MHDO မှ ပေးသည့် အထောက်အပံ့များကို ရာအိမ်မှူးများက အလွှဲသုံးစားပြုလုပ်

RB News

10.7.2018

မောင်တော ။ ။ ရခိုင်ပြည်နယ်၊ မောင်တောမြို့နယ် ဧတာလျာကျေးရွာအုပ်စု ဇူလာရွာတွင် ဆင်းရဲသား လယ်သမားများအတွက် MHDO မှ ထောက်ပံ့ပေးသော ဓါတ်မြေသြဇာအိတ်များကို ရာအိမ်မှူးများက စိတ်ကြိုက် ချယ်လှယ်၍ အလွှဲသုံးစား ပြုလုပ်ခဲ့သည်။ 

ဇူလိုင်လ (၈) ရက်နေ့က မောင်တောမြို့နယ် ဧတာလျာကျေးရွာအုပ်စု ဇူလာရွာတွင် MHDO က ဆင်းရဲလယ်သမားများအတွက် ဓါတ်မြေသြဇာ ၅၆ အိတ်ထောက်ပံ့ပေးခဲ့သည်။ အဆိုပါ ဓါတ်မြေသြဇာအိတ်များကို ကျေးရွာအုပ်ချုပ်ရေးအဖွဲ့မှ ရာအိမ်မှူးများ ဖြစ်ကြသည့် ဦးဆာဒဲခ်နှင့် ဦးအဒူမူနာဖ် တို့လက်ထဲသို့ အပ်နှံခဲ့ပြီး၊ ၎င်းတို့က ဓါတ်မြေသြဇာများ ခွဲဝေပေးရာတွင် ဆင်းရဲသားလယ်သများများကို ရွေးချယ်၍ ခွဲဝေပေးခြင်း မပြုလုပ်ဘဲ ၎င်းတို့၏ ဆွေမျိုးသားချင်းများကိုသာ ခွဲဝေပေးခဲ့သည်ဟု ဒေသခံများက RB News သို့ပြောသည်။ 

ဓါတ်မြေသြဇာအိတ်ရရှိခဲ့သူ အများစုမှာ လယ်သမားများ မဟုတ်သောကြောင့် ဓါတ်မြေသြဇာအိတ်များကို ရရချင်းပင် ရောင်းချခဲ့သည်။

“ဓါတ်မြေသြဇာအိတ်ရတဲ့လူတွေ အများစုက လယ်သမားတွေ မဟုတ်ဘူး။ သူတို့အတွက် အသုံးမ၀င်တော့ နှစ်သောင်းခွဲတန်တဲ့ ဓါတ်မြေသြဇာအိတ်ကို တစ်သောင်းနဲ့ ပြန်ရောင်းလိုက်ကြတယ်” ဟု ဒေသခံတစ်ဦးက ပြောပါသည်။ 

လွန်ခဲ့သည့် မေလတွင်လည်း MHDO က ဆင်းရဲသားများအတွက်ဟု ဆိုကာ ဆိတ်များ ထောက်ပံ့ပေးခဲ့သည်။ ထိုစဉ်အခါကလည်း အဆိုပါ ရာအိမ်မှူးနှစ်ဦးက ယခု ဓါတ်မြေသြဇာ ခွဲဝေပေးသည့် ဆွေမျိုးသားချင်းများကိုသာ တစ်မိသားစုလျှင် ဆိတ်နှစ်ကောင်ကျစီ ခွဲဝေပေးခဲ့သည်။ ဆိတ်များခွဲဝေ ပေးမည်ဟုဆိုကာ အိမ်ထောင်စု ၁၂၀ စုမှ ငွေကျပ် ၂၅၀၀ စီကောက်ခံခဲ့သော်လည်း အမှန်တကယ် ခွဲဝေပေးသည့်အချိန်တွင် ၎င်းတို့၏ ဆွေမျိုးသားချင်းများ ဖြစ်သည့် အိမ်ထောင်စု ၆၀ ကိုသာ ဆိတ်နှစ်ကောင်ကျစီ ခွဲဝေပေးခဲ့သည်။ ငွေပေးပြီး ဆိတ်များ မရရှိသည့် မိသားစုများက ဝေစုမရသောကြောင့် ရာအိမ်မှူးများကို ဝေဖန်ပြောဆိုသောအခါ နောက်တစ်ကြိမ်တွင် ပေးမည်ဟု နှစ်သိမ့်ခဲ့သည်။ ယခု ဓါတ်မြေသြဇာအိတ်များ ခွဲဝေပေးရာတွင်လည်း ဆွေမျိုးသားချင်းများကိုသာ ခွဲဝေပေးသဖြင့် ရွာသားများနှင့် ရာအိမ်မှူးများအကြား စကားများခဲ့ရသည်ဟု ဒေသခံများက ပြောပါသည်။