ဈေးကောက်၏ အဆမတန် ဈေးကောက် ကောက်မှု ညှဉ်းပန်း နှိပ်စက်မှုကြောင့် ဒေသခံများ အခက်ကြုံ
Rohingya Eye
RB News
17.3.2015
မောင်တော ။ ။ ရခိုင်ပြည်နယ်၊ မောင်တောမြို့နယ် မြို့မ ဘောလုံးကွင်း၏ အနောက်ဘက်၌ ရှိသော ငါးဈေးတွင် ဈေးကောက် ဖြစ်သူ မောင်သိန်းထွန်း၏ အဆမတန် ဈေးကောက် ကောက်ခံမှု၊ ရိုက်နှက် ညှဉ်းပန်း နှိပ်စက်မှုကြောင့် ဒေသခံများ ဈေးဝယ်ရန်ပင် အခက်ကြုံနေရကြောင်း သတင်း ရရှိပါသည်။
မောင်တောမြို့နယ် မြို့မ ဘောလုံးကွင်း အနောက်ဘက်၌ ရှိသည့် ငါးဈေးတွင် ဈေးကောက် ဖြစ်သူ မောင်သိန်းထွန်း (ယခင်က ရမ်းကားခြင်း အတွက် ရဲတပ်ဖွဲ့မှ ထုတ်ပယ်ခံရသူ) သည် ဈေးတွင် ဒေသခံ ရိုဟင်ဂျာ မိန်းကလေးငယ်များ ရောင်းချသည့် ဟင်းသီးဟင်းရွက်များ ရောင်းချ၍ ငွေငါးရာကျပ် ရလျှင် ငွေတစ်ရာစီ ကောက်ခံခြင်း၊ မပေးလျှင် ဟင်းသီးဟင်းရွက် များကို သိမ်းဆည်းလိုက်ခြင်း၊ ပါးရိုက်ခြင်းများ အမြဲတစေ ပြုလုပ်လျက် ရှိကြောင်း ဒေသခံများက RB News သို့ပြောသည်။
မတ်လ (၁၂) ရက်နေ့ နံနက် ၈ နာရီ အချိန်တွင် အဆိုပါဈေး၌ မောင်နီရွာမှ ငါးရောင်း၍ အသက်မွေးဝမ်းကျောင်း ပြုသူ ဦးရှော်မ်ရှု၏သား (အသက် ၂၁ နှစ်)၊ ရှော်မ်ရှုအာမီးန် (အသက် ၂၅ နှစ်) နှင့် ရွှေဇား ကျေးရွာမှ မော်ဂူလ် (အသက် ၂၅ နှစ်) တို့ ငါးရောင်းချနေစဉ် ဈေးကောက် မောင်သိန်းထွန်းသည် အရက်သောက်စား မူးယစ်ပြီး ဈေးကောက်ကို အဆမတန် တောင်းခံခဲ့ရာ ငါးရောင်းချသူများက တောင်းခံသည့် ငွေများလွန်းကြောင်း ပြောသဖြင့် ငါးရောင်းသူများကို လူအများ ရှေ့မှောက်တွင် ဂုဏ်သိက္ခာ ညိုးနွမ်းအောင် ပါးရိုက်ခြင်း၊ လက်သီးဖြင့် ထိုးခြင်း ကန်ကျောက်ခြင်းများ ပြုလုပ်ခဲ့ကြောင်း ဒေသခံများက ပြောပါသည်။
အဆိုပါဈေးတွင် လူမျိုးစု နှစ်ခု ဈေးဝယ်ယူနိုင်ရန် အတွက် UNHCR မှ ဆောက်လုပ် လှူဒါန်း ခဲ့ခြင်း ဖြစ်ပြီး၊ မောင်သိန်းထွန်း၏ ရမ်းကားမှုကြောင့် ဒေသခံ ရိုဟင်ဂျာများ ဈေးဝယ်ရန်ပင် အခက်အခဲ ဖြစ်လျက် ရှိသည်ဟု ဆိုသည်။
မောင်တောမြို့နယ် မြို့မငါးဈေး လိုင်စင်စီကို ယူနိုက်တက် တည်းခိုရိပ်သာ ပိုင်ရှင် ဦးစံရွှေက ရယူခဲ့ပြီး၊ ၎င်းက တဆင့် ခွဲဝေ၍ ရောင်းချခဲ့ရာ၊ မြို့မ ဘောလုံးကွင်း အနောက်ဘက်၌ ရှိသော ငါးဈေးကို ခရိုင် အထွေထွေ အုပ်ချုပ်ရေး ဦးစီးဌာန၏ စာရေးဖြစ်သူ ဦးသန်းတင့်အား ရောင်းချခဲ့ကြောင်း သိရသည်။
