ဆေးဝါးလုံလောက်စွာ ကုသမှု မရသောကြောင့် ဘူးသီးတောင် ထောင်မှ အကျဉ်းသားတစ်ဦး သေဆုံးသွား
Rohingya Eye
RB News
28.9.2018
ဘူးသီးတောင် ။ ။ ရခိုင်ပြည်နယ်၊ ဘူးသီးတောင်မြို့နယ် အကျဉ်းထောင်တွင် နှစ်ရှည် အကျဉ်းကျခံထားရသည့် အကျဉ်းသားတစ်ဦးသည် ဆေးဝါးလုံလောက်စွာ ကုသမှုမရသောကြောင့် သေဆုံးသွားခဲ့သည်။
မောင်တောမြို့နယ် မြောက်ပိုင်း သရက်အုပ်ကျေးရွာအုပ်စု အာဘော်ရှားရွာမှ ဦးအာဘူရှားမား (ဘ) ဦးဘာဆူမျာ (အသက် ၅၀ နှစ်) နှင့် ၎င်း၏သားဖြစ်သူ မာမတ်ဇူဘိုင်ရ် (အသက် ၂၅ နှစ်) တို့နှစ်ဦးကို ၂၀၁၂ ခုနှစ် ပဋိပက္ခတွင် ပါဝင်သည်ဟု စွပ်စွဲ၍ ဖမ်းဆီးပြီးနောက် ထောင်ဒဏ် (၁၂) နှစ် ချမှတ်၍ ဘူးသီးတောင် အကျဉ်းထောင်သို့ ပို့ဆောင်ခဲ့သည်။
လွန်ခဲ့သည့် (၄) လမှစ၍ ဦးအာဘူရှားမား သည် အသားဝါ (စီ ပိုး) ရောဂါစွဲကပ်လာသောကြောင့် ၎င်း၏ မိသားစုဝင်များက ပြင်ပဆေးခန်းတွင် ဆေးကုသမှု ခံယူနိုင်ရန် ထောင်အာဏာပိုင်များထံ အကြိမ်ကြိမ် အသနားခံ တင်ပြခဲ့သော်လည်း ပယ်ချခံခဲ့ရသည်။ ထောင်တွင်းဆေးရုံတွင် လုံလောက်စွာ ဆေးကုသမှု မရရှိခဲ့သောကြောင့် စက်တင်ဘာလ (၂၈) ရက်နေ့ နံနက် ၆ နာရီ အချိန်တွင် သေဆုံးခဲ့ကြောင်း ဒေသခံများက RB News သို့ပြောသည်။
သေဆုံးသွားသူ၏ အသုဘကို မိသားစုဝင်များ လိုက်ပါပို့ဆောင်ခွင့် မရသလို၊ မည်သည့် သင်္ချိုင်း၌ သဂြိုဟ်ခဲ့သည်ကိုလည်း မသိရှိခဲ့ကြောင်း မိသားစုဝင်များ၏ ပြောကြားချက်များအရ သိရသည်။
ဦးအာဘူရှားမား ရောဂါပြင်းထန်စွာ ခံစားနေရချိန်တွင်လည်း မိသားစုဝင်များက ထောင်အာဏာပိုင်များထံ တွေ့ခွင့်တောင်းခံခဲ့သော်လည်း တွေ့ဆုံခွင့်မရခဲ့ပေ။
