ဘူးသီးတောင် သိမ်တောင်ပြင်တွင် လူ (၅) ဦး၏ ၀ိုင်းဝန်းရိုက်နှက်မှုကြောင့် ဆယ်ကျော်သက် လူငယ်တစ်ဦး သေလုမြောပါး ဖြစ်နေ
MYARF
RB News
1.10.2018
RB News
1.10.2018
ဘူးသီးတောင် ။ ။ ရခိုင်ပြည်နယ်၊ ဘူးသီးတောင်မြို့နယ် သိမ်တောင်ပြင်ကျေးရွာအုပ်စုတွင် လူ ၅ ဦး၏ ၀ိုင်းဝန်းရိုက်နှက်မှုကြောင့် ဆယ်ကျော်သက်အရွယ် လူငယ်တစ်ဦး ပြင်းထန်စွာ ဒဏ်ရာရရှိပြီး သေလုမြောပါး ဖြစ်နေသည်။
သိမ်တောင်ပြင်ကျေးရွာအုပ်စု၊ သိမ်တောင်ပြင် မော်လ၀ီရွာမှ မိုဟမ္မဒ်တယုဗ် (ဘ) ဦးဆယိဒ် (အသက် ၁၇-နှစ်) နှင့် ဦးဘိုက်လာ (ဘ) ဦးဘော်ဆိရ်အဟ်မဒ် (အသက် ၄၀-နှစ်) တို့အကြား ယခင်က တစ်ဦးနှင့်တစ်ဦး စကားများခဲ့ရသည်ကို ဦးဘိုက်လာက အငြိုးထားကာ တစ်ချိန်ချိန်တွင် တစ်နည်းနည်းနှင့် မိုဟမ္မဒ် တယုဗ် ကို သတ်မည်ဟု စိန်ခေါ်ပြောဆိုလေ့ရှိခဲ့ပြီး ယမန်နေ့ စက်တင်ဘာလ (၃၀) ရက်နေ့ ည ၇း၀၀ ခန့်အချိန်တွင် ဦးဘိုက်လာနှင့် ၎င်း၏ အစ်ကို ဦးဟူးစိန်းအာမတ် (ဘ) ဦးဘော်ဆိရ်အမဒ် (အသက် ၅၀ နှစ်)၊ ဦးဘိုက်လာ၏ သားဖြစ်သူ အဗ်ဒူလ္လာ (အသက် ၂၂-နှစ်)၊ ဦးဘိုက်လာ၏ သားမက်ဖြစ်သူ မုက်တာရ် (ဘ) ဦးဂါလူဘန်ဂူ (အသက် ၂၆-နှစ်) နှင့် အခြား ဆွေမျိုးတစ်ဦး ဖြစ်သည့် ဘာဂုများ (ခ) ဘာဂျား (ဘ) ဦးအဟ်မဒ်ဟူးစိန်း (အသက် ၂၅-နှစ်) တို့က မိတ်ဆွေနှင့်တွေ့ရန် သွားနေသည့် မိုဟမ္မဒ်တယုဗ် ကို ၎င်းတို့၏ အိမ်နှင့် ကပ်လျက်ရှိသည့် လမ်းမမှ အိမ်ထဲသို့ ဆွဲသွင်းပြီး ကြိုးတုတ်၊ ပါးစပ်ပိတ်ကာ ၅ ဦးစလုံးက လက်ကိုင်တုတ် ကိုယ်စီဖြင့် ၀ိုင်းဝန်းရိုက်နှက်ခဲ့သောကြောင့် သေလုမြောပါး ဖြစ်သွားခဲ့သည်။
မိုဟမ္မဒ်တယုဗ် ကို ရွာသားများက ကျေးရွာတာဝန်ခံ ဦးရော်ရှိတ်၏ နေအိမ်သို့ ခေါ်ဆောင်သွားခဲ့ရာ ကျေးရွာတာဝန်ခံက ချက်ချင်းဆိုသလို ညောင်ချောင်း နယ်မြေရုံးသို့ သတင်းပို့ခဲ့သည်။ နယ်မြေရုံးမှ ဆေးကုသမှုခံယူရန် ကျန်းမာရေးမှူး ဦးစိုးတင်ထံ စေလွှတ်ခဲ့ပြီး၊ ဦးစိုးတင် ထံတွင် ဆေးကုသမှု ခံယူနေစဉ် အခြေအနေ အလွန် စိုးရိမ်စရာ ဖြစ်လာသဖြင့် ဘူးသီးတောင် ပြည်သူ့ဆေးရုံသို့ ပို့လိုက်ကြောင်း ဒေသခံများက RB News သို့ပြောပါသည်။
ရွာသားတစ်ဦးက “ဘိုက်လာရဲ့ သမီးတစ်ယောက်နဲ့ လက်ထပ်မယ် ပြောပြီး အခု အခြားမိန်းကလေးတစ်ယောက်ကို လက်ထပ်ဖို့ စီစဉ်နေတာကြောင့် အခုလို ရိုက်ခံရတာလို့ ပြောဆိုနေတာတွေလည်း ကြားနေရတယ်” ဟု ရွာသားတစ်ဦးက ဆိုသည်။
