ဘူးသီးတောင်တွင် နယ်ပိုင်းမှ အလုပ်လာလုပ် (၆) ဦး ခဏနေထိုင်နိုင်ရေး အတွက် မြို့မရဲစခန်းမှ ငွေညှစ်ပြီးမှ ခွင့်ပြုချက်ပေး
RB News
22.10.2016
ဘူးသီးတောင် ။ ။ ရခိုင်ပြည်နယ်၊ ဘူးသီးတောင် မြို့နယ်တွင် နယ်ပိုင်းမှ ရက်ပိုင်းအတွက် အလုပ်လာလုပ်သူ (၆) ဦးသည် မြို့ပေါ်တွင် ခဏတာ နေထိုင်နိုင်ရေးအတွက် မြို့မရဲစခန်းမှ ခွင့်ပြုချက် တောင်းခံခဲ့ရာ ငွေညှစ်ခံခဲ့ရကြောင်း သတင်း ရရှိပါသည်။
ဘူးသီးတောင်မြို့နယ်၏ အရှေ့ဘက် ကုလားပန်ဇင်ချောင်း တံတားစီမံကိန်း အတွက် ယခင် ပေ ၁၀၀ ရှိရာလမ်းမကို ပေ ၁၅၀ ထိ တိုးချဲ့လျက်ရှိရာ လမ်းဘေး နှစ်ဖက်ရှိ လူနေအိမ်များ၊ ဆိုင်ခန်းများ ဖြိုဖျက်ပြီး မြေနေရာ ထုတ်ပေးနေရသည်။ အဆောက်အဦများ ဖြိုဖျက်ရန် အတွက် နယ်ပိုင်းမှ အလုပ်သမားများ ငှားရမ်း၍ ဖြိုဖျက်နေရသည်။
ယခုအခါ ည (၇) နာရီမှ နံနက် (၆) နာရီထိ အပြင်မထွက်ရ အမိန့် ထုတ်ပြန်ထားသောကြောင့် နယ်ပိုင်းမှ အလုပ်သမားများမှာ ၎င်းတို့၏ နေရပ်သို့ နေချင်းမပြန်နိုင်သဖြင့် အလုပ်လုပ်နေသော ပညာရေးဌာနမှ အငြိမ်စား စာရေးကြီး ဦးလုက်မာန်၏ ခြံဝင်းအတွင်း ယာယီ နေထိုင်ခွင့် ရရှိရေး အတွက် အောက်တိုဘာလ (၂၁) ရက်နေ့က မြို့နယ် မြို့မရဲစခန်းသို့ သွားရောက်၍ ခွင့်ပြုချက် တောင်းခံခဲ့ရာ ရဲစခန်းမှ အလုပ်သမား (၆) ဦးအတွက် ငွေကျပ် ၆ သောင်း ပေးရမည်ဟု တောင်းခံခဲ့သည်။
ရဲစခန်းက ငွေကျပ် ၆ သောင်း တောင်းသည်ကို အလုပ်သမား တစ်ဦးက နားမရှင်းဘဲ ငွေကျပ် ၆ ထောင်ဟု ယူဆကာ ငွေကျပ် ၆ ထောင် ပေးသဖြင့် ရဲတပ်ဖွဲ့ဝင် တစ်ဦးက အဆိုပါ အလုပ်သမားကို ပါးရိုက်ပြီး ငွေကျပ် ၆ သောင်း ပေးမှ နေထိုင်ခွင့် ပြုမည်ဟု ပြောသဖြင့် ငွေကျပ် ၆ သောင်း ပေးခဲ့ရကြောင်း ဒေသခံ တစ်ဦးက RB News သို့ပြောသည်။
အစိုးရ၏ စီမံကိန်း အတွက် အဆောက်အဦများကို အချိန်မီ ဖြိုပျက်ပေးရမည် ဖြစ်ပြီး၊ အချိန်မီ ဖြိုဖျက် မပေးနိုင်ပါက အရေးယူခံရမည်ကို စိုးရိမ်ရသောကြောင့် ယခုကဲ့သို့ ငွေပေးပြီး အလုပ်သမားများ နေထိုင်ခွင့် ရယူနေရသည်ဟု အဆိုပါ ဒေသခံကပြောပါသည်။
မောင်တောမြို့၏ အခြေအနေကို အခွင့်ကောင်းယူကာ ဘူးသီးတောင်မြို့ရှိ ရဲတပ်ဖွဲ့ဝင်များက ယခင်ကထက် ပိုပြီး ငွေညှစ်နေသည်များ ရှိကြောင်း သိရှိရသည်။
