင် လေးမြို့စခန်းမှ နယ်ခြားစောင့်ရဲများက ရိုဟင်ဂျာရွာများကို စစ်ဆေး၍ ငွေကြေး ကောက်ခံ

RB News

10.7.2018

ဘူးသီးတောင် ။ ။ ရခိုင်ပြည်နယ်၊ ဘူးသီးတောင်မြို့နယ် လေးမြို့စခန်းမှ နယ်ခြားစောင့်ရဲများက ရိုဟင်ဂျာရွာများကို စစ်ဆေး၍ ငွေကြေးကောက်ခံခဲ့သည်။

ဇူလိုင်လ (၇) ရက်နေ့တွင် ဘူးသီးတောင်မြို့နယ် အရှေ့ဘက် ဖုံညိုလိပ် အခြေစိုက် နယ်ခြားစောင့်ရဲတပ်ဖွဲ့ စခန်း အမှတ် (၂၄) လေးမြို့စခန်းမှ နယ်ခြားစောင့်ရဲများသည် ဘူးသီးတောင်မြို့နယ် တောင်ပိုင်း ကျောက်ဖြူသား သေကံကျေးရွာအုပ်စု သို့သွားရောက်၍ ရွာသားများအားလုံးကို ကျောင်း၌ စုခိုင်းပြီး မိသားစုတစ်စုချင်းစီကို အိမ်ထောင်စုလူဦးရေစာရင်းနှင့် တိုက်ဆိုင်စစ်ဆေးခဲ့သည်။ ထို့နောက် နယ်ခြားစောင့်ရဲများက စားသုံးစရိတ်ဟု ဆိုကာ မိသားစုတစ်စုလျှင် ငွေကျပ် တစ်ထောင်စီ ကောက်ခံခဲ့ကြောင်း ဒေသခံများက RB News သို့ပြောသည်။ 

ဇူလိုင်လ (၈) ရက်နေ့တွင်လည်း အဆိုပါ နယ်ခြားစောင့်ရဲများသည် သေကံခွဆုံကျေးရွာသို့ သွားရောက်၍ ရွာသားများကို ကျောင်းတွင် စုခိုင်းပြီး မိသားစုတစ်စုချင်းစီ အိမ်ထောင်စုလူဦးရေစာရင်းနှင့် တိုက်ဆိုင်စစ်ဆေးပြီး ၎င်းတို့အတွက် စားသုံးစရိတ်ဟု ဆိုကာ မိသားစုတစ်စုလျှင် ငွေကျပ် နှစ်ထောင်စီ ကောက်ခံခဲ့သည်။ 

ငွေများကို နယ်ခြားစောင့်ရဲများ ကိုယ်တိုင် မကောက်ခံဘဲ ကျေးရွာအုပ်ချုပ်ရေးမှူးများမှ တဆင့် ကောက်ခံခဲ့သည်။ ငွေများကို ကျေးရွာအုပ်ချုပ်ရေးမှူးများအား ကောက်ခိုင်းသည်ကို အခွင့်ကောင်းယူ၍ သေကံခွဆုံ ကျေးရွာအုပ်ချုပ်ရေးမှူး ဦးသိန်းညွန့်က ကျေးရွာအုပ်ချုပ်ရေးအဖွဲ့အတွက်ပါ ငွေကျပ် တစ်ထောင်စီ ပေါင်းထည့်၍ မိသားစုတစ်စုလျှင် ငွေကျပ် နှစ်ထောင်စီ ကောက်ခံခဲ့ခြင်း ဖြစ်သည်။

ထိုကဲ့သို့ စစ်ဆေးမှုမျိုးကို ဘူးသီးတောင်မြို့နယ်ရှိ ကျေးရွာများနှင့် မောင်တောမြို့နယ်ရှိ ကျေးရွာများတွင် ပြုလုပ်ခဲ့သော်လည်း မည်သည့်ကျေးရွာတွင်မှ ငွေကြေး ကောက်ခံခြင်း မရှိခဲ့ကြောင်း သိရသည်။ 

လုံခြုံရေးအတွက် သီးသန့် စစ်ဆေးဆောင်ရွက်ခြင်းသာ ဖြစ်ပြီး၊ ဆွဲ၊တင်၊စစ် ဆိုလျှင် ဓါတ်ပုံရိုက်ခ ကောက်ခံခြင်းများ ပြုလုပ်သည်။ ယခုစစ်ဆေးမှုသည် ဆွဲ၊တင်၊စစ် မဟုတ်ဘဲ ငွေကြေး ကောက်ခံခြင်းမှာ လက်နက်ပြ၍ အနိုင်ကျင့်ခြင်း တစ်မျိုးသာ ဖြစ်သည်ဟု ဒေသခံများက ဝေဖန်ပြောဆိုနေကြသည်။