မောင်တော ရဲစခန်းရှိ အကျဉ်းသားများနှင့် တွေ့ဆုံခွင့် ရရန်နှင့် မနှိပ်စက်ရန် ငွေပေးနေရ
Rohingya Eye
RB News
31.5.2014
မောင်တော ။ ။ ရခိုင်ပြည်နယ်၊ မောင်တောမြို့နယ်၊ မောင်တောရဲစခန်း အချုပ်ခန်းတွင်းရှိ အကျဉ်းသားများနှင့် တွေ့ဆုံခွင့်ရရန် ငွေကြေးများ ပေးနေရသလို၊ အချုပ်ခန်းတွင်း ညှဉ်းပန်း နှိပ်စက်မှုများ မပြုလုပ်ရန် ငွေပေးနေရကြောင်း သတင်း ရရှိပါသည်။
မောင်တောခရိုင်သို့ ဒု-ရဲမှူးကြီး ရွှေသန်း ပြောင်းရွှေ့လာသည့် အချိန်မှစ၍ မောင်တောမြို့ရှိ မောင်တော ရဲစခန်းရှိ အချုပ်ခန်းတွင် ချုပ်နှောင် ခံထားရသည့် အကျဉ်းသားများကို မိသားစုများက တွေ့ဆုံလိုလျှင် ငွေကြေး မြောက်မြားစွာ ကုန်ကျခံပြီးမှသာ တွေ့ဆုံခွင့် ရလျက် ရှိသည်။
အကျဉ်းသား တစ်ဦးကို မိသားစုဝင် တစ်ဦးက တွေ့ဆုံလိုလျှင် ဂိတ်ဝင်ကြေး အဖြစ် ငွေကျပ် ၁၀၀၀/- ပေးရသည့် အပြင် တွေ့ဆုံခွင့် အတွက် ငွေကျပ် ၁၀၀၀/- ပေးရသည်။ အစားအသောက် တစ်ကြိမ် ပို့လျှင်လည်း တစ်ကြိမ် အတွက် ငွေကျပ် ၂၀၀ စီပေးနေရပြီး၊ နံနက်စာ၊ နေ့လည်စာနှင့် ညနေစာ ပို့သူများမှာ နေ့စဉ် ၆၀၀/- ကျပ် ကုန်ကျလျက်ရှိသည်။ ထိုကဲ့သို့ ငွေကြေးများ ပေးနေရသည်မှာ ငွေကြေး တတ်နိုင်သူများ အတွက် ပြဿနာ မဟုတ်သော်လည်း ဆင်းရဲ နွမ်းပါးသည့် မိသားစုများမှာ ထိုကဲ့သို့ ပေးနေရခြင်း အတွက် အစားအသောက်များ ပို့နိုင်ခြင်း မရှိဟု ဒေသခံများက RB News သို့ပြောပါသည်။
ဆင်းရဲနွမ်းပါးသည့် အကျဉ်းသားများမှာ အချုပ်ခန်းမှ ကျွေးသည့် အစားအသောက်များကိုသာ စားသောက်နေရပြီး၊ အဆိုပါ အစားအသောက်များမှာ သန့်ရှင်းမှု မရှိသလို၊ ၀အောင်ကျွေးမွေးခြင်းလည်း မရှိပေ။ အချုပ်ခန်းတွင် အချိန်ကြာ နေရသူများမှာ နဂိုမူလ ပုံသဏ္ဍန် မရှိတော့ဘဲ ခန္ဓာကိုယ် ပိန်ချုံး လာနေကြသည်။ အလွန်သေးငယ်သည့် အချုပ်ခန်းတွင် ညစ်ပတ် နေသည့်အတွက် ညပိုင်းတွင် ခြင်ကိုက်သည့်ဒဏ်ကို အကျဉ်းသားများ အလူးအလဲ ခံစားနေရပြီး၊ အချုပ်ခန်းမှ ထွက်လာသည့် အချိန်တွင် ရောဂါစွဲကပ် လာကြသည်။
မောင်တောမြို့နယ် ၃ မိုင် ဝေသာလီ န.တ.လ ရွာမှ လက်နက်များနှင့် WY မူးယစ်ဆေးဝါး များဖြင့် ဖမ်းဆီးခံရသူ ဦးသန်းမောင်သည် အချုပ်ခန်းတွင်းသို့ ဘင်္ဂလား မိုဘိုင်းဖုန်း သွင်းသည့် အတွက်ဟုဆိုတာ မေလ (၂၅) ရက်နေ့မှ စ၍ အချုပ်ခန်းတွင်းသို့ ပစ္စည်းများ သွင်းခွင့် ပိတ်ပင်လိုက်သောကြောင့် အကျဉ်းသားများ အတွက် အစားအသောက်များ ပို့ခွင့် ပိတ်ပင်ထားခံရကြောင်း ဒေသခံများက ဆိုသည်။ ယခင်က ငွေကြေးကုန်ကျခံပြီး အစားအသောက်များ ပို့ခွင့် ရခဲ့သော်လည်း ယခုအခါ ပိတ်ပင်ထားခံရသည့် အတွက် အကျဉ်းသားများ၏ စားသောက်ရေး အတွက် မိသားစုများ စိုးရိမ်ပူပန်လျက် ရှိကြသည်။
နယ်ထိန်း အဖွဲ့ဝင် ရဲတပ်ကြပ်ကြီး စံလှအောင်က အကျဉ်းသားများကို လူမဆန်စွာ ရိုက်နှက် နှိပ်စက်မှု အမျိုးမျိုး ပြုလုပ်လျက် ရှိပြီး၊ ၎င်းကို ငွေကျပ် နှစ်သောင်းမှ လေးသောင်း အထိ ပေးမှသာ ရိုက်နှက်မှုများကို ရပ်တန့်လျက် ရှိသည်။ တပ်ကြပ်ကြီး စံလှအောင်သည် ရိုဟင်ဂျာ အကျဉ်းသားများကို ရိုက်နှက် နှိပ်စက်၍ စီးပွားရှာလျက် ရှိပြီး၊ ကညင်တန်းရွာမှ ဦးမိုဟာမတ်အီနုစ် (ဘ) ဦးမိုဟာမတ်ဟာရှင်မ် (အသက် ၃၀ နှစ်) သေဆုံးသွား ရခြင်းမှာလည်း အဆိုပါ တပ်ကြပ်ကြီး၏ လူမဆန်စွာ ရိုက်နှက် နှိပ်စက်မှုကြောင့် ဖြစ်ကြောင်း သေဆုံးသူ၏ အလောင်းကို ရင်ခွဲ စစ်ဆေးပြီးနောက်တွင် သိရှိခဲ့ရကြောင်း မိသားစုဝင်များက ဆိုသည်။ အမှတ် (၃) ရပ်ကွက် ရှီဒါရွာမှ ဦးမာမတ်ဒေါလာလ် (ဘ) ဦးမာမတ်ဖူရုခ် (အသက် ၅၀) ၏ ခြေထောက် အဆစ်များ ပျက်စီး သွားရခြင်းမှာလည်း အဆိုပါ တပ်ကြပ်ကြီး၏ ညှဉ်းပန်း နှိပ်စက်မှုကြောင့် ဖြစ်သည်ဟု ဒေသခံများက RB News သို့ပြောပါသည်။
