ဘူးသီးတောင် တပ်ရင်း (၅၅၁) မှ တပ်မတော်သား များက ဒေသခံများထံမှ ငွေညှစ်
RB News
23.3.2015
ဘူးသီးတောင် ။ ။ ရခိုင်ပြည်နယ်၊ ဘူးသီးတောင် မြို့နယ် အခြေစိုက် အမှတ် (၁၅) စစ်ဆင်ရေး ကွပ်ကဲရေး ဌာနချုပ် လက်အောက်ခံ တပ်ရင်း (၅၅၁) မှ တပ်မတော်သား များက အပြစ်မဲ့ ဒေသခံများထံမှ ငွေညှစ်ခဲ့ကြောင်း သတင်း ရရှိပါသည်။
ဘူးသီးတောင် မြို့နယ် အခြေစိုက် အမှတ် (၁၅) တပ်မတော် စစ်ဆေးရေး ကွပ်ကဲရေး ဌာနချုပ် လက်အောက်ခံ တပ်ရင်း ဖြစ်သည့် တပ်ရင်း (၅၅၁) မှ တပ်ထောက် ဗိုလ်ကြီး၊ ဆရာကြီး မြတ်ထွန်းနှင့် တပ်သား ဦးလှဦး တို့က ၎င်းတို့၏ တပ်ရင်း လက်အောက်ခံ ကျေးရွာအုပ်စု များမှ အပြစ်မဲ့ ဒေသခံ ပြည်သူများကို ခေါ်ယူ၍ ရိုက်နှက် ညှဉ်းပန်း နှိပ်စက်မှုများ ပြုလုပ်သည့် အပြင် ငွေညှစ်မှုများ ပြုလုပ်လျက် ရှိကြောင်း ဒေသခံများက RB News သို့ပြောသည်။
မတ်လ (၂၀) ရက်နေ့ နေ့လည် (၂) နာရီ အချိန်တွင် အဆိုပါ တပ်မတော်သား များသည် ၀ရကျွန်းကျေးရွာမှ ဒေသခံ တစ်ဦး ဖြစ်သည့် ဒေါ်အာယေရှာထံမှ ငွေကျပ် ၄ သိန်း၊ ဆေးအိုးကျ ကျေးရွာမှ ဒေသခံ တစ်ဦး ဖြစ်သည့် ဦးဆီရာဇူလ်ဟောက် (ဘ) ဦးဝါဇော်ဒိန် ထံမှ ငွေကျပ် ၄ သိန်းကို အကြောင်းမဲ့ ညှစ်ယူခဲ့သည့် အပြင် ဆေးအိုးကျ ကျေးရွာမှ ဦးအာဘူဆီဒိတ် ထံမှလည်း ငွေကျပ် ၇ သိန်း ညှစ်ယူ၍ ဦးအာဘူဆိဒိတ်အား ရှာဖွေလျက် ရှိသည်ဟု ဒေသခံများက ပြောပါသည်။
၎င်းတို့သည် တပ်ရင်းအပိုင် ကျေးရွာအုပ်စုများရှိ အုပ်ချုပ်ရေးမှူး များထံမှ တဆင့် အပြစ်မဲ့ ဒေသခံ ပြည်သူများကို ဖုန်းဖြင့် ခေါ်၍ ငွေညှစ်ခြင်းများ မကြာခဏ ပြုလုပ်လေ့ ရှိကြောင်း သိရသည်။
